نامراتلار قوي تەبىئەتلىك، بايلار بۆرە تەبىئەتلىك ( 1-قىسىم )

mehriya

	ئەجرىڭلارغا تەشەككۈر . يۇقۇردىكى تورداش دېگەندەك نەشىرياتقا بېرىدىغان ئىشكەنتۇق . تەپسىلى ئوقۇپ بۇلۇپ ئاندىن چۈشەنچەمنى ئوتتۇرغا قۇيۇمەن .

WWW.UYHQT.COM

	بىرىنچى باب ئىككىنچى پارگىراف ***2. نامراتلار ئۆز تەغدىرىنى ئۆزگەرتىشكە ئىنتىلمەيدۇ، بايلار ئۆز تەغدىرىنى ئۆز قولىدا تۇتىدۇ    «ھەي!نامراتلىق پىشانەمگە پۈتۈلگەنىكەن، ھاياتىمدا ھېچقانداق ئۈمىد قالمىدى!    باي بولۇش ئۈچۈن مەن نۇرغۇن ئاماللارنى تاپتىم، نۇرغۇن قېتىملاپ سىناپ باقتىم، بىراق ھەممىسىدە مەغلۇپ بولدۇم. قارىغاندا مېنىڭ بۇ ئۆمرۈمدە باي بولۇشۇم مۇمكىن ئەمەسكەن، ئەڭ ياخشىسى ئۆلگەن ياخشىكەن!»    ......    ئازراقلا دىققەت قىلسىڭىز رىئال تۇرمۇشنىڭ ھەممىلا يېرىدىن مۇشۇنداق زارلاش-قاقشاشلارنى ئاڭلايسىز .نۇرغۇنلىغان كىشىلەر نامرات ئائىلىدىن كېلىپ چىققاچقا ياكى بايلىققا ئېرىشىش يولىدا ئوڭۇشسىزلىق – زەربىلەرگە دۇچار بولغاچقا، ناھايىتى تېزلا ئۈمۈدسىزلىنىپ، ھازىرقى كۈنىگە شۈكرى قىلىدىغان بولۇپ قالغان.    ناھايىتى ئېنىقكى، بۇ خىل كىشىلەر  ئۆزىنىڭ ھۇرۇنلىقى ،جۈرئەتسىزلىكىنى تەغدىردىن كۆرگۈچىلەردۇر، ئۇلار <تەغدىرىم  ئاللىبۇرۇن پىشانەمگە پۈتۈۋېتىلگەن، تىرىشساممۇ بەرىبىر ئۆزگەرتكىلى بولمايدۇ> دەپ قارايدۇ. بۇ خىل پاسسىپ قاراشنىڭ تۈرتكىسى ئاستىدا، ئۇلار ئۆز ھالىتىدىن قانائەتلىنىدۇ، ئىلگىرىلەشنى ئويلىمايدۇ، «تەغدىرنىڭ ئورۇنلاشتۇرۇشىنى» رازىمەنلىك بىلەن قوبۇل قىلىدۇ، ئۇلار ئەزەلدىن ئاكتىپلىق بىلەن ئالغا ئىلگىرىلەپ، بىر جۈپ قولىغا تايىنىپ تەغدىرىنى ئۆزگەرتىشنى ئويلاپ باقمايدۇ.    ئەگەر يەنە ئازراق دىققەت قىلسىڭىز، سىز مۇنداق قىزىقارلىق قانۇنىيەتنى بايقايسىز: يۇقارقىدەك  گەپ – سۆزلەرنى قىلىدىغانلار تىپىك نامراتلار بولۇپ، ئۇلارنىڭ باش كۆتۈرۈپ چىقمىقى ناھايىتى تەس.    بۇ خىل قانۇنىيەتنى كەلتۈرۈپ چىقارغىنى ھەرگىزمۇ تەڭرىنىڭ ئورۇنلاشتۇرۇشى ئەمەس، بەلكى كىشىلەرنىڭ ئۆزىدىكى ھۇرۇنلۇق مەسىلىسى. چۈنكى بۇ خىل كىشىلەر ھەدىسىلا  ئۆز مەغلۇبىيىتىنى تەغدىرگە ئارتىپ قۇيۇشقا ئادەتلەنگەن.شۇڭا مۇنداق كىشىلەرنىڭ  «بايلىق ئىزدەش يولى» دا مەغلۇب بولۇشى ئېنىق. ئۇلار «نامرات» لىق قالپىقىنى كىيىپ ھايات كەچۈرىدۇ.    بۇنىڭغا نىسبەتەن بايلار ئوخشىمىغان پوزىتسىيەدە بولىدۇ، ئۇلار تەغدىرنى ئۆزگەرتكىلى،ئامەتنى قولغا كەلتۈرگىلى بولىدىغانلىقىغا ئىشىنىدۇ. ئۇلار بارلىق مۇمكىنچىلىكتىن پايدىلىنىپ ئۆزىنىڭ تەغدىرىنى يارىتىدۇ.    بىز بىرلىكتە بايلىققا ئائىت ھېكىمەتلىك ھېكايىدىن بىرنى كۆرۈپ باقايلى:    تەڭرىنىڭ ئەلچىسى ئىنسانلار ئارسىغا كېلىپ بىر پالچىنىڭ ئىككى بالىغا پال ئېچىۋاتقانلىقىغا يولۇقۇپ قاپتۇ. ئەلچى پەقەت پالچىنىڭ بىر بالىنى كۆرسىتىپ تۇرۇپ: «سەن كەلگۈسىدەئەلىيۇل ئەلا بولىسەن.»دىگەنلىكىنى؛ ئارقىدىنلا يەنە بىر بالىنى كۆرسىتىپ: «تىلەمچى بولۇش سىنىڭ پىشانەڭگە پۈتۈلگەن ئىكەن.» دىگەنلىكىنى كۆرۈپتۇ.    20 يىلدىن كىيىن تەڭرىنىڭ ئەلچىسى ئىنسانلار ئارىسىغا قايتا كېلىپ ئەينى ۋاقىتتىكى ھېلىقى ئىككى بالىنى تېپىپ، پالچىنىڭ بىشارىتىنىڭ توغرا ياكى خاتا ئىكەنلىكىنى بىلىپ باقماقچى بوپتۇ. ھالبۇكى نەتىجە ئەلچىنى ناھايىتى ھەيران قالدۇرۇپتۇ: ئەينى ۋاقىتتا «ئەلىيۇل ئەلا» بولىدۇ ،دىگەن بالا كوچىلاردا سەرگەردان بولۇپ تىلەمچىگە،«تىلەمچى» بولىدۇ دىگەن بالا ئەلىيۇل ئەلاغا ئايلانغان ئىكەن.    ئەلچى بۇنىڭ تىگىگە يىتەلمەي، تەڭرىنى تېپىپ ئۇنىڭدىن جاۋابىنى سوراپتۇ.    تەڭرى جاۋاب بېرىپ: «مەن ھەر بىر ئادەمگە بەرگەن تۇغما قابىلىيەت ئۇ ئادەمنىڭ ئۈچتىن بىر قىسىم تەغدىرىنى بەلگىلەيدۇ، ئېشىپ قالغان تەغدىرنىڭ ھەممىسىگە شۇ ئادەم ئۆزى ئىگىدارچىلىق قىلىدۇ.» دەپتۇ.    جۇڭگو تەيۋەنلىك داڭلىق ئوقەتچى ۋاڭ يوڭچىڭ ئىلگىرى: «تەبئىي مۇھىتنىڭ ياخشى – يامان بولۇشى، خۇشاللىق ياكى ئازاپنىڭ كۆپ بولۇشى بىلەن مۇناسىۋەتسىز، مۇۋەپپەقىيەتنىڭ ئاچقۇچى پۈتۈنلەي ئادەمنىڭ تىرىشچانلىقىغا باغلىق.» دىگەن.  بىر ئادەمنىڭ تەغدىرىنى بەلگىلەيدىغىنى، سىرتقى دۇنيانىڭ تەسىرى ئەمەس، تەڭرىنىڭ ئورۇنلاشتۇرۇشىمۇ ئەمەس، بەلكى شۇ كىشىنىڭ ئۆز تەغدىرىگە قانداق ئىگىدارچىلىق قىلىشىغا باغلىق.    خۇددى يۇقىرىقى ھېكايىدىكى «تىلەمچى» دەپ بىشارەت قىلىنىپ «ئەلىيۇل ئەلا» غا ئۆزگەرگەن بالىغا ئوخشاش، ئېھتىمال ئۇنىڭ تەبئىي شارائىتى ھەرگىز ئەۋزەل ئەمەس، كېلىپ چىقىشىمۇ پۇلدار ئەمەس بولۇشى مۇمكىن، بۇلار ئۇنىڭ تەغدىرىنى بەلگىلەيدىغان ئاخىرقى ئامىل ئەمەس. ئۇنىڭ پالچىنىڭ بىشارىتىنى ئۆزگەرتەلىشىدىكى سەۋەب - تەغدىر بىلەن جەڭ قىلىپ، ئۆز تەغدىرىنىڭ خوجايىنى بولالىغانلىقىدا.    ئويلاپ باقايلى، ئەگەر ئۇ پالچىنىڭ گېپىگە چىن پۈتۈپ، ئۆزىنىڭ پىشانىسىگە «تىلەمچىلىك قىلىش» پۈتۈلگەن دەپ قاراپ، تەغدىرگە بويسۇنسا، ھېچقانداق تىرىشچانلىق ياكى ئۆزگەرتىش كىرگۈزمىسە، ئۇنداقتا 20 يىلدىن كىيىن ئۇنىڭ «ئەلىيۇل ئەلا» بولالىشى مۇمكىنمۇ؟    ئەلۋەتتەمۇمكىن ئەمەس! مۇمكىن بولمايلا قالماستىن، يەنە پالچىنىڭ بىشارىتى بۇيىچە تىلەمچىگە ئايلىنىپ قېلىشىمۇ مۇمكىن، ياخشىراق بولدى دىگەندىمۇ يەنىلا ئارانلا كۈن ئۆتكۈزىدىغان نامراتلاردىن بولۇشى مۇمكىن.    ئوخشاشلا بىر تەبئىي شارائىتى ياخشى، كېلىپ چىقىشى پۇلدار بولغان ئادەم (خۇددى ھېكايىدىكى«ئەلىيۇل ئەلا» بولىدۇ دەپ بىشارەت قىلىنغان تىلەمچىگە ئوخشاش) ئەگەر ئۆزىنىڭ تەغدىرىنى ئۆز قولىدا تۇتمىسا، يەنىلا ھېچنىمىگە ئېرىشەلمەيدۇ.    كۆرۈۋېلىشقا بولىدۇكى، ئۆز تەغدىرىگە قارىتا ئوخشىمىغان پوزىتسىيەدە بولۇش - بىر ئادەمنىڭ «نامرات ياكى باي»بولۇشىدىكى « نىشان  كۆرسەتكۈچ» بولۇپ قالىدۇ.    جۇڭگو –چەتئەللەرنىڭ تارىخىغا قارايدىغان بولساق، كۆپ ساندىكى بايلار تۇغۇلۇشىدىنلا باي بولغان ئەمەس، ئۇلارنىڭ كۆپىنچىسى نامرات ئائىلىدىن كېلىپ چىققان، نۇرغۇنلىغان جاپا – مۇشەققەتلەرنى باشتىن كەچۈرگەن، شۇ سەۋەبتىن قۇرۇق قول ئىگىلىك تىكلەپ  نامراتلىقتىن باي بولۇشقا قاراپ يۈزلەنگەن. بۇنىڭ سەۋەبى ئۇلار تەغدىرگە بويسۇنمىغان، تەغدىرنىڭ بويۇنتۇرۇقىدىن قۇتۇلۇپ، ئۆزىنىڭ ئۆز تەغدىرىنىڭ ھەقىقىي خوجايىنى ئىكەنلىكىنى تونۇپ يەتكەن.   بۇلاردىن ئاسىيالىق باي لى جىياچېڭ ناھايىتى ياخشى مىسال بولالايدۇ.    لى جىياچېڭ گۇاڭدۇڭ چاۋجۇ شەھىرىدىكى بىر نامرات ئائىلىدە دۇنياغا كەلگەن، بالىلىق دەۋرى ناھايىتى جاپالىق ئۆتكەن.    11 ياشقاكىرگەن ۋاقتىدا جۇڭگو ئۇرۇش قالايمىقانچىلىقىغا كىرىپ قالغاچقا، ئۇ ئاتا –ئانىسىغا ئەگىشىپ شاڭگاڭغا بېرىپ پاناھلانغان. بىر ئائىلە كىشىلىرى ئائىلە شارائىتى ياخشى بولغان تاغىسىنىڭ جۇاڭجىڭئەندىكى ئۆيىدە تۇرغان. ھالبۇكى ئوزۇن ئۆتمەستىن بەخىتسىزلىك يۈز بېرىپ، لى جىياچېڭنىڭ دادىسى(ئائىلىدىكى بىردىنبىر ئىقتىسادىي تۈۋرۈك) ھەددىدىن زىيادە چارچاپ كەتكەچكە ئۆپكە كېسىلى بىلەن يۇقۇملىنىپ ئالەمدىن ئۆتكەن.    دادىسىنىڭ ئالەمدىن ئۆتۈشى پۈتۈن ئائىلىدىكىلەرنى ناھايىتى ئېغىر ئازاپقا قويغان، بولۇپمۇ لىجىياچېڭنىڭ ئاپىسىغا نىسبەتەن بۇ ناھايىتى ئېغىر زەربە بولۇپ، ئائىلىدىكى بىردىنبىر يۆلەك يوقالغاچقا، كىيىن قانداق تۇرمۇش كەچۈرۈش ئۇلارنى گاڭگىرىتىپ قويغان ئىدى.    بۇ ۋاقىتتا لى جىياچېڭ ھەرگىزمۇ ئائىلىسىدىكى پىشكەللىك تۈپەيلى تەغدىرنىڭ قۇلىغا ئايلانمىغان .بالىلارنىڭ چوڭى بولغان لى جىياچىڭ ئانىسى ۋە ئۈچ ئىنى – سىڭىللىرىنى بېقىش ئۈچۈن باشقىلارغا يۆلىنىۋېلىشنى خالىماي ئوقۇشتىن چېكىنىشنى قارار قىلىپ،ئۆزىگە تايىنىپ پۈتۈن ئائىلىنىڭ ئېغىرچىلىقىنى ئۈستىگە ئالغان.    لى جىياچېڭ دەسلەپتە تاغىسىنىڭ جۇاڭجىڭئەندىكى جوڭنەن سائەت شىركىتىدە چاي قۇيۇپ، يەر سۈپۈرىدىغان شاگىرت بولىدۇ. بۇ يەردە ئۇ كىشىلەرنى قانداق كۈزىتىشنى، پۇرسەتتىن قانداق پايدىلىنىپ ئىش قىلىشنى ئۆگىنىدۇ. ئوزۇن مەزگىل باشقىلارنىڭ قول ئاستىدا تۇرۇشنى خالىمىغان 19 ياشلىق لى جىياچېڭ  بەش خىل مېتال زاۋۇتى ۋە سۇلىياۋ ياساش زاۋۇتىغا كېلىپ مال ساتقۇچى بولىدۇ. كەسپىي نەتىجىسى ياخشى بولغاچقا، ئىككىنچى يىلى زاۋۇتنىڭ  بۆلۈم دىرېكتورلۇقىغا ئۆستۈرۈلىدۇ،ئوزۇن ئۆتمەي شىركەتنىڭ باش دىرېكتورى بولىدۇ.    بۇ مەزگىلدىكى كوچىمۇ – كوچا يۈرۈپ مال سېتىش ھاياتىدا، لى جىياچېڭ تۇرمۇشتىكى قاتمۇ – قات قىيىنچىلىق ۋە ئوڭۇشسىزلىقلارنى يېڭىپ،  سودا بىلىمىنى ئۈزلۈكسىز موللاشتۇرۇپ، ھەر قايسى ساھەلەردىن دوست تۇتۇپ، ئۆزىنىڭ كىيىنكى ئىشلىرى ئۈچۈن پۇختا ئاساس سالىدۇ.    1950 – يىلى جىياچېڭ پۇرسەتنى چىڭ تۇتۇپ،  تىجەپ يىغقان پۇللىرى بىلەن ئۆزىنىڭ تۇنجى زاۋۇتى - «چاڭجاڭ يالتىراق زاۋۇتى» نى قۇرۇپ چىقىدۇ. 1957 – يىلى يالتىراق ماتېرىيال ئىشلەپ چىقىرىشنى باشلاپ، 1964 – يىلىغا كەلگەندە  مىليوندىن ئارتۇق شاڭگاڭ پۇلى پايدا ئالىدۇ. بۇنىڭغا ئەگىشىپ چاڭجاڭ يالتىراق زاۋۇتىمۇ دۇنيادىكى ئەڭ چوڭ يالتىراق ماتېرىيال ئىشلەش بازىسىغا ئايلىنىپ ، لىجىياچېڭمۇ شۇ سەۋەبتىن «يالتىراق پادىشاھى» دىگەن نامغا ئېرىشىدۇ. كىيىن لىجىياچېڭ پۇرسەتنى چىڭ تۇتۇپ يالتىراق ئويۇنچۇق، ئۆي – مۈلۈكچىلىك قاتارلىق ساھەلەرگە كىرىپ، ئاستا – ئاستا «جۇڭگولۇق مۇھاجىر باي» غا ئايلىنىدۇ.   نامرات ئائىلىدىن كېلىپ چىقىش ۋە جاپا – مۇشەققەتلىك كەچۈرمىشلەرگە قارىتا نۇرغۇنلىغان ئىرادىسى ئاجىز كىشىلەر ‹ بۇ پەلەكنىڭ گەردىشى، تەغدىرىمىز شۇنداق پۈتۈلگەن› دەپ قاراپ، ئاسانلا تەسلىم بولىدۇ، ھەمدە بىر ئۆمۈر نامراتلىقتىن قۇتۇلالمايدۇ. لى جىياچېڭ تەغدىرنىڭ ئورۇنلاشتۇرۇشىغا ھەرگىزمۇ بويسۇنمىغان، ھەمدە نامراتلىق دەستىدىن ئاھ چېكىپ ئولتۇرمىغان، ئۇ ھەمىشە نامراتلىقتىن قۇتۇلۇپ باي بولىدىغان ئۇسۇلنى ئىزدەپ، ئاخىرى «ئاسىيادىكى بىرىنچى باي» غا ئايلانغان.    نامراتلار ئۆزىنىڭ تەغدىر تەرىپىدىن كونترول قىلىندىغانلىقىغا ئىشىنىدۇ، شۇ سەۋەبتىن تەغدىرگە بويسۇنۇپ، تەغدىرنىڭ بۇيرۇقىنى ئاڭلايدۇ،ئۆز تەقدىرىنى ئۆزگەرتىش ،ياخشىلاش ئويىدا بولمايدۇ. ئەمما بايلار تەغدىرنىڭ ئۆزى تەرىپىدىن يارىتىلدىغانلىقىغا ،تىرىشسىلا ئۆز تەقدىرىنى ياخشىلىغىلى بولىدىغانلىقىغا ئىشىنىدۇ، شۇڭا ئۇلار تىرىشىپ ئۆز تەغدىرىنى قولىغا ئالىدۇ.    رىئال تۇرمۇشتا لى جىياچېڭغا ئوخشاش تەغدىرنىڭ ئورۇنلاشتۇرۇشىغا بويسۇنمايدىغان، ئۆز تەغدىرىنى قانداق قىلىپ ئۆز قولىغا ئېلىشنى بىلىدىغان بايلار ئاز ئەمەس . مەسىلەن: ياپونيىلىك داڭلىق كارخانىچى سوڭشىيا شىڭجىجۇ، «رۇجىيا» نىڭ قۇرغۇچىسى لىچى، كورىيە«زامانىۋىي» ماشىنا زاۋۇتىنىڭ قۇرغۇچىسى جېڭ جوۋيوڭ قاتارلىقلار شۇلارنىڭ جۈملىسىدىندۇر. ئۇلارنىڭ ئىش – ئىزلىرى بىزگە بىر ئورتاق قائىدىنى ئېيتىپ بېرىدۇ: ئىنسان ئۆز تەغدىرىدىكى قىيىن مەسىلىلەرنى پەقەت ئۆزىلا ھەل قىلىدۇ.ئۆزىنىڭ ھورۇن،بوشاڭلىقىنى تەقدىرگە دۆڭگەپ قويماي،     تەغدىرنىڭ بوغۇزىدىن چىڭ تۇتۇپ، ئۆزىنىڭ نامراتلىقتىن قۇتۇلۇپ باي بولالايدىغانلىقىغا ئىزچىل ئىشەنگەندىلا، ھەمدە تىرىشىپ كۆرەش قىلغاندىلا بايلىق بىزگە بارا – بارا يېقىنلاپ كېلىدۇ. بايلىقنىڭ بايانى:    مەيلى نامراتلار ياكى بايلار بولسۇن، ھەر بىر ئادەمنىڭ تەغدىرى ئۆز قولىدا.ئوخشىمايدىغان يىرى، نامراتلار تەغدىرگە بويسۇنۇپ، ئۇنىڭ ئورۇنلاشتۇرۇشىدىكى ئىشلارنى كۆرۈشنى خالايدۇ؛ بايلار تەغدىرنى قەدىرلەشنى، ئۇنى تۇتۇشنى، ھەمدە تەغدىر بىلەن بولغان كۆرەشتىن قانداق قىلىپ نەتىجە قازىنىشنى، شۇ ئارقىلىق بايلىققا ئېرىشىشنى بىلىدۇ.

WWW.UYHQT.COM

	1-باپ ئۈچۈنچى پارگىراف ***3. نامراتلار شارائىتتىن ئاغرىنىدۇ، بايلار شارائىتنى ئۆزگەرتىدۇ     كەسپىي ئارتىس بولمىغان ئادەتتىكى كىشىلەر نومۇر كۆرسىتىدىغان مەلۇم بىر پروگراممىدا مۇنداق بىر كۆرۈنۈش بار:    بىر خىزمەت ئىزدىگۈچىنىڭ ئىپادىسى ناچار بولغاچقا، مەسئۇلنىڭ ئەيىبلىشىگە ئۇچرايدۇ. بۇ خىزمەت ئىزدىگۈچى چۈشەندۈرۈپ: «ئەگەر سىلەر مېنى تۈر دىرېكتورى قىلساڭلار، مەن جەزمەن خىزمەتنى ياخشى قىلالايمەن.» دەيدۇ. مەسئۇل ئادەم پەرۋاسىز جاۋاب بېرىپ: «ھېچكىم سىزگە بۇ ئورۇننى بەرمەيدۇ، سىزگە لازىم بولسا ئۆزىڭىز بېرىپ ئېلىڭ.» دەيدۇ.    تۇرمۇشتا بىز دائىم مۇنداق كۆرۈنۈشكە دۇچ كېلىمىز، نۇرغۇنلىغان كىشىلەر ئۆزىنىڭ ئوڭۇشسىزلىققا ئۇچراش، نامرات بولۇش سەۋەبىنى شارائىتقا دۆڭگەيدۇ. باشقىلارنىڭ ئۆزىگە كەڭ قورساق بولمىغانلىقىدىن رەنجىپ،  جەمئىيەتنىڭ ئادىل ئەمەسلىكىدىن ئاغرىنىدۇ. دائىم شىركىتىنىڭ تىجارىتىنىڭ ناچارلىقىنى تەكىتلەپ، ھەتتا ئۆزىنىڭ بىرپۇلدار دادىسى يوقلۇقىدىن ئەپسۇسلىنىدۇ. ئومۇملاشتۇرغاندا ئۆزىنىڭ بارلىق بەختسىزلىكىنى شارائىتقا دۆڭگەپ، سىرتقى مۇھىتتىن سەۋەبىنى ئىزدەيدۇ، ئەزەلدىن سەۋەبنى ئۆزىدىن ئىزدەپ باقمايدۇ.    ئەكسىچە،ياپونيىدىكى داڭلىق‹ كاشىئو ياپونچە كومپيۇتېر جەمئىيىتى ›نىڭ قۇرغۇچىسى جىيەنۋېي جوڭشىيوڭ بۇنىڭغا قارشى مۇنداق باھا بەرگەن.    بىر قېتىم «چاۋرى ئاخباراتى» نىڭ مۇخبېرى جىيەنۋېي جوڭشىيوڭدىن «مۇۋەپپەقىيەتكە ئېرىشىشڭىزنىڭ سىرى نەدە؟» دەپ سورىغاندا، ئۇ قەتئىيلىك بىلەن: «ئەلۋەتتە نامراتلىق! مەن شۇنى ھېس قىلدىمكى، نامراتلىق ئاتا – ئانام قالدۇرۇپ كەتكەن ئەڭ چوڭ بايلىق. چۈنكى نامراتلىق كىشىلەرگە كۆرەش قىلىشنى، قۇرۇق قول ئىگىلىك تىكلەشنى ئۆگىتىدۇ،نامراتلىقنىڭ ئەڭ ئاخىرقى نىشانى بولسا نامراتلىقتىن قۇتۇلۇش! مەن ئىلگىرى دۇرۇس تۇرمۇش كەچۈرۈشنى، دۇرۇس نەرسىلەردىن يىيىشنى دائىم ئويلايىتتىم...» دىگەن.    جىيەنۋېي جوڭشىيوڭ ھېچنىمىسى يوق قۇرۇق قول ئىش باشلاپ ئۆزىنىڭ شىركىتىنى قۇرۇپ چىققان،ھەمدە شىركىتىنى توكيو ئاكسىيە بازىرىغا چىققان تۇنجى شىركەتكە ئايلاندۇرغان. ئۇ توختىماستىن شارائىتتىن زارلىنىشنى تاشلاپ، ئۆزىنى ئۆزگەرتكەن،مۇھىتقا ماسلىشىپ، كۈچلۈك بولۇش ئۈچۈن تىرىشقان، ئاخىرى نامراتلىقتىن قۇتۇلۇپ بايلار قاتارىغا ئۆتكەن.    بۇ نامراتلار ۋە بايلارنىڭ پەرقى، نامراتلار دائىم ئاغرىنىدۇ، دائىم ئۆزىنىڭ ناچار شارائىتىدا توختاپ قېلىپ، بۇ ناچار شارائىتنى ئۆزگەرتىشنى ئويلىمايدۇ. ئەگەر جىيەنۋېي جوڭشىيوڭ ئىزچىل ئۆزىنىڭ كىلىپ چىقىشىنىڭ ياخشى ئەمەسلىكىدىن قاخشىغان، شارائىتتىن زارلانغان بولسا، شۇنداقلا  ئەمەلىي ھەرىكەت قوللانماي، كۈندە غايە بىلەن رىئاللىق ئوتتۇرىسىدىكى چوڭ پەرق ئارىسىدا خام – خىيال سۈرگەن بولسا، ئۇنداقتا قانداقمۇ باي بولالىسۇن، قانداقمۇ ھازىرقى راھەت تۇرمۇشقا ئېرىشەلىسۇن؟    توختىماستىن مۇھىتتىن ئاغرىنغاندىن كۆرە، ئۆزىنى مۇھىتقا ماسلاشتۇرۇپ ئۆزگەرتكەن ياخشى.كۆپىنچە ۋاقىتلاردا، سىز زارلىنىۋاتقان بولسىڭىز، ئۇنداقتا ئوخشىمىغان نۇقتىدىن قاراپ بېقىڭ؛ شارائىتنىڭ ناچارلىقىدىن ئاغرىنىشنىڭ سەۋەبى بەلكى سىزنىڭ شۇ شارائىتتىكى   پىسخىكىڭىز ياخشى ئەمەس بولۇشى مۇمكىن؛ باشقىلارنىڭ قاتماللىقىدىن ئاغرىنىۋاتقىنىمىزدا، ئېھتىمال ئۆزىمىز بەك كەڭ قورساق بولالمىغان بولىشىمىز مۇمكىن؛شىركەت تۈزۈمىنىڭ ناھايىتى قاتتىق ئىكەنلىكىدىن ئاغرىنىۋاتقىنىمىزدا، ئېھتىمال ئۆزىمىز خىزمەتنى ياخشى قىلالمىغان بولۇشىمىز مۇمكىن؛ بالىلارنىڭ گەپ ئاڭلىماي باشقۇرۇشنىڭ تەسلىشىپ كەتكەنلىكىدىن ئاغرىنغان ۋاقتىمىزدا، نېمىشقا  سەۋەبنى ئۆزىمىزدىن ئىزدەپ باقمايمىز؟    نوڭ ئەيچىن  ۋەنشىلى گورۇھىنىڭ باش مۇدىرى، «فوربىس» ژورنىلى ئېلان قىلغان جۇڭگولۇق بايلارنىڭ تىزىملىكىدە ئۇنىڭمۇ ئىسمى بار. جۇروڭجى زۇڭلى جېجىياڭنى كۆزدىن كەچۈرگەندە ئۇنىڭ قولىنى سىقىپ تۇرۇپ: «سىز بىر ئەڭگۈشتەر! سىزنىڭ ئىسمىڭىزنى نوڭ ئەيباۋ ( باۋ-گۈھەر مەنىسىدە ) دەپ چاقىرىش كېرەك ئىكەن.» دىگەن.    1945 –يىلىدىكى قەھرىتان سوغۇقتا  خاڭجۇ شەھرىنىڭ سىرتىدىكى بىر دېھقان ئائىلىسىدە بىر قىز دۇنياغا كەلدى، ئۇ دەل نوڭ ئەيچىن ئىدى. ئۇ ۋاقىتلاردا دېھقان ئائىلىلىرىنىڭ تۇرمۇشى ناھايىتى جاپالىق بولۇپ، نوڭ ئەيچىن كىچىكىدىن باشلاپلا ئائىلىدىكىلەرگە ياردەملىشىپ يەر تېرىپ، ئوت ئوتاپ، تۇرمۇشنىڭ ئاچچىق – چۈچۈكلىرىنى تېتىغان. دەل كەنىتتىكى مۇشۇنداق جاپالىق تۇرمۇش ۋە قالاقلىق ئۇنىڭغا جاپانىڭ خاتىرىسىنى قالدۇرغان، ھەمدە ئۇنىڭدا چوقۇم باي بولىمەن دەيدىغان كۈچلۈك ئىرادە پەيدا قىلغان.    1964 – يىلى19 ياشلىق نوڭ ئەيچىن چوڭ ئەترەتنىڭ كادىرىغا ئايلانغان، خىزمەتتىكى نەتىجىسى ئالاھىدە بولغاچقا پارتىيە ئەزاسى بولغان.    1975 – يىلى ئۇ تەۋەككۈل قىلىپ خاڭجۇ لەنچاۋ يىپەك زاۋۇتىنى ئۆتكۈزىۋالغان. ئەينى ۋاقىتتا بۇ زاۋۇت تاقىلىپ قېلىش گىردابىغا بېرىپ قالغان بولۇپ، زاۋۇتتا پەقەت 17دانە كونا تىپتىكى توقۇمىچىلىق ئۈسكىنىسى، 22 نەپەرپالتا-گۈرجەكلىرىنى يېڭىلا تاشلىغان ئىشچى، 40 مىڭ يۈەن مەبلەغ ۋە 100 مىڭ يۈەندىن ئارتۇق قەرز بار ئىدى.    ھالبۇكى،نوڭ ئەيچىن بۇنداق قىيىن شارائىتتىمۇ ئارقىغا چىكىنمەي ئۆزىنىڭ بايلارغا ئايلىنىشتىن ئىبارەت كۈچلۈك روھىنى جارى قىلدۇرۇپ، ئىگىلىك تىكلەش ھاياتىنى باشلىغان.    ئۇ ئىشچىلارنى باشلاپ ئىلغار زاۋۇتلارغا بېرىپ زىيارەت قىلىپ ھۈنەر ئۆگەنگەن؛‹جەڭچىلەرنى تەكلىپ قىلىش ئۇسۇلى›نى قوللىنىپ، دۆلەت ئىگىلىكىدىكى كارخانىلاردىن دەم ئېلىشقا چىققان كادىرلارنى ۋە يەرلىكتىكى توقۇمىچىلىق تېخنىكىسى ھەمدە باشقۇرۇش ئىقتىدارى ياخشى بولغان كىشىلەرنى زاۋۇتقا كېلىشكە تەكلىپ قىلغان؛ ئۇ يەنە ئىشچىلار بىلەن مۈرىنى – مۈرىگە تىرەپ بىرلىكتە تىرىشچانلىق كۆرسىتىپ ئىشلىگەن. مەملىكەتنىڭ ھەرقايسى جايلىرىغا بېرىپ خېرىدارلارنىڭ مەسلىھەتىنى ئاڭلىغان، ئۆزلىرىنىڭ مەھسۇلاتلىرىنى تونۇشتۇرۇپ ساتقان.    ئۇ ۋاقىتتا زاۋۇت يىپەك يوتقان تېشى ئىشلەپ چىقىرىدىغان بولۇپ، نوڭ ئەيچىن زاۋۇتتىكى خىزمەتچىلەر بىلەن بىرلىكتە دۆلەتنىڭ ھەر قايسى جايلىرىغا بېرىپ يوتقان تاشلىرىنى ساتقان. بۇ جەرياندا پويىزدا ئورۇن بولمىغاندا، تاختاينىڭ ئۈستىدە ئولتۇرۇپ، پويىزدىن چۈشۈپلا ھەر قايسى جايلارغا بېرىپ مەھسۇلاتلىرىنى سېتىشقا كىرىشكەن. كەچلىرى، بىر كېچىلىكى بەش مو بولغان مۇنچىخانىلاردىكى ئوپچە ئورۇنلاردا ياتقان.    1978 – يىلى ئۇ ئاخىرى ئۆزىنىڭ « تۇنجى پايدىسى» نى تاپقان. ئارقىدىنلا ئۇ ئەينى ۋاقىتتىكى بېيجىڭنىڭ دوڭئەن سودا مەيدانىدا سېتىش پۇكىيى تەسىس قىلغان. شۇنىڭدىن باشلاپ ئۇنىڭ يىپەك مەھسۇلاتلىرىنىڭ داڭقى چىقىپ، شۇ يىلىلا 60 مىڭ يۈەن تاپقان، بۇ ئەينى ۋاقىتتا ئۇنىڭغا نىسبەتەن ئاز سان ئەمەس ئىدى.    20 –ئەسىرنىڭ 80 – يىللىرىدا، يىپەكچىلىك دۆلەتنىڭ ھەرقايسى جايلىرىدا ناھايىتى تىز تەرەققىي قىلىپ، تەمىنلەش ئېھتىياجنى قاندۇرالمىغان چاغدا، نوڭ ئەيچىن بۇنىڭدىكى يوشۇرۇن خەتەرنى كۆرۈپ يىتىپ، 30 مىڭ يۈەنگە يېقىن پۇل خەجلەپ تېخنىكا يېڭىلايدۇ.ھەقىقەتەن كىيىن بازاردىكى كۈچلۈكلەر ئاجىزلارنى شاللايدىغان ۋاقىت كەلگەندە،نۇرغۇنلىغان كارخانىلار ۋەيران بولدى، تاقىلىپ قالدى، يىپەكچىلىك كەسپىمۇ پەسكويغا چۈشۈپ قالدى، ئەمما نوڭ ئەيچىننىڭ «ۋەنشىلى» شىركىتى ھېچقانداق تەسىرگە ئۇچرىمىدى؛ ئەكسىچە ۋەنشىلىدە ئىشلەنگەن ھەقىقي يىپەك كىيىملەر 20 نەچچە دۆلەت ۋەرايونغا سېتىلدى.    ئارقىدىنلا نوڭ ئەيچىن يەنە بىر قەدەم ئىلگىرىلىگەن ھالدا كۆزىنى ئاچتى: ئادەم ئەۋەتىپ كىيىم پادىشاھلىقى بولغان فرانسىيەنى تەكشۈردى، ھەمدە بىر داڭلىق كارخانا بىلەن ھەمكارلىشىشنى يولغا قويۇپ، قارشى تەرەپنىڭ ماركىسىدىن پايدىلىنىپ كىيىم ئىشلەپچىقاردى.ۋە ماس قەدەمدە «ۋەنشىلى» ئايالچە كىيىم ماركىسىنى يارىتىپ، 2000 – يىلىغاكەلگەندە «جۇڭگودىكى ئەڭ مودا ماركا» دىگەن شەرەپكە ئېرىشتى.    بۈگۈنكى كۈنگە كەلگەندە نوڭ ئەيچىننىڭ باشقۇرۇشىدىكى جېجىياڭ ۋەنشىلى گورۇھى جۇڭگودىكى ئەڭ زامانىۋىلاشقان يىپەك توقۇمىچىلىقى، بوياش، تىكىش ۋە كىيىم تىكىش بىر گەۋدە قىلىنغان زاۋۇتقا ئايلىنىپ، 21 نەپەر جۇڭگو – چەتئەل شېرىكچىلىكىدىكى كارخانا،پۈتۈن مەبلەغلىك كارخانا ۋە پاي كونترول قىلىش كارخانىلىرىغا ئىگە بولۇپ، كىيىم –كىچەك، يىپەكچىلىك، كىيىم تىكىش، بىئولوگىيە تېخنىكىسى ۋە ئۆي – مۈلۈك قاتارلىق بەش كەسىپكە قاراپ تەرەققىي قىلدى، ھەمدە شاڭگاڭ ۋە ئامېرىكىدا تارماق شىركەت تەسىس قىلدى. ئۇنىڭ مەھسۇلاتلىرى پۈتۈن مەملىكەتتە سېتىلىپلا قالماستىن، يەنەئامېرىكا، ياپونىيە ۋە ئىتالىيە قاتارلىق دۆلەتلەرگە ئېكىسپورت قىلىنىپ، ھەر يىلدا%20 لىك ئېشىش سۈرئىتىنى ساقلىدى.    25 يىللىق كۆرەش ئارقىلىق نوڭ ئەيچىن «ۋەنشىلى» نى باشلاپ زور غەلبىگە ئېرىشتى. ئۇ ‹شارائىتتىن زارلانماي ئۆزى شارائىت يارتىش،ئۆز تەقدىرىنى ئۆزگەرتىش ئۈچۈن كۈرەش قىلىش› ئىدىيىسىنىڭ تۈرۈتكىسىدە ئارانلا 20 نەچچە نەپەر ئادەم بولغان، لىڭىشىپ قالغان يېزا – كەنت كارخانىسىنى جۇڭگودا بارماق بىلەن سانىغىلى بولىدىغان «يىپەك پادىشاھى» غا ئايلاندۇردى.    نوڭ ئەيچىن  ئاجىز بىر ئايال بولۇش سۈپىتى بىلەن جاپالىق شارائىتتا چوڭ بولغان، ھەمدە بىر تاقىلىپ قالايلا دىگەن كىچىك زاۋۇتنى ئۆتكۈزۋالغان. بىراق شۇنچە قىيىن شارائىتتىمۇ ئۇ زارلانمىغان، تەغدىرگە تەن بەرمىگەن، ئەكسىچە ئۇ تىرىشىپ ئۆزىنى ئۆزگەرتىپ، شۇ ئارقىلىق شارائىتنى ئۆزگەرتكەن. «كۆڭۈل قويغان ئادەمگە، قىيىن ئىش يوق ئالەمدە.»دىگەندەك، ئۇنىڭ تىرىشچانلىقى ئارقىلىق، ئۇ ئاخىرى «فوربىس» ژورنىلىنىڭ بايلار تىزىملىكىگە چىقىپ، كىشىلەر ھەۋەس قىلىدىغان پۇلدارغا ئايلانغان! ئۇنىڭ بۇنداق نەتىجىلەرگە ئېرىشىشىنى ئۇنىڭ رىقابەتنى قوبۇل قىلىشقا جۈرئەت قىلالايدىغان،تۇرمۇشقا ئاكتىپ يۈزلىنىدىغان كىشىلىك ھايات پوزىتسىيىسىدىن ئايرىپ قارىغىلى بولمايدۇ.    فرانكىلىن ئىلگىرى: «نامراتلىق قورقۇنچلۇق ئەمەس، قورقۇنچلۇقى نامراتلىقنى تەغدىرنىڭ ئورۇنلاشتۇرۇشى دەپ قاراش ياكى قېرىغىچە نامرات ئۆتۈشتىن ئىبارەت ئوينىڭ بولۇشى.»دىگەن. نوڭ ئەيچىننىڭ غەلبىسى دەل بۇ بىر جۈملە سۆزگە بېرىلگەن ئەڭ ياخشى چۈشەندۈرۈش.    دۇنيادا مۇكەممەل شارائىت ۋە مۇھىت بولمايدۇ، ئۇلار پەقەت نىسپىي بولىدۇ، كىشىلەر تامامەن ئۆزىنىڭ كۈچىگە تايىنىپ ئۇلارنى ئۆزگەرتەلەيدۇ؛ دۇنيادا ھەقىقىي مەنىدىكى ياخشى –ياماننى تاپقىلى بولمايدۇ، ياخشى – يامان ئوتتۇرىسىدا بىر قەۋەت چوڭ ھەجىملىك پەردە بولىدۇ، مەسىلە سىزنىڭ ئۇنىڭغا قانداق قارىشىڭىزدا. بىز بىرلىكتە تۆۋەندىكى يۈرەكنى لەرزىگە سالىدىغان شېئىرنى يادلايلى: مەن ھاۋارايىنى ئۆزگەرتەلمەيمەن، ئەمما كەيپىياتىمنى ئۆزگەرتەلەيمەن؛ مەن تەقى – تۇرقۇمنى ئۆزگەرتەلمەيمەن، ئەمما كۈلۈمسىرىيەلەيمەن؛ مەن ئەتىنى مۆلچەرلىيەلمەيمەن، ئەمما بۈگۈندىن ياخشى پايدىلىنالايمەن؛ مەن ئۆتمۈشنى ئۆزگەرتەلمەيمەن، بىراق كەلگۈسىنى ئۆزگەرتەلەيمەن؛ مەن باشقىلارنى ئۆزگەرتەلمەيمەن، ئەمما ئۆزۈمنى ئۆزگەرتەلەيمەن؛ مەن ھەممە ئىشنى كۆڭۈلدىكىدەك قىلالمايمەن، ئەمما مەن ھەممە ئىشتا تىرىشىمەن؛    مەيلى قانداق ناچار مۇھىتقا دۇچ كېلىڭ، ئۆزىڭىزنى ئۆزگەرتىش ئارقىلىق باشقىلارنىڭ سىزگە بولغان كۆز – قارىشىنى ئۆزگەرتەلەيسىز، يەنى قانچىلىك قىيىن مۇھىت بولسىمۇ، ئۆزىڭىزگە پايدىلىق مۇھىتقا  ئۆزگەرتەلەيسىز.    تەغدىرىمىز ئۆز قولىمىزدا، باشقىلاردىن ئاغرىنغاندىن كۆرە، پۈتۈن كۈچىمىز بىلەن تىرىشىشىمىز كېرەك. ئېھتىمال بىزدە ھازىر پۇل يوق، كۈچلۈك كارخانا يوق، ياخشى شارائىتمۇ يوق .ئەمما بىز بىر ئەستايىدىل يۈرەكنى ئۆزىمىزگە ھەمراھ قىلىپ بايلارنىڭ مۇۋەپپەقىيەت تەجىرىبىسىنى ئۆگىنىشىمىز، ئۇلارنىڭ تەپەككۇر شەكلىنى ئۆگىنىشىمىز، شۇ ئارقىلىق ئۆزىمىزنى ئۆزگەرتىشنى، ئۆزىمىزگە جەڭ ئېلان قىلىشنى، ئۆزىمىزنىڭ جەمئىيەتكە ماسلىشىش ئىقتىدارىمىزنى ۋە باي بولۇش ئىقتىدارىمىزنى يۇقىرى كۆتۈرۈشنى ئۆگىنىۋېلىشىمىز كېرەك. پەقەت ئۆزىنى ئۆزگەرتكەندە، جەمئىيەتكە ماسلاشقاندا، ئۆزىنىڭ ئىقتىدارىنى يۇقىرى كۆتۈرگەندە، پايدىلىنىشقا بولىدىغان بارلىق ئىجتىمائىي بايلىقلاردىن پايدىلانغاندىلا  ئاندىن ئۆزىمىزنىڭ بايلىق چۈشىنى ئەمەلگە ئاشۇرالايمىز. بايلىقنىڭ بايانى:   غالبىيەتچىلەر ۋاز كەچمەيلا قالماستىن، ھەرگىز زارلانمايدۇ. مەيلى قانداق قىيىن مۇھىتقا دۇچ كىلىشتىن قەتئىينەزەر، ئادەم چوقۇم ئاكتىپلىق بىلەن يۇقىرى ئۆرلەيدىغان پوزىتسىيەدە بۇ خىل مۇھىتقا يۈزلىنىشى، بارلىق كۈچى بىلەن ھەر بىر ئىشنى ياخشى قىلىشى كېرەك.تەغدىرىمىز ئۆزىمىزنىڭ قولىدا، باشقىلاردىن ئاغرىنغاندىن كۆرە، پۈتۈن كۈچىمىزبىلەن تىرىشىشىمىز لازىم.

WWW.UYHQT.COM

	بىرىنچى باب تۆتىنچى پارگىراف ***4.نامراتلار تىز نەتىجە قازىنىشقا ئالدىرايدۇ، بايلار ئىشلارنى ناھايىتى تەرتىپلىك ئورۇنلاشتۇرىدۇ    كۆپچىلىكنىڭ ھەممىسى «مايسىنى تارتىپ ئۆستۈرۈش» دىگەن ھىكايىنى ئاڭلىغان:    سۇڭ سۇلالىسى دەۋرىدە بىر ئادەم ئۆزى تېرىغان زىرائەتلەرنىڭ ناھايىتى ئاستا ئۆسكەنلىكىدىن ئاغرىنىدىكەن، شۇنداق قىلىپ ئۇ مايسىلارنى بىر – بىرلەپ تارتىپ ئىگىزلىتىپتۇ. ئىش تۈگىگەندىن  كىيىن، ئۇ  ئۆيىگە قايتىپ خۇشاللىق بىلەن: «بۈگۈن مەن ناھايىتى ھېرىپ كەتكەن بولساممۇ ، بىراق زىرائەتلەرنىڭ ئۆسۈشىگە ياردەملەشتىم!» دەپتۇ. ئۇنىڭ گىپىنى ئاڭلىغان ئوغلى ئالدىرىغىنىچە ئېتىزلىققا بېرىپتۇ، ئەمما مايسىلارنىڭ ھەممىسى قۇرۇپ قالغان بولۇپ، ئۇ ناھايىتى كېچىككەن ئىدى.   سۇڭ سۇلالىسى دەۋرىدىكى بۇ ئادەمنىڭ ئەخمىقانە ھەرىكىتىنى مازاق قىلىش بىلەن بىر ۋاقىتتا،بىز چوقۇم دىققىتىمىزنى رىئال تۇرمۇشقا مەركەزلەشتۈرۈپ ئەتراپىمىزدىكىلەرنى، ئۆزىمىزنى ئەستايىدىل كۈزىتىپ بېقىشىمىز لازىم، بۇنداق خاتالىقنى بىزمۇ سادىر قىلدۇقمۇ-قانداق؟   تېز سۈرئەتتە ئۈنۈمگە  ئېرىشىمەن دەپ،شەيئىلەرنىڭ ئۆزىدىكى ئوبيېكتىپ قانۇنىيەتكە ئەمەل قىلماي، ئالدىراقسانلىق قىلغاندا، ئەكسىچە ئەھۋال بارغانسىرى ناچارلىشىپ كېتىدۇ.    بولۇپمۇ باي بولۇشنى قوغلىشىۋاتقان ۋاقىتتا، نۇرغۇن كىشىلەر بىر كېچىدىلا باي بولۇشنى ئويلايدۇ. ئۇلار غەلبىگە تىزراق يېقىنلىشىشنى، نامراتلىقتىن تېزراق قۇتۇلۇشنى ئويلايدۇ –دە، تەخىرسىزلىك بىلەن ئۆزىنىڭ ئازغىنە جۇغلانما پۇللىرىنى لاتارىيە بېلىتى سېتىۋېلىشقا، فوند ئېلىشقا سەرپ قىلىپ، پۈتۈن دىققىتىنى ،ئارزۇ-ئۈمۈدىنى مۇشۇ ئىشقا قارىتىدۇ  ھەمدە بۇ ئىشلارنىڭ ھازىرقى ھالەتنى تېزراق ئۆزگەرتىپ، ئۆزىنى بايلىق يولىغا باشلاپ مېڭىشىنى ئۈمىد قىلىدۇ.    ھالبۇكى خام خيال يەنىلا خام خىيال. بۇ خىلدىكى پۇرسەت پەرەسلىك قىلىپ باي بولۇشنى ئويلايدىغانلار يوق ئەمەس، ئەمما بۇنداق باي بولۇش خۇددى دېڭىزدىن يىڭنە ئىزدىگەندەك ئىش بولۇپ،ئامىتى كېلىپ قالغان كىشىلەرلا يولۇقۇپ قالىدۇ.    شۇنىڭ ئۈچۈن بۇنداق كىشىلەر يەنىلا نامراتلارنىڭ قاتارىدا بىر ئىزىدا چۈگىلەيدۇ، داۋاملىق نامرات تۇرمۇش كەچۈرىدۇ، ھەتتا بەزى كىشىلەر ئۆزىنىڭ ناھايىتى تىز نەتىجە قازىنىشى ئۈچۈن ئېغىر بەدەللەرنى تۆلەپ، پۈتۈنلەي ۋەيران بولىدۇ.    لىيۇ  فامىلىلىك بىرسى بولۇپ باي بولۇشقا ناھايىتى ئالدىرايدىكەن .ئۇ ئەتراپىدىكى كىشىلەرنىڭ سودا قىلىپ بېيىغانلىقىنى كۆرۈپ زادىلا ئولتۇرالماي قاپتۇ. ھەم شۇ بايلىق ۋەس-ۋەسىسى بىلەن نەچچە ئون يىلدىن بېرى جۇغلىغان بارلىق پۇلىنى سودىغا دەسمىي قىپتۇ.    ئەينى ۋاقىتتا يەككە تىجارەت خاراكتېرىدىكى يولۇچى توشۇش ناھايىتى ئەۋج ئالغان ئىكەن،  شۇڭا ئۇ بۇ تۈرگە مەبلەغ سېلىشنى قارار قىپتۇ، ھەم بىر بولكىۋاي ماشىنا سېتىۋېلىپ يولۇچى توشۇشقا باشلاپتۇ. ئەمما ئائىلىسىدىكىلەر شوپۇرلۇقنى بىلمىگەچكە، ئۇ قىسقا ۋاقىتتا كۆپ پايدىغا ئىرىشىش، چىقىمنى تىجەش ئۈچۈن، ئوغلىنى شوپۇرلۇقنى ئۆگۈنىشكە بېرىپتۇ. ئوغلى ئۆگىنىپ يېرىم يىل بۇلا-بولمايلا، ئۇ ئوغلىنى ماشىنا ھەيدەشكە دەۋەت قىپتۇ. ھالبۇكى ئالدىراقسانلىقتىن ياخشى نەتىجە چىقماپتۇ .ئوغلى شوپۇرلۇق تېخنىكىسىنى تولۇق ئىگەللىمىگەچكە، بىرىنچى كۈنىلا بەختكەقارشى قاتناش ۋەقەسى يۈز بېرىپتۇ.    بولكىۋاي ماشىنا يولدا بىر ياشانغان كىشىنى سوقۇپ قويۇپتۇ، بەختكە يارىشا ۋاقتىدا دوختۇرخانىغا ئېلىپ بېرىلغاچقا ئۇ كىشى ھايات قاپتۇ. بىراق بۇنىڭ بىلەن نەچچە تۈمەنلىك داۋالىنىش خىراجىتى سەرپ بولۇپ، ئەمدىلا تىجارەت باشلىغان لىيۇ ئەپەندىمنى كۆپلەپ چىقىمدار قىپتۇ. ئۇ ناھايىتى تىت-تىت بولۇپ ، تارتقان چىقىمنى بالدۇرراق ئەسلىگە كەلتۈرۈش ئۈچۈن، پۈتۈن ئائىلىسىدىكىلەرنىڭ قارشى تۇرۇشىغا قارىماي چوڭ يۈك ئاپتوموبىلى سېتىۋېلىپ، يۈك توشۇش ئارقىلىق ئەھۋالىنى ئۆزگەرتمەكچى بوپتۇ.    كۆپرەك پۇل تېپىپ تىزراق پايدا كۆرۈش ئۈچۈن، لىيۇ ئەپەندى كېچە- كۈندۈز  يۈك تۇشۇپتۇ.ماشىنا كېچە- كۈندۈز ماڭغاچقا ھېچقانداق بىكار ۋاقتى يوق ئىكەن، ئانچە – مۇنچە كىچىك چاتاق چىقسىمۇ رېمونىتقا ئېلىپ بارمايدىكەن، نەتىجىدە بىر ئايغا يەتمەستىنلا يەنە بەختكە قارشى ماشىنا ھادىسىسى يۈز بېرىپتۇ.    تېخىمۇ ئېچىنىشلىق بولغىنى، لىيۇ ئەپەندىم ئەينى ۋاقىتتا ماشىنا سېتىۋالغاندا كۆڭلى ئارامىدا  بولمىغاچقا، ماشنىغا سۇغۇرتىمۇ سېتىۋالمىغان ئىكەن. نەتىجىدە ماشىناھادىسىسى چىققاندا تېخىمۇ نەس بېسىپ 100 مىڭ يۈەنلىك تۆلەمنى ئۆزى ئۈستىگە ئاپتۇ.    بۇنداق ئىشلار بىلەن ئىككى يىل ئۆتۈپ، لىيۇ ئەپەندىم سودا قىلىش ئارقىلىق پۇل تاپالمايلا قالماستىن، نەچچە ئون يىلدىن بۇيان جۇغلىغان پۇللىرىنى پاكپاكىز تۈگىتىپتۇ، ھەمدە بىر مۇنچە قەرزگە بوغۇلۇپ قاپتۇ.    لىيۇ ئەپەندىمنىڭ باي بولۇشتىن ئىبارەت خىيالىنىڭ ئەيىبلىگىدەك يېرى يوق، بىراق  بايلىق توپلاش جەريانىدا، ئۇ نەتىجە قازىنىشقا ، پايدا ئېلىشقا ئالدىرىغان. (ئوغلىنى تىزراق ماشىنا ھەيدەشكە ھەيدەكچىلىك قىلىش؛ يۈك ماشىنىسىداكېچىنى كۈندۈزگە ئۇلاپ مال توشۇش، كاشىلا كۆرۈلسىمۇ ئوڭشاتماسلىق؛ ماشىنىنىڭ سۇغۇرتا پۇلىنى تاپشۇرۇشنى ئۇنتۇپ قېلىش قاتارلىقلارنىڭ ھەممىسى بۇ نۇقتىنى ئەكىسئەتتۈرۈپ بېرىدۇ)، نەتىجىدە رىئاللىق بىلەن ئارزۇ توغرا كەلمەي، بايلىققا ئېرىشەلمەيلا قالماستىن، يەنە نۇرغۇن زىيان تارتقان، ھەتتا قەرزگە بوغۇلغان.  ئاخىرىدا لىيۇ ئەپەندى ئۆزىنىڭ ئالدىراقسانلىغى تۈپەيلى ئېچىنىشلىق بەدەل تۆلىگەن.    بىزدە «ئالدىرىغان ئاكام يولدا قالار.»دىگەن ھېكمەت بار. ئەگەر بىردەملىك ئالدىراقسانلىق سەۋەبىدىن قىزىق تاماقنى ئالدىراپ يىگەندە، تاماقنىڭ  تەمىنى تېتىيالمايلا قالماستىن يەنە ئېغىزىنى كۆيدۈرۋېلىپ، داۋاملىق مەززىلىك تەملەردىن ھوزۇرلىنىش ئىشتىياقىغا تەسىر يېتىدۇ. بۇ ھال مۇنداق بىر قائىدىنى ئىپادىلەيدۇ: ئىش قىلغاندا تىز نەتىجە قازىنىشقا ئالدىرىغاندا چوقۇم بىھۇدە بەدەل تۆلەشكە توغرا كېلىدۇ.    بۇ نۇقتىدا بايلارنىڭ كۆز – قارشى تامامەن بىردەك. ئۇلار سەدىچىن سېپىلىنىڭ بىر كۈندىلا پۈتۈپ ھازىرقىدەك ھالەتكە كىلىپ قالمىغانلىقىنى بىلىدۇ. خۇددى شۇنىڭغا ئوخشاش كۆپلىگەن بايلىقنى بىر كېچىدىلا تېپىش مۇمكىن ئەمەس. پەقەت ئاز-ئازدىن ،قانۇنىيەتلىك ھالدا بايلىق جۇغلاشقا ئەھمىيەت بېرىپ، ئىشلارنى تەرتىپلىك ئورۇنلاشتۇرغاندا، بايلىق بارا – بارا جۇغلىنىپ، ئاندىن ئاخىرقى غەلبىنى قولغا كەلتۈرگىلى بولىدۇ.    گۇاڭدوڭ جۇڭشەندىكى شېڭيالۈن كۈندىلىك تۇرمۇش بويۇملىرىنى ياساش چەكلىك شىركىتىنىڭ باش مۇدىرى لىياۋ بوچىياڭ 1982 – يىلىدىن باشلاپ ئىگىلىك تىكلەشنى باشلىغان. ئۇ ئۆزىنىڭ ھەيران قالارلىق تىرىشچانلىقىغا تايىنىپ، سەۋرچانلىق بىلەن  ئاز – ئازدىن بايلىق جۇغلاشقا ئەھمىيەت بېرىپ ئۆز كەسپىنىڭ سەركىسىگە ئايلانغان. ئۇ چوڭ كارخانىلار قىلىشنى خالىمايدىغان، كىچىك كارخانىلار قىلالمايدىغان، ھۆكۈمەت ۋەخەلق ئاممىسىنىڭ كۆڭلىنى بىئارام قىلىدىغان ،« پايدىنى ئاز تاپىدىغان» مەھسۇلات -تىرناق ئالغۇچتىن ئىش باشلاپ، جۇڭگودا «بىرىنچى» بولۇپ، دۇنيادىكى ئۈچىنچى «گگانىت» قا ئايلانغان، كارخانىنىڭ يىللىق سېتىش مىقدارى مىليارد يۈەندىن ئاشقان.    كارخانىنى تەرەققىي قىلدۇرۇش جەريانىدا، لىياۋ بوچىياڭ ئىزچىل سوغۇققان، سەزگۈرلۈكىنى، بىر  ئىشنى سىجىل داۋاملاشتۇرۇشتۇرۇپ ،تەرتىپلىك ئورۇنلاشتۇرىدىغان پىسخىكىلىق ھالەتنى ئۆزىگە ھەمراھ قىلىپ، قەيەردە بوشلۇق بولسا شۇ يەرنى مۇستەھكەملەپ ئىش قىلغان. كۆپ يىللىق تىرىشىش ئارقىلىق، ئۇنىڭ تىرناق ئالغۇچ بازىرىغا بولغان چۈشەنچىسى ناھايىتى چوڭقۇرلاشقان. ھەم قايسى دۆلەت ۋە قايسى رايوننىڭ بۇ جەھەتتىكى بازار ئەھۋالىدىن سۇئال سورالسا، ئۇ ناھايىتى ئەتراپلىق جاۋاپ بېرەلەيدىغان بولغان. بۇ ھال ئادەمگە باشقىلار تىرناق ئالغۇچ بازىرىنى ئۇنىڭدەك چۈشەنمەيدىغاندەك تەسىر بېرىدۇ.    بۈگۈنكى كۈندە، شېڭيالۈن چەكلىك شىركىتىنىڭ %60 مەھسۇلاتى ئېكىسپورت قىلىنىدۇ، بىراق بۇنىڭ ئىچىدە %80 گە باشقىلارنىڭ ماركىسى چاپلانغان بولۇپ، لىياۋ بوچاڭنىڭ نەزىرىدە بۇ خۇددى باشقىلارغا مەدىكارچىلىق قىلغاندەك ئىش. پەقەت دۆلەت ئىچىدىكى %40 مەھسۇلاتلا ھەقىقىي شېڭيالۈن ماركىسىدىكى مەھسۇلات بولۇپ ھېسابلىنىدۇ.    شىركەتنىڭ مەھسۇلاتلىرىنى خەلقئارا بازاردا بىر كىشىلىك ئورۇنغا ئىگە قىلىپ < باشقىلارغا مەدىكار بولماسلىق> لىياۋ بوچىياڭنىڭ ئارزۇسى، بىراق ئۇ بۇ ئىشتا ئالدىراشقا بولمايدىغانلىقىنى، ئاستا – ئاستا زورىيىش كېرەكلىكىنى، بىر قەدەم – بىر قەدەمدىن بۇ پىلاننى ئەمەلگە ئاشۇرۇش كېرەكلىكىنى بىلىدۇ.    ئېنىقكى ،لىياۋ بوچىياڭ ناھايىتى ئاقىلانىلىك قىلغان. ئۇ ئىگىز بىنانىڭمۇ بىر خىش – بىرخىشتىن قوپۇرۇلغانلىقىنى بىلىدۇ . ھەم < بىردەمدىلا ئىگىز بىنالارنى بەرپا قىلىش- خام خىيال بولۇپ، ئىشىنىشكىمۇ ئەرزىمەيدۇ >دەپ قارايدۇ. شۇنىڭ ئۈچۈن مەيلى قانداق قاپ يۈرەك ئادەم  بولسۇن ئىشنى ئاساسىدىن باشلاش، بايلىقنى ئاز – ئازدىن جۇغلاش، بىر قەدەم – بىرقەدەمدىن زورىيىش كېرەك.    بۇنىڭدىن كۆرۋالغىلى بولىدۇكى، نامراتلارنىڭ بايلارغا ئايلىنىشى بىر قېتىملىق قېدىرىپ تەكشۈرۈش جەريانى، يەنە كىلىپ ناھايىتى تەرتىپلىك قىلىنىدىغان، توختاۋسىز جۇغلانما توپلاش جەريانى. ئەگەر تىز نەتىجە قازىنىشقا ئالدىراپ، بىردەمدىلا بايلىق مۇنارىنىڭ  چوققىسىغا چىقىشنى ئويلىساق، جەزمەن ناھايىتى ئېچىنىشلىق يىقىلىمىز. پەقەت يىتەرلىك سەۋرچانلىق ۋە مۆتىدىل پىسىىكىغا ئىگە بولغاندىلا، ئاندىن بايلىق مۇنارىنىڭ چوققىسىغا چىقىدىغان تاقەتكە ئىگە بولغىلى، ئاخىرىدا نىشانغا يىتىپ بارغىلى بولىدۇ.ھەم  بۇ ئارقىلىق بايلىق سەپىرىنى تاماملىغىلى بولىدۇ. بايلىقنىڭ بايانى : بايلىق قوغلىشىش جەريانىدىكى «بىر موللاق ئېتىپ ئاسمانغاچىقىش»، «بىر كېچىدىلا كاتتا بايغا ئايلىنىش» كويىدا بولۇشنىڭ ھەممىسى ئەمەلىيەتكە ئۇيغۇن بولمىغان خىياللاردۇر. ئەگەر چىن كۆڭلىمىزدىن بايلارغا ئايلىنىشنى خالىساق تېز غەلبە قىلىشنىڭ شىرىن خىيالىدا بولماسلىقىمىز ۋە <كۆزنى يۇمۇپ-ئاچقۇچە كېلىدىغان پايدا > غا تەقەززا بولماسلىقىمىز كېرەك.ئەكسىچە  ئىشلارنى تەرتىپ بىلەن قىلىشقا ۋە ئاز – ئازدىن بايلىق جۇغلاشقا ئەھمىيەت بېرىشىمىز، ئۆز ئارزۇلىرىمىزنى بىر قەدەم – بىر قەدەمدىن ئەمەلگە ئاشۇرۇشىمىز لازىم.

WWW.UYHQT.COM

	بىرىنچى باب بەشىنچى پارگىراف ***5. نامراتلارنىڭ نىشانى بولمايدۇ، بايلارنىڭ نىشانى ناھايىتى ئېنىق بولىدۇ    مۇنداق بىرھىكايە بار:    بىر ئادەم قۇرۇلۇش قىلىۋاتقان جايدىن ئۆتۈپ كېتىۋېتىپ ئۈچ ئىشچىنىڭ خىشتا تام قوپۇرۋاتقانلىقىنى كۆرۈپ ،ئۇلاردىن: «نېمە ئىش قىلىۋاتىسىلەر؟» دەپ سوراپتۇ.    بۇ ئۈچ ئىشچى بىر – بىرىگە ئوخشىمايدىغان جاۋاب بېرىپتۇ، بىرىنچى ئىشچى خوشياقمىغاندەك:«سىز مېنىڭ تام قوپۇرۋاتقانلىقىمنى كۆرمىدىڭىزمۇ؟  تۇرمۇشۇمنى قامداپ،ئائىلەمنى باقىدىغان ئىش قىلىۋاتىمەن، خالاس.» دەپتۇ. ئىككىنچى ئىشچى بېشىنى كۆتۈرۈپ كۈلگىنىچە: «مەن ھازىر بىر ئۆي سېلىۋاتىمەن، مەن بۇنى ئەڭ ياخشى  خىزمەت دەپ قارايمەن.» دەپتۇ. ئاخىرقى ئىشچى پەخىرلەنگەن ھالدا: «مەن ھازىر بىرگۈزەل شەھەر سېلىۋاتىمەن، گەرچە بۇ ئەمدىلا باشلانغان بولسىمۇ، بىراق ئوزۇن ئۆتمەستىن نەتىجىسىنى كۆرەلەيسىلەر.» دەپتۇ.    نۇرغۇن يىللار ئۆتۈپ كېتىپتۇ، ئەينى ۋاقىتتىكى بىرىنچى ئىشچى  ئاۋۋالقىدەكلا ئىشچى بولۇپ ، كۈندە ئوخشاش خىزمەتنى قىلىدىكەن؛ ئىككىنچى ئىشچى خېلى نامى بارلايىھەلىگۈچىگە ئايلىنىپتۇ؛ ئۈچىنچى ئىشچى بولسا بىر ئۆي – مۈلۈك شىركىتىنىڭ خوجايىنىغا ئايلىنىپ، ئالدىنقى ئىككى ئىشچى ئۇنىڭ قول ئاستىدا ئىشلەيدىغان بوپتۇ.   ئوخشىمايدىغان ئۈچ خىل جاۋاب، ئوخشىمىغان ئۈچ خىل نەتىجىنى كەلتۈرۈپ چىقارغان. ھىكايىدىكى بىرىنچى ئىشچىنىڭ نىشانى بولمىغاچقا، تىرىشىشتىكى تۈرتكىلىك كۈچ كەمچىل. ئۇنىڭ ھەر كۈنلۈك خىزمىتى ئۇ ئېيىتقاندەك ئائىلىسىنى بېقىش ئۈچۈن بولۇپ، كۈن ئۆتسىلا شۇنىڭغا رازى بولىدۇ، شۇڭا نەچچە ئون يىلمۇ خۇددى بىر كۈندەك ئۆتۈپ، ھېچقانداق ئىلگىرىلەش بولمىغان؛ ئىككىنچى ئىشچىنىڭ بىرىنچى ئىشچىغا سېلىشتۇرغاندا بىر قەدەر ئېنىق بولغان قىسقا مۇددەتلىك نىشانى بار، شۇ سەۋەبتىن ئۆزىنىڭ خىزمىتىدىن ھوزۇرلىنالىغان ھەمدە ئەڭ ئاخىرى بىر لايىھەلىگۈچىگە ئايلانغان. ئۈچىنچى ئىشچىنىڭ بولسا ناھايىتى ئېنىق بولغان ئوزۇن مۇددەتلىك نىشانى بار .ئۇ ئۈمىدكە تولغان، قىزغىن ۋە ناھايىتى جۇشقۇن بولۇپ، كۆڭلىدە ئېنىق نىشانى بولغاچقا ئاخىرى ئالدىنقى ئىككى ئىشچىنىڭ خوجايىنىغا ئايلىنىپ، ئۆزىنىڭ بايلىق چۈشىنى ئەمەلگە ئاشۇرغان.    ئامېرىكاخارۋارد ئۇنىۋېرسىتىتى ئىلگىرى بۇ مەكتەپتىكى ئەقلى، ئوقۇش تارىخى، مۇھىت شارائىتى قاتارلىق جەھەتلەردە ئاساسەن ئوخشاش بولغان بىر تۈركۈم ئوقۇش پۈتتۈرىدىغان ئوقۇغۇچىلارغا قارىتا نىشاننىڭ كىشلىك ھاياتقا بولغان تەسىرى توغرىسىدا تەكشۈرۈش ئېلىپ بارغان. نەتىجىدە ئوقۇش پۈتتۈرىدىغان بۇ ئوقۇغۇچىلار ئارىسىدا،%27 كىشىنىڭ نىشانى يوق، %60 كىشىنىڭ نىشانى غۇۋا، %10 ئادەمنىڭ بىر قەدەر ئېنىق بولغان قىسقا مەزگىللىك نىشانى بار، %3 ئادەمنىڭ ئېنىق بولغان ئوزۇن مەزگىللىك نىشانى بار ئىكەنلىكى مەلۇم بولغان.    25 يىلدىن كىيىن خارۋارد ئۇنىۋېرسىتىتى بۇ ئوقۇغۇچىلارغا قارىتا ئىز قوغلاپ تەكشۈرۈش ئېلىپ بارغان، نەتىجىدە: ئوزۇن مەزگىللىك نىشانى بولغان بۇ %3 ئادەم ھەر كۈنى ئوخشاش بىر يۆنىلىشكە قاراپ توختىماستىن كۆرەش قىلىش ئارقىلىق، بۈگۈنكى كۈندە ئاللىقاچان ھەرقايسى ساھەلەردىكى مۇۋەپپەقىيەت قازانغان شەخىسلەرگە ئايلانغان، بۇلارنىڭ ئىچىدەئۆز كەسپىنىڭ سەركىلىرى ۋە ئىجتىمائىي قەھرىمانلارمۇ بولغان؛ بىر قەدەر ئېنىق بولغان قىسقا مەزگىللىك نىشانى بولغان %10 ئادەم ئۆزىنىڭ نىشانى ئۈچۈن ئىزچىل تىرىشىپ، ھەر قايسى ساھەلەردىكى كەسپىي ئەربابلارغا ئايلانغان، ئۇلارنىڭ ھەممىسى جەمئىيەتنىڭ ئوتتۇرا قاتلىمىدا ياشىغان؛ نىشانى غۇۋا بولغان %60 ئادەمنىڭ تۇرمۇشى ناھايىتى ئادەتتىكىچە بولۇپ، گەۋدىلىك نەتىجە قازىنالمىغان، ئۇلارنىڭ كۆپ قىسىمى جەمئىيەتنىڭ ئوتتۇرا قاتلىمىدىن تۆۋەن ئورۇندا ياشىغان؛ نىشانى بولمىغان %27ئادەمنىڭ تۇرمۇشتا ھېچقانداق يۆنىلىشى يوق بولۇپ، تۇرمۇشى ناھايىتى تەستە ئۆتكەن،ھەتتا دائىم باشقىلاردىن، جەمئىيەتتىن ئاغرىنىدىغان بولغان.    بىز بۇ تەكشۈرۈش نەتىجىسىدىن شۇنى كۆرۈۋالالايمىزكى، نامراتلار ۋە بايلارنىڭ يەنە بىر پەرقى:نامراتلارنىڭ نىشانى يوق، بايلارنىڭ نىشانى ناھايىتى ئېنىق بولىدۇ.    بۇنىڭغا قارىتا، گۇاڭدۇڭ شېڭفاڭ مەدەنىيەت تارقىتىش چەكلىك شىركىتىنىڭ باش لېدىرى خۇاڭشىنىڭ ناھايىتى چوڭقۇر تەسىراتى بار، ئۇ ئېنىق نىشاننىڭ كىشىلىك ھاياتقا بولغان يىتەكچىلىك رولىدىن گۇمانلانمايدۇ، ھەمدە ئۇ ئۆزىمۇ نىشانى ناھايىتى ئېنىق ئادەم.    خۇاڭشى كىچىك ۋاقتىدا، ئۇنىڭ ئاتا – ئانىسى دائىم ئۇنى ياخشى ئۆگىنىشكە، كەلگۈسىدە بىر ياخشى خىزمەت تېپىشىغا يىتەكلەيىتتى. ھالبۇكى ئەينى ۋاقىتتا كىچىككىنە خۇاڭشىنىڭ ئۆزىنىڭ مۇستەقىل كۆز – قارىشى بولۇپ، ئۇ كۆڭلىدە شۇنداق ئويلايىتتى: كەلگۈسىدەنېمىشقا ياخشىراق خىزمەت تېپىشىم كېرەك؟ مەن نېمىشقا باشقىلارنى ياخشى خىزمەت ئورنى بىلەن تەمىنلىمەيمەن؟    شۇنداق قىلىپ شۇ ۋاقىتتىن باشلاپ، كىچىك خۇاڭشى ئۆزىگە ئىگىلىك تىكلەپ خوجايىن بولۇش – تىن ئىبارەت نىشان بەلگىلىگەن. بۇ نىشاننى ئايدىڭلاشتۇرغاندىن كىيىن، خۇاڭشى سەمىمىيلىك بىلەن ئىزچىل تىرىشقان. ئالىي مەكتەپتىكى ۋاقتىدا، ئۇ ئىگىلىك تىكلەشكە مۇناسىۋەتلىك ئۇچۇر ۋە پۇرسەتلەرگە دىققەت قىلىشقا باشلايدۇ. ئۇ ئوقۇۋاتقان جۇڭشەن ئۇنىۋېرسىتىتىدا نۇرغۇنلىغان چەتئەللىك ئوقۇغۇچىلار بولۇپ،خۇاڭشى بۇنىڭدىن پايدىلىنىپ جۇڭگو ۋە چەتئەللىك ئوقۇغۇچىلارغا ئۆز – ئارا تىل ئۆگىنىدىغان سەھنە ھازىرلاپ، ئۇلارنى تىل ئۆگىنىشنىڭ ئەڭ ياخشى ئۇسۇلى بىلەن تەمىنلەشنى ئويلايدۇ.    ئەمدىلا ئالىي مەكتەپنىڭ  ئىككىنچى يىللىققدا ئوقۇۋاتقان خۇاڭشى ئامېرىكا ۋە ۋېنگىرىيەلىك ئوقۇغۇچىلار بىلەن بىرلىشىپ جۇڭگو – چەتئەل ئالىي مەكتەپ ئوقۇغۇچىلىرى بىرلەشمەكۇلۇبىنى قۇرۇپ چىقىدۇ .بۇ كۇلۇب ئەينى ۋاقىتتا جۇڭشەن ئۇنىۋېرسىتىتىدا خېلى زور تەسىر قوزغايدۇ. كۇلۇبنىڭ نامىنى ئاڭلاپ تىزىملىتىشقا كەلگەن ئوقۇغۇچىلارنىڭ ئايىغى ئۈزۈلمەي 3000 دىن كۆپرەك ئادەم ئەزا بولىدۇ، ھەمدە ئوقۇغۇچىلارتاپشۇرغان ئەزالىق ھەققى خۇاڭشىنىڭ ئىگىلىك تىكلەش  ھاياتىدىكى تۇنجى مەبلىغى بولىدۇ.    خۇاڭشى ئۈچ يىل ۋاقىت سەرپ قىلىپ جۇڭشەن ئۇنىۋېرسىتىتىنىڭ ئۆزلۈكىدىن ئۆگىنىش تولۇق كۇرسىنى تاماملاپ، ئىگىلىك تىكلەش قەدىمىنى باسىدۇ ھەمدە ئۆزىنىڭ ئىگىلىك تىكلەش سەپىرىنى باشلايدۇ.    ئۈچ يىلدىن كىيىن، خۇاڭشىنىڭ دانالارچە رەھبەرلىكى ئاستىدا، ئۇ ئۆز قولى بىلەن قۇرۇپ چىققان شېڭفاڭ مەدەنىيەت تارقىتىش چەكلىك شىركىتى گۇاڭجۇ شەھىرىكى ئون چوڭ مۇنەۋۋەرخەلقئارالىق مودىل شىركىتىنىڭ بىرى بولۇپ قالىدۇ.    دۇنياغا داڭلىق تىز تاماقخانا مەكدونالدنىڭ قۇرغۇچىسى ئىلگىرى ئۆزىنىڭ مۇۋەپپەقىيىتىنى خۇلاسىلىگەندە: «بىر ئادەم مۇۋەپپەقىيەت قازىنىشنى ئويلىسا چوقۇم ئىككى خىل سۈپەتنى ھازىرلىشى كېرەك، بىرى نىشانى ئېنىق بولۇش، يەنە بىرى كۈچلۈك ئىرادىسى بولۇش كېرەك.» دىگەن. خۇاڭشىنىڭ مۇۋەپپەقىيەت قازىنىپ بايلارغا ئايلىنىشىدىكى سەۋەب، ئۇنىڭ ئېنىق نىشانىنىڭ بولغانلىقىدا، ھەمدە ئۆز نىشانىغا قاراپ توختىماستىن كۆرەش قىلغانلىقىدا. نىشانى ئېنىق بولغاچقا، خۇاڭشى ئۆزىنىڭ كۆرەش نىشانى ۋەماڭىدىغان يولىنى كەسكىن قارار قىلالىغان؛ ئاكتىپلىق بىلەن ئىگىلىك يارىتىدىغان پۇرسەتنى ئىزلىگەن؛ نىشانى ئېنىق بولغاچقا،خۇاڭشى ئۆزىنىڭ شىركىتىنى قۇرۇپ، باشقىلارغا خىزمەت پۇرسىتى تەمىنلىيەلىگەن.    شۇنىڭدىن كۆرۈۋالغىلى بولىدۇكى، بايلىققا ئېرىشىپ بايلارغا ئايلىنىشنى ئويلىغاندا، ئاۋۋال ئۆزىنىڭ نىشانىنى ئېنىق ئايدىڭلاشتۇرۋېلىش، ئۆزىنىڭ نېمە ئىش قىلىدىغانلىقىنى،قانداق ئادەم بولماقچى ئىكەنلىكىنى بىلىش كېرەك. پەقەت نىشان ئېنىق بولغاندىلا،نامراتلىقتىن قۇتۇلۇپ بايلاردىن بولۇش يولىدا تېخىمۇ تىز، تېخىمۇ يىراققا ماڭغىلى بولىدۇ.    ھەقىقەتەن،بىر ئادەمنىڭ ھاياتىدا بىر ئېنىق نىشان بولۇشى كېرەك، نىشان بولغان ئىكەن ئۈمىد بولىدۇ، ئۈمىد بولغان ئىكەن كۆرەش قىلىشتىكى تۈرتكىلىك كۈچ بولىدۇ. بىر نىشانسىز ئادەم خۇددى يەلكەنسىز كېمىگە ئوخشايدۇ، مەڭگۈ تىنىمسىز لەيلىسىمۇ،مۇۋەپپەقىيەتنىڭ قىرغىقىغا يىتىشى مۇمكىن ئەمەس؛ بىر نىشانى يوق ئادەم خۇددى يىپى ئۈزۈلگەن لەگلەككە ئوخشايدۇ، نىشانى يوق، نەگە بېرىپ نەدە تۇرۇشنى بىلمەيدۇ؛ بىرنىشانسىز ئادەم خۇددى باشسىز چىۋىنغا ئوخشايدۇ، شۇ ۋەجىدىن بايلىق يارىتىش يولىدا چوقۇم مەغلۇبىيەتكە ئۇچرايدۇ.    شۇنىڭ ئۈچۈن، ئەگەر سىز بايلاردىن بولماقچى بولسىڭىز بىرىنچى قەدەمدە چوقۇم ئۆزىڭىزگە بىرئېنىق نىشان تۇرغۇزۇشىڭىز كېرەك. نىشان بەلگىلەنگەندىن كىيىن، بەلگىلەنگەن نىشانغا قاراپ ئىزچىل كۆرەش قىلىش كېرەك. پەقەت شۇنداق قىلغاندىلا، سىز ئارزۇ قىلغان بايلىق قەسىرىگە كىرەلەيسىز. بايلىقنىڭ بايانى :    ئېينىشتىيىن ئىلگىرى مۇنداق دىگەن: «مۇۋەپپەقىيەت قازىنىشتا ئاۋۋال نىشان ئېنىق بولۇشى كېرەك،ئاندىن دىققەتنى يىغىپ نىشانغا قاراپ كۆرەش قىلىش كېرەك.» .نامراتلارنىڭ ئىزچىل نامرات بولۇشىدىكى سەۋەب، ئۇلاردا نىشان بولماسلىقى ياكى ئېنىق نىشاننىڭ،تۇرمۇشتىكى كۆرەش يۆلىنىشىنىڭ كەمچىل بولغانلىقىدا. بايلارنىڭ ھەممىسىنىڭ ئېنىق نىشانى بولىدۇ، ئۇلار ھەر قانداق ئىشنى قىلىشتىن بۇرۇن ئۆزىگە ئېنىق نىشان تۇرغۇزىدۇ، ئاندىن بەلگىلەنگەن نىشانغا قاراپ ھەرىكەت قىلىپ، ئاخىرىدا بايلىق مۇنارىنىڭ چوققىسىغا يىتىپ بارىدۇ.

WWW.UYHQT.COM

	بىرىنچى باب ئالتىنچى پارگىراف ***6. نامراتلار كونا قائىدىلەرگە ئېسىلىۋالىدۇ، بايلار يېڭىلىق يارىتىدۇ    كونا قائىدىلەرگە ئېسىلىۋېلىش دىگىنىمىز -كونا ئادەتلەرگە چوقۇنۇش، كونا ئادەتلەرنى دەۋر قىلىپ چۆرگىلەش، ئىسلاھ قىلماسلىق، يېڭىلىق يارىتىش روھى كەمچىل بولۇش قاتارلىقلارنى كۆرسىتىدۇ. بۇنىڭ قارىمۇ – قارشى سۆزى بولسا «كونىنى بۇزۇپ، يېڭىنى تىكلەش»، يەنى كونا قائىدىلەرنى ئەمەلدىن قالدۇرۇپ يېڭىلىق يارىتىش ئېڭى يىتىلدۈرۈشتىن ئىبارەت. قارىماققا ئاددى بولغان بۇ ئىككى جۈملە بايلار بىلەن نامراتلارنىڭ پەرقىنى ئىپادىلەپ بەرگەن.    بايلىقنى قوغلىشىش جەريانىدا، نامراتلار ھەمىشە بايلارنىڭ ئارقىدا قالىدۇ. چۈنكى ئۇلار كونا قائىدىلەرگە ئېسىلىۋالغاچقا، ھەمىشە ئۆزىنىڭ يولىنى ئۆزى توسۇپ قويىدۇ.ئۇلاردا يېڭىلىق يارىتىش روھى كەمچىل بولىدۇ، ئۇلار ماشىنا ئادەملەردەك  بۇرۇنقى تەجىرىبىلەرگە تايىنىپ مەسىلىلەرنى ئويلايدۇ ۋە شۇ بويىچە ئىش قىلىدۇ. كۆپچىلىك تەجرىبە، قائىدىلەرنىڭ ئەسلىدىنلا مۇقىمسىزلىق ۋە چەكلىمىلىككە ئىگە ئىكەنلىكىنى بىلىدۇ. ئىلگىرى شەكىللەنگەن كونا قائىدىلەرگە ئېسىلىۋالغاندا، تەپەككۇرنىڭ چېكىنىشىنى، ئىزىدا تۇرۇپ قېلىشىنى كەلتۈرۈپ چىقىرىدۇ، بۇ ھال  دەل بايلىق يولىدىكى «يول توسار باتۇرلار>>، «يول توسقۇچى قورام تاشلار» دۇر.    ھاياتتا يوللار ناھايىتى كۆپ، ئەگەر ھەمىشە باشقىلارنىڭ ئاياغ ئىزىغا قاراپ ماڭسا، ھاياتتاچوڭ ئىلگىرىلەش بولمايدۇ. پەقەت كونا قائىدىلەرنى بۇزۇشقا جۈرئەت قىلىپ، باشقىلارمېڭىپ باقمىغان يوللاردىن ماڭغاندىلا ئاندىن بايلىق قەسىرىنىڭ كىرىش بېلىتىنى ئالغىلى بولىدۇ.    ۋاڭ خۇڭخۇەي ئەينى ۋاقىتتا پۈتۈن مەملىكەتتىكى ئىككى مىليوندىن ئارتۇق يىغىۋالغۇچىلارغا ئوخشاش بالدۇر ئۆيدىن چىقىپ كەچ قايتاتتى. كۈندە كېرەكسىز قۇتا، خاشو بوتولكىلارنى تىرىپ تۇرمۇشىنى قامدايىتتى. گەرچە كېرەكسىز نەرسىلەرنى تىرىدىغان ئىش قىلسىمۇ،بىراق ئۇ كاللىسىدا ھازىرقى ئەھۋالىنى ئۆزگەرتىشنى ئويلايىتتى. ئۇ بىر كۈنى تۇيۇقسىز شۇنداق ئويلاپتۇ: بىر قۇتىنى تەرسەك نەچچە پۇڭغا ساتقىلى بولىدۇ، ئەگەرئۇنى ئىرىتىپ مېتال ماتېرىيال سۈپىتىدە ساتسا كۆپ پۇلغا ساتقىلى بولىدۇ ئەمەسمۇ؟    شۇلارنى ئويلاپ، ۋاڭ خۇڭخۇەي بىر پاسىلداق قۇتىنى كىسىپ ئۇنى ۋېلسىپىتنىڭ قوڭغۇراق ياپمىسىنىڭ ئىچىگە كىرگۈزۈپتۇ، بۇنىڭ بىلەن ئۇ قۇتا قوڭغۇراق ياپقۇچ چوڭلۇقىدىكى كۈمۈش رەڭلىك مىتالغا ئايلىنىپتۇ. ئۇ 600 يۈەن خەجلەپ ئۇنى شەھەردىكى رەڭلىك مېتال تەتقىقات ئورنىغا ئاپىرىپ خىمىيىلىك تەجرىبە قىلدۇرۇپتۇ. تەجرىبە نەتىجىسى چىققاندىن كىيىن، ۋاڭ خۇڭخۇەي خۇشاللىق بىلەن بايقاپتۇكى، بۇ ئەسلىدە قىممەت باھالىق ئاليۇمىن – ماگنىي ئارلاشمىسى ئىكەن!    بۇ خىلدىكى قېتىشما ئەينى ۋاقىتتا ناھايىتى بازارلىق بولۇپ، ھەر بىر توننىسىنى 14000دىن 18000يۈەنگىچە ئالاتتى. ۋاڭ خۇڭخۇەي ھېسابلاپ كۆرۈپ، ھەر بىر پاسىلداق قۇتىنىڭ 18.5گرام، بىر توننا بولسا 54 مىڭ دانە قۇتا بولىدىغانلىقىنى،  پاسىلداق قۇتىنى ئىرىتىپ ئاليۇمىن – ماگنىي بىرىكمىسىگە ئايلاندۇرۇپ ساتسا بىۋاستە ساتقانغا قارىغاندا بەش – ئالتە ھەسسە كۆپ پايدا ئالغىلى بولىدىغانلىقىنى بايقاپتۇ. ۋاڭ خۇڭخۇەي بۇنىڭدا ناھايىتى زور يوشۇرۇن پايدا بارلىقىنى ھېس قىلىپ، پاسىلداق قۇتىلارنى يىغىۋېلىپ ئىرىتىپ سېتىشنى قارار قىپتۇ.    پاسىلداق قۇتىلارنى تىزراق يىغىۋېلىش ئۈچۈن،ۋاڭ خۇڭخۇەي پاسىلداق قۇتىلارنىڭ يىغىۋېلىش باھاسىنى ئەسلىدىكى نەچچە پۇڭدىن بىرمو تۆت پۇڭغا ئۆستۈرۈپتۇ. شۇنىڭ بىلەن بىر ۋاقىتتا، ئۇ پاسىلداق قۇتىلارنى يىغىۋېلىش باھاسى بىلەن يىغىۋېلىش ئورنىنى كىچىك كارتىغا بېسىپ، كېرەكسىز نەرسىلەرنى يىغىدىغان ئوخشاش كەسىپتىكى كىشىلەرگە تارقىتىپتۇ.    بىرھەپتىدىن كىيىن ئۇ سېتىۋېلىش مەيدانىغا كەلگەندە، كۆز ئالدىدىكى مەنزىرە ئۇنى ناھايىتى ھەيران قالدۇرۇپتۇ. نۇرغۇن كىشىلەر پاسىلداق قۇتىلار لىق بېسىلغان ئۈچ چاقلىق موتوسىكىلىتلاردا ئۇنىڭ كېلىشىنى ساقلاپ تۇرغان ئىكەن.بۇ قېتىم ۋاڭ خۇڭخۇەي130 مىڭ دانە پاسىلداق قۇتا يىغىۋالغان بولۇپ،  ئىككى يېرىم توننىدىن ئارتۇق ئىكەن.    ئۇنىڭدىن كىيىن، ۋاڭ خۇڭخۇەي دەرھاللا مېتاللارنى قايتا پىششىقلاپ ئىشلەش زاۋۇتى قۇرۇپتۇ.بىر يىلنىڭ ئىچىدە بۇ زاۋۇت ئارقىلىق 240 توننىدىن ئارتۇق ئاليۇمىن بىرىكمىسى ئىشلەپچىقىرىلىپ، ئۈچ يىل ئىچىدە 2 مىليون يەتتە يۈز مىڭ يۈەن كىرىم قىلىنىپتۇ.ۋاڭ خۇڭخۇەيمۇ بىر يىغىۋالغۇچىدىن بىر مىليونىرغا ئايلىنىپتۇ.    ۋاڭ خۇڭخۇەي نېمىشقا نۇرغۇنلىغان يىغىۋالغۇچىلارنىڭ ئارىسىدىن چىقىپ بايلارنىڭ قاتارىغا قوشۇلالايدۇ؟ كۆپ قىسىم يىغىۋالغۇچىلارنىڭ نەزىرىدە ئۆزىنىڭ خىزمىتى پەقەت كېرەكسىز مەھسۇلاتلارنى يىغىۋېلىش، ھەمدە ئۇنىڭدىكى باھا پەرقىدىن پايدىلىنىپ ئائىلىسىنى بېقىش بولۇپ، كېرەكسىز نەرسىلەرنى ئۆزگەرتىپ ياساش ئۇلار ئويلايدىغان ئىش ئەمەس.    ئەمما ۋاڭخۇڭخۇەي ئوخشىمايدۇ، ئۇ ھەمىشە كونا تەپەككۇرنىڭ بويۇنتۇرۇقىدىن قۇتۇلۇشنى ئويلايدۇ.شۇڭا ئۇ  كېرەكسىز نەرسىلەرنى ئۆزگەرتىپلا قالماستىن، يەنە ئۆزگەرتىپ بولغاندىن كىيىن خىمىيىلىك تەكشۈرۈش ئورنىغا ئەۋەتىشنىمۇ بىلگەن، بۇلارنى «كونا قائىدىلەرگە ئېسىلىۋالغان» باشقا يىغىۋالغۇچىلار قىلالمايدۇ.    بۇ جايغا كەلگەندە، سىزنىڭ كۆڭلىڭىزدىمۇ ئالدىمىزدىكى سۇئالغا جاۋاب تېپىلىپ بولدى. بۇ دەل نامراتلار بىلەن بايلارنىڭ ئوتتۇرىسىدىكى پەرق: نامراتلار كونا قائىدىلەرگەئېسىلىۋالىدۇ، بايلار يېڭىلىق يارىتىدۇ.    قەدىمكى ۋەھازىرقى جۇڭگو – چەتئەل بايلىرىغا نەزەر سالىدىغان بولساق، ھەممىسى يېڭىلىق ياراتقان، يول ئاچقان كىشىلەر.ئۇلار كونا قائىدىلەرگە جەڭ ئېلان قىلالايدىغان تەپەككۇر شەكلىگە ئىگە بولۇپ، دائىم ئۇچراپ تۇرىدىغان كونىلىقنى يېڭەلەيدىغان جاسارىتى بار، ئۇلار شۇ ئارقىلىق باي بولىدىغان پۇرسەتنى ئىگەللىيەلەيدۇ.    فرانسىيەلىك ھۆسىن تۈزەش بويۇملىرى سودىگىرى ئېۋان. لول دەل بۇنىڭ تىپىك ۋەكىلى.    دەسلەپتە گۈلنى ياخشى كۆرىدىغان ئېۋان ئۆزىنىڭ دۇكىنىدا تىجارەت قىلاتتى. 1958 – يىلى، بىرقېتىملىق تاسادىپىي پۇرسەتتە ئېۋان بىر ياش ئايال دوختۇردىن چىش پاستىسىنىڭ ئالاھىدە رېتسىپىغا ئېرىشىدۇ، ئېۋان بۇ رېتسىپقا ناھايىتى قىزىقىپ قالىدۇ. ئۇ كۆڭلىدە مۇنداق ئويلايدۇ: ئەگەر گۈلنىڭ خۇش پۇرىقىنى بۇ خىل چىش پاستىسىغا كىرگۈزەلىسەك، چوقۇم ناھايىتى قارشى ئېلىشقا ئېرىشىدۇ.    بۇ ئوي پەيدا بولغاندىن كىيىن، ئېۋان بۇ رېتسىپ ۋە ئۆزىنىڭ گۈلگە بولغان چۈشەنچىسىگە تايىنىپ، بىر خىل پۇرىقى ئۆزگىچە بولغان ئۆسۈملۈك مېيىنى ياساپ چىقىدۇ. ئۇ ئۆزىنىڭ مەھسۇلاتلىرىنى ساتقىلى چىققاندا، نەچچە يۈز قۇتا مەھسۇلات بىر نەچچە كۈندىلا سېتىلىپ تۈگەيدۇ.    ئېۋان يەنەگۈل بەرگى ۋە ئۆسۈملۈكتىن پايدىلىنىپ گىرىم بويۇملىرى ياساشنى ئويلايدۇ. ئۇ گۈلبەرگىدىن پايدىلىنىپ گىرىم بويۇملىرى ياسىغاندا باشقىلارغا يېڭىچە زوق بەخش ئەتكىلى بولىدۇ دەپ قارايدۇ. ئۇنىڭ ئۈستىگە گۈل بەرگىنىڭ كېلىش مەنبەسى كۆپ، تۈرىمۇ مول بولغاچقا، بازار ناھايىتى ياخشى بولاتتى.    شۇنداق قىلىپ، ئېۋان گىرىم بويۇملىرى سودىگەرلىرىنى ئۇنىڭ تۈرىگە مەبلەغ سېلىشقا كۆندۈرۈشكە باشلايدۇ، ئەينى ۋاقىتتا كىشىلەر گۈل ۋە ئۆسۈملۈكتىن پايدىلىنىپ گىرىم بويۇملىرى ياساشقا ئېتىبار بەرمەيدىغان بولۇپ، ھېچكىم بۇ تۈرگە مەبلەغ سېلىشنى خالىمايىتتى، ھەتتا ئېۋاننىڭ دوستىمۇ ئۇنى بۇ خىل ئومۇميۈزلۈك قائىدىگە خىلاپ بولغان  پىلاننى يۈرگۈزمەسلىككە ئاگاھلاندۇرىدۇ. بىراق ئېۋان ھەرگىز بەل قويۇۋەتمەيدۇ، ئۇ ئۆزىنىڭ تۈرىنىڭ چوقۇم غەلبە قىلىدىغانلىقىغا ئىشەنگەچكە،بانكىدىن قەرز ئېلىپ، بۇ تۈرىگە مەبلەغ سالىدۇ.    1960 –يىلى، ئېۋاننىڭ بىرىنچى تۈركۈم گۈل بەرگىدىن ياسالغان گىرىم بويۇملىرى تەتقىقاتى مۇۋەپپەقىيەتلىك بولۇپ، كىچىك كۆلەمدە ئىشلەپچىقىرىلشقا باشلايدۇ، نەتىجىدە بازاردا ناھايىتى زور تەسىر قوزغايدۇ.    سېتىشنى تىزلىتىپ، خېرىدارلارغا ياخشى مۇلازىمەت قىلىش  ئۈچۈن، ئېۋان ئەنئەنىۋى سېتىش ئۇسۇلىنى ئۆزگەرتىپ، ئەينى ۋاقىتتا ھېچكىم قىلىپ باقمىغان پوچتىدىن سېتىش ئۇسۇلىنى قوللىنىدۇ. ئۇ تارقىلىش مىقدارى كۆپ بولغان «بۇ جاي پارىژ» ناملىق ژورنالغا  ئېلان بېرىدۇ، ھەمدە ئۈستىگە پوچتا ئېتىبار كارتوچىكىسىنى باسىدۇ، نەتىجىدە %40 ئېتىبار كارتىلىرى قايتىپ كېلىدۇ.    بۇ خىلدىكى ئۆزگىچە پوچتىدا سېتىش ئۇسۇلى ئارقىلىق، ئېۋاننىڭ سودىسى بارغانسىرى ياخشىلىنىپ كېتىدۇ. قىسقىغىنە ۋاقىت ئىچىدە 700 مىڭ قۇتىدىن ئارتۇق گۈل بەرگى مايلىرى سېتىلىپ تۈگەيدۇ، ھەمدە پوچتا ئارقىلىق سېتىش ئېۋاننىڭ ئومۇمىي تىجارىتىنىڭ %50 نى ئىگەللەيدۇ.    1969 –يىلى، ئېۋان ئۆزىنىڭ بىرىنچى زاۋۇتىنى قۇرۇپ چىقىدۇ. ھەمدە پارىژنىڭ ئوسمان كوچىسىغا ئۆزىنىڭ تۇنجى سودا دۇكىنىنى قۇرۇپ، كۆپ مىقداردا مەھسۇلات ئىشلەپچىقىرىشقا ۋە سېتىشقا باشلايدۇ. بۈگۈنكى كۈنگە كەلگەندە، ئېۋاننىڭ پۈتۈن دۇنيادىكى تارماق دۇكانلىرى 1000غا يىتىپ، مەھسۇلاتلىرى دۇنيادىكى نۇرغۇن كىشىلەر تەرىپىدىن ئىشلىتىلىدۇ. نەتىجىدە ئۇنىڭ سودىسى بارغانسىرى ياخشىلانغان. ئۇنىڭ كارخانىسىمۇ فرانسىيەدىكى ئەڭ چوڭ گىرىم بۇيۇملىرى كارخانىسى «لاۋلېر» بىلەن رىقابەتلىشەلەيدىغان كارخانىغا ئايلانغان.    يۇقىرىدىكى مىسالدىن بىز كۆرۈۋالالايمىزكى، ئېۋاننىڭ شانلىق نەتىجىلەرنى قولغا كەلتۈرەلىشىدىكى سەۋەب، ئۇنىڭ يېڭىلىق يارىتىش روھىنىڭ ناھايىتى كۈچلۈك بولغانلىقىدا. ئەگەر گۈل بەرگىسى ۋە ئۆسۈملۈكلەردىن پايدىلىنىپ گىرىم بويۇملىرى ياساشنى ئۇنىڭ يېڭىلىق يارىتىشتىكى بىرىنچى قەدىمى دېسەك؛ ئۇنىڭ ئەينى ۋاقىتتا ھېچكىم قوللانمىغان پوچتا ئارقىلىق  سېتىش ئۇسۇلىنى قوللىنىشى ئىگىلىك يارىتىشتىكى يەنە بىر بۈيۈك نەتىجە.    بىرقېتىملىق ئاخبارات ئېلان قىلىش يىغىنىدا ئېۋان ھاياجانلانغان ھالدا: «بۈگۈنكى كۈنۈمنىڭ بولۇشىدا، مەن ھەرگىزمۇ كارنىگ ئەپەندىمنى ئۇنتۇپ قالمايمەن، ئۇنىڭ دەرسى ماڭا ئىلگىرى ئۆزۈم بايقىيالمىغان بىر سىرنى يەتكۈزدى. مەن بۇ سىر بىلەن دائىم ئۇچرىشىپ تۇرساممۇ ئىلگىرى ئۇنىڭغا ئەھمىيەت بەرمىگەن ئىكەنمەن، ھەمدە ئۇنىڭغا  بىر ئىش قاتارىدامۇئامىلە قىلماپتىكەنمەن. ھازىر مەن يېڭىلىق يارىتىشنى بىر گۈزەل مۆجىزە دەيمەن.»دىگەن.    شۇنداق،ئەگەر كونا قائىدىلەردىن غالىپ كېلىدىغان جاسارىتى بولمىسا، ئېۋان. لول گۈل بەرگىدىن پايدىلىنىپ گىرىم بويۇملىرى ياساپ، كەسپتىكى پۇرسەتنى ئىگەللىيەلمىگەن بولاتتى؛ ئەگەر يېڭىلىق يارىتىدىغان تەپەككۇرى بولمىغان بولسا، ئېۋاننىڭ ئىلگىرى بولۇپ باقمىغان پوچتا ئارقىلىق سېتىش ئۇسۇلىنى قوللىنىشى مۇمكىن ئەمەس ئىدى.    ئوخشاشلا،رىقابەت كەسكىن بولغان بۈگۈنكى جەمئىيەتتە، ئەگەر بايلىققا ئېرىشىشنى ئويلايدىكەنمىز، چوقۇم ئىدىيىنى ئازاد قىلىشىمىز، يېڭىلىق يارىتىش تەپەككۇرىنى يىتىلدۈرۈشىمىز، كونا قائىدىلەردىن ھالقىشقا جۈرئەت قىلىشىمىز كېرەك.    سىز بۇنىڭغا تەييارلىنىپ بولدىڭىزمۇ؟ بايلىقنىڭ بايانى :    ھەر بىر باي بىر يېڭىلىق ياراتقۇچى، ئۇلار باشقىلار ئىلگىرى مېڭىپ باقمىغان يوللاردا يىقىلىشقا رازىكى، باشقىلار قىستىلىشىپ قالغان يوللاردا مېڭىشنى خالىمايدۇ.رىقابەت كەسكىن بولغان ھازىرقى جەمئىيەتتە، پەقەت ئاشۇ كونا قائىدىلەرگە جەڭ ئېلان قىلىشقا جۈرئەت قىلالايدىغان، ئۆزگىچە يېڭىلىق يارىتىش روھى بار كىشىلەرلا يۈكسەك پەللىگە يىتىپ، بايلاردىن بولالايدۇ.

WWW.UYHQT.COM

	بىرىنچى باب يەتتىنچى پارگىراف ***7.نامراتلار پۇل توپلايدۇ، بايلار ئەقىل توپلايدۇ    مۇنداق بىرھېكىمەتلىك ھىكايە بار:    بىر باي بۇلاڭچىلارغا ئۇچراپ قاپتۇ، بۇ ۋاقىتتا  باي قاراقچىلارغا قاراپ تەمكىنلىك بىلەن: «سەن مېنىڭ ماشىنامنى ئېلىپ كەتسەڭ بولىدۇ، پۇللىرىمنى بۇلىساڭ بولىدۇ، ئەمما مېنى ئۆلتۈرمەسلىكىڭنى ئۈمىد قىلىمەن.سەۋەبى ھايات بولساملا كۆپ  ئۆتمەستىن مەن قايتىدىن بۇ نەرسىلەرگە ئىگە بولىمەن، ئەمما سەنچۇ؟ مەندىن بۇلاپ كەتكەن پۇل – ماللار تۈگەپ كەتكەندە، سەن يەنە ھېچنىمەڭ يوق نامراتقا ئايلىنىسەن.» دەپتۇ.    قاراقچى باينىڭ سۆزلىرىنى ئاڭلاپ ئۇنىڭ تىگىگە يىتەلمەي سوراپتۇ: «بۇنىڭ سەۋەبى نېمە؟»    باي ئۆزىنىڭ بېشىنى كۆرسىتىپ تۇرۇپ: «چۈنكى مېنىڭ بارلىق بايلىقىم مۇشۇ جايدا، ئۇ باشقا ئالتۇن– كۈمۈش، پۇل – ماللاردىن قىممەتلىك.» دەپتۇ.    ھىكايىدىكى باي ناھايىتى ئاقىلانىلىك قىلغان، ئۇ ئەڭ پۇلغا يارايدىغان نەرسىسىنىڭ يانچۇقىدىكى مال – مۈلۈك ئەمەس، بەلكى قىممەتلىك ئەڭگۈشتەرگە ئوخشايدىغان مېڭىسى ئىكەنلىكىنى تونۇپ يەتكەن. پەقەت ئۇنىڭ بېشى ئامان بولسىلا، يانچۇقى قۇرۇقدىلىپ كەتكەن تەغدىردىمۇ، ھامان بىر كۈنى تولدۇرۋالىدىغان كۈن كېلىدۇ. ھازىر ئۆزى بۇلاڭچىغا ئۇچراپ نامراتقا ئايلىنىپ قالسىمۇ، يىللاردىن كىيىن يەنىلا باي ئادەم بولالايدۇ.    بۇنى پەقەت بايلارنىڭ قارىغۇلارچە ئۈمىدى دەپ قاراشقا بولمايدۇ، چۈنكى دەل مۇشۇنداق تەپەككۇر بولغاچقا، بايلار باي بولالىغان. بولۇپمۇ بۈگۈنكى بىلىم ئىگىلىكى دەۋرىدە، مېڭىنىڭ تولدۇرۇلۇش دەرىجىسى يانچۇقنىڭ تولدۇرۇلۇش دەرىجىسىنى بەلگىلەيدۇ. ئوخشاشلا، پۇلغا تولغان يانچۇققا ئەقىل-پاراسەتكە تۇيۇنغان بىر ئۆتكۈر مېڭە ئارقا تۈۋرۈك ۋە كاپالەت بولۇشى كېرەك، بولمىسا ئۇ پەقەت ۋاقىتلىق بولىدۇ، خالاس.    يانچۇق ۋە مېڭىدىن ئىبارەت بۇ ئىككى نەرسىگە نىسبەتەن، بايلار ۋە نامراتلارنىڭ پوزىتسىيىسى قەتئىي ئوخشىمايدۇ. نامراتلار ھەمىشە ئۆزىنىڭ يانچۇقىدىكى پۇلغا كۆڭۈل بۆلىدۇ،يانچۇقىغا ئازراق نەرسە قوشۇلسا خۇش بولۇپ قېن – قېنىغا پاتمايدۇ، يانچۇقىدىن ئازراق نەرسە چىقىپ كەتسە پۇشايماننى ئالىدىغان قاچا تاپالمايدۇ. بىراق بايلارنىڭ قارىشىچە، نامراتلارنىڭ بۇنداق ھەرىكىتى ناھايىتى ئەخمىقانىلىق، ھەمدە  كىچىك بالىنىڭ ئىشىدەك كۆرۈنىدۇ. چۈنكى بايلار بايلىقنىڭ ئەقىللىق مېڭىدىن كېلىدىغانلىقىنى، بىلىمنىڭ بىرىنچى ئىشلەپچىقىرىش كۈچى ئىكەنلىكىنى بىلىدۇ.شۇنداقلا بايلىققا ئېرىشىپ تەقدىرىنى ئۆزگەرتىش، يانچۇقنى پۇلغا تولدۇرۇش ئۈچۈن، جەزمەن ئۆزىنىڭ مېڭىسىنى تەرەققىي قىلدۇرۇپ، ئۆزىنىڭ سەۋىيىسىنى ئۆستۈرۈش كېرەكلىكىنىمۇ بىلىدۇ.سەۋەبى -مېڭە بىلىم بىلەن تولۇقلانغاندىلا  يانچۇقمۇ شۇنىڭغا ئەگىشىپلا تولۇقلىنىشقا باشلايدۇ.    بۇ يەردە دىيىلىۋاتقان مېڭىنى تولۇقلاش دەل كونا كۆز – قاراشلارنى يېڭىلاشنى، توختىماستىن بايلىق توپلاشقا ياردىمى بولىدىغان يېڭى بىلىملەرنى قوبۇل قىلىشنى ۋە  ئەقلىي تەپەككۇر قىلىشنى كۆرسىتىدۇ. ئۇنداقتا  مېڭىمىزنى بىلىم بىلەن قانداق قوراللاندۇرىمىز؟ئەلۋەتتە توختىماستىن ئۆگىنىش ئارقىلىق بۇنى ئەمەلگە ئاشۇرىمىز.    بويىن. سۇش -دەۋرىمىزدىكى دۇنياغا داڭلىق ناتىق ۋە ئەڭ بۈيۈك مۇۋەپپەقىيەت تەدبىرى يىتەكچىسى. ئۇ ئادەتتىكى بىر ئائىلىدە تۇغۇلغان بولۇپ، تولۇق ئوتتۇرىدىكى ۋاقتىدا ئائىلىسىدىكى قىيىنچىلىق سەۋەبىدىن ئوقۇشتىن مەجبۇرىي توختىغان. بىلىمىنىڭ كەمچىللىكى سەۋەبلىك، ئۇ ھاياتىنىڭ ئالتۇندەك ۋاقىتلىرىدا نۇرغۇنلىغان جىسمانىي ئەمگەكلەرنى قىلغان، مەسىلەن: قاچا يۇيغۇچى، قۇرۇلۇش ئىشچىسى، ياغاچچى ۋە قۇدۇق قازغۇچى قاتارلىقلار.    30 ياشقا كىرىپمۇ يەنىلا نامرات تۇرمۇش كەچۈرىۋاتقان بويىن. سۇش ئۆزىدىن توختىماستىن:«نېمىشقا بەزى كىشىلەر ھەمىشە باشقىلارغا قارىغاندا باي؟ مەن قانداق قىلسام تەغدىرىمنى ئۆزگەرتىپ، نامراتلىقتىن قۇتۇلالايمەن؟» دەپ سورايدۇ.    توختىماستىن كۈزىتىش ۋە تەپەككۇر قىلىش ئارقىلىق، بويىن ئاخىرى شۇنى بايقاپتۇكى، ئۆزىنىڭ تەغدىرىنى ئۆزگەرتىپ نامراتلىقتىن قۇتۇلدۇرىغان ئاچقۇچ توختىماستىن ئۆگىنىپ،مېڭىسىنى تەرەققىي قىلدۇرۇش ئىدى.    بۇ نۇقتىنى دەل ۋاقتىدا ھېس قىلغان بويىن توختىماستىن تىرىشىش ئارقىلىق ئاخىرى مۇۋاپىقەيەت قازىنىپ نامراتلىقتىن قۇتۇلىدۇ، ھەمدە بىر بۈيۈك مۇلاھىزە يىتەكچىسىگە ئايلىنىدۇ.    ھەقىقەتەن مېڭە يەنى مېڭىدىكى ئەقىل-پاراسەت يانچۇقنىڭ قانداق بولۇشىنى بەلگىلەيدۇ. بايلىق يولى ئەمدىلا باشلانغاندا بۇرنىنىڭ ئۇچىنىلا كۆرۈپ پەقەت يانچۇققىلا كۆڭۈل بۆلگەندە، ئۇنداقتا يانچۇق پۇلغا قانچىلىك توشسىمۇ پەقەت ۋاقىتلىق بولىدۇ، ھەرگىزمۇ ئوزۇنغا بارمايدۇ. يانچۇقتىكى نەرسە بەدىنىمىزنىڭ سىرتىدىكى نەرسە بولۇپ، ھەم ئېرىشكىلى ھەم ئاسانلا يوقاتقىلى بولىدۇ، پەقەت مېڭىدىكى بىلىم ۋە ئەقىل-پاراسەتلا  ئوبيېكتىپ مەۋجۇتلۇق بولۇپ، ئۇ ئىزچىل چوڭ مېڭىمىزدە ساقلاقلىق بولىدۇ. ئۇنى خالىغانچە ئىشلىتەلەيمىز (ئەلۋەتتە ئۇ بىر قېتىملىق ئەمەس). ئالتۇن – كۈمۈش پۇلغا سېلىشتۇرغاندا، ئۇ كىشىلەر ئىگە بولغان ھەقىقىي بايلىق ھېسابلىنىدۇ.    شۇنىڭ ئۈچۈن، بايلار توختىماستىن ئۆگىنىشنى، مېڭىسىگە «ماي قاچىلاپ» تۇرۇشنى بىلىدۇ، ئۇلار پەقەت مۇشۇنداق قىلغاندىلا ئاندىن ئېرىشكىلى، داۋاملاشتۇرغىلى ھەمدە بايلىقنى زورايىتقىلى بولىدىغانلىقىنى بىلىدۇ.    لى جىياچېڭ شاڭگاڭغا كەلگەن دەسلەپكى ۋاقىتتىلا، ئەگەر شاڭگاڭدا پۇت دەسسەپ تۇرماقچى بولىدىكەن، چوقۇم شاڭگاڭ جەمئىيىتىگە كىرىش ۋە ماسلىشىش كېرەكلىكىنى،شاڭگاڭلىقلاردىن ئۆگىنىپ، تىل ئۆتكىلىدىن ئەڭ بۇرۇن ئۆتۈش لازىملىقىنى چۈشەنگەن.ئەگەر تىلنىمۇ بىلمىگەندە، بۇ جايدا ھايات كەچۈرۈش بىر مەسىلىگە ئايلىنىپ، چوڭ نەتىجە قازىنىشتىن گەپ ئاچقىلى بولمايىتتى. شاڭگاڭنىڭ ئورتاق تىلى بولسا گۇاڭدۇڭ تەلەپپۇزى بولۇپ، بۇ يەردە ياشاۋاتقان ئادەم بۇ تەلەپپۇزدا سۆزلىيەلمىسە،ئىلگىرىلىشى ناھايىتى تەس بولاتتى، شۇڭا چوقۇم تىل ئۆگىنىش كېرەك ئىدى. ئۇنىڭدىن باشقا ئېنگىلىزتىلى شاڭگاڭنىڭ ھۆكۈمەت تىلى بولۇپ سەل قاراشقا بولمايدىغان، ناھايىتى ياخشى بولغان ئالاقە قورالى ئىدى.    چاۋجۇدا چوڭ بولۇپ، چاۋجۇ تەلەپپۇزىدا سۆزلەيدىغان لى جىياچېڭ بۇ ئىككى خىل تىلغا نىسبەتەن ناھايىتى ناتونۇش ئىدى، قىيىنچىلىق ئۇنىڭغا ئايان بولۇپ، چوقۇم نۆلدىن باشلاپ ئۆگىنىشى كېرەك ئىدى.    كۆپ يىللىق تىرىشىش ئارقىلىق، لى جىياچېڭ ئاخىرى گۇاڭدۇڭ تەلەپپۇزى بىلەن ئېنگىلىز  تىلىدىن ئىبارەت بۇ ئىككى تىلنى ئىگەللىگەن، بۇ ئۇنىڭ كىيىنكى سودا ئىشلىرى ئۈچۈن مۇستەھكەم ئاساس سالغان.    بۇجەمئىيەتكە كىرگەن دەسلەپكى باسقۇچتا لى جىياچېڭ تاغىسىنىڭ جۇاڭجىڭيەندىكى شىركىتىدە شاگىرىت بولىدۇ، بۇ جەرياندا ئۇ توختىماستىن ئۆگىنىش ئارقىلىق باشقىلارغا قانداق مۇئامىلە قىلىشنى، پۇرسەتتىن قانداق پايدىلىنىشنى ئۆگەنگەن.    ئۇنىڭدىن كىيىن لى جىياچېڭ ئۆزىنىڭ تەرەپ – تەرەپلەردە چېپىپ يۈرۈيدىغان سېتىش خىزمىتىنى باشلاپ، توختىماستىن ئۆگىنىش ئارقىلىق ئۆزىنىڭ سودا بىلىملىرىنى موللاشتۇرۇپ،دەسلەپكى قەدەمدە ئۆزىدىكى سودا ھۈجەيرىسىنى شەكىللەندۈرگەن، ھەمدە نۇرغۇنلىغان دوست تۇتۇپ ئۇلاردىن ھەرخىل جەمئىيەت بىلىملىرىنى ئۆگەنگەن. شۇنىڭ بىلەن بىر ۋاقىتتا،سېتىقچىلىق جەريانىدا ئۇ سەمىمىي ئادەم بولۇشتەك جاھاندارچىلىق پەلسەپىسىنى ئۆگىنىۋالغان. بۇلارنىڭ ھەممىسى ئۇنى مەنپەئەتلەندۈرۈپ، ئۇنىڭ كىيىنكى ئىگىلىك يارىتىشى ئۈچۈن زور ياردەملەرنى بەرگەن.    ئېنىقكى، لى جىياچېڭنىڭ مۇۋەپپەقىيىتى ئۇنىڭ ئىزچىل ئۆگىنىش روھى ۋە توختىماستىن مېڭىسىگە ئىنىرگىيە توپلاشتەك روھى بىلەن مۇناسىۋەتلىك. ئەگەر مېڭىسىنى تەرەققىي قىلدۇرمىغان بولسا، لى جىياچېڭنىڭ شاڭگاڭدا ئادەتتىكى ئالاقىلەرنى ئېلىپ بېرىشىمۇ تەسكە چۈشۈپ، كىيىنكى تەرەققىياتىدىن گەپ ئاچقىلى بولمايىتتى؛ ئەگەر مېڭىسىنى تەرەققىي قىلدۇرمىغان بولسا، لى جىياچېڭ باشقىلارغا قانداق مۇئامىلە قىلىشنى،پۇرسەتتىن قانداق پايدىلىنىشنى ئۆگىنەلمىگەن بولاتتى؛ ئەگەر مېڭىسىنى تەرەققىي قىلدۇرمىغان بولسا، لى جىياچېڭنىڭ سودا، جەمئىيەت بىلىملىرى بىلەن تونۇشلۇق بولۇشى، سودا مەيدانلىرىدا غەلبە قازىنىشى مۇمكىن ئەمەس ئىدى.    شۇنىڭ ئۈچۈن بايلاردىكى ئەڭ پۇلغا يارايدىغان نەرسە ئۇنىڭدىكى بايلىق ئەمەس، بەلكى ئۇنىڭ ئەقىللىق مېڭىسى. باشقىچە ئېيىتقاندا، بايلار بىلەن سېلىشتۇرغاندا نامراتلارنىڭ نامراتلىقى پۇلدا ئەمەس، بەلكى ئۇلارنىڭ مېڭىسىدە.    كۆرۈۋالغىلى بولىدۇكى، نامراتلارنىڭ بايلارغا ئايلىنىشىدىكى ئەڭ زور يوشۇرۇن بايلىق ئۇلارنىڭ يانچۇقىدىكى ئازغىنە پۇلدا، ھەيۋەتلىك بەدەندە ئەمەس، بەلكى ئۇلارنىڭ مېڭىسىدە.    شۇنى بىلىش كېرەككى، دۇنيادا پەقەت ئۆزگەرتىشكە ئامالسىز بولغان نامرات مېڭە بار، ئۆزگەرتىشكە ئامالسىز بولغان نامرات يانچۇق يوق. شۇنىڭ ئۈچۈن دوستۇم، سىزنىڭ ئىقتىسادىڭىزدىن مەسىلە چىققان ۋاقىتتا، ھەرگىزمۇ ھە دىسىلا يانچۇقىڭىزغا دىققەت قىلماسلىقىڭىز كېرەك، چوقۇم ئۆزىڭىزنىڭ مېڭىسىنى ئاۋۋال تەكشۈرۈپ بېقىڭ. مېڭىنىڭ قىممىتى سىزنىڭ يانچۇقىڭىزنىڭ كېڭىيىشىنى بەلگىلەيدۇ. باي بولۇش ئۈچۈن ئاۋۋال ئۆزىمىزنىڭ نەزەر –دائىرىمىزنى كېڭەيتىشىمىز، بۇ ئارقىلىق مېڭىمىزنى تولۇقلىشىمىز كېرەك.    دىققەت قىلىش كېرەككى، ئالەمدىكى بارچە مەخلۇقاتلار توختىماستىن ئۆزگىرىدۇ، مېڭىمىزدىكى بىلىمنىڭمۇ ۋاقتى ئۆتۈپ كېتىدىغان چاغلىرى بولىدۇ. پەقەت دەۋر بىلەن تەڭ ئىلگىرىلەپ، توختىماستىن مېڭىمىزدىكى بىلىملەرنى يېڭىلىساقلا، ئاندىن رىقابەت كەسكىن بولغان بۈگۈنكى جەمئىيەتتە پۇت تىرەپ تۇرالايمىز. بايلىقنىڭ بايانى    دۇنيادىكى كاتتا زەردار بېل. گەيتىس ئىلگىرى: «مېنىڭ بارلىق بايلىقىمنى ئېلىپ كېتىپ مېنى قۇملۇققا تاشلاپ قويسا، ئەگەر بىر سودا ئەترىتى بۇ جايدىن ئۆتۈپلا قالسا، مەن يەنە بىر قېتىم دۇنيادىكى بىرىنچى بايغا ئايلىنىمەن.» دىگەن. مۇقىم، ئوزۇن مەزگىللىك بايلىققا ئېرىشىشتىكى ئاچقۇچ توختىماستىن ئۆزىنىڭ مېڭىسىنى بىلىم بىلەن تولۇقلاپ،ئىزچىل بايلىق ھەققىدىكى بىلىملەرنى ئۆگىنىشتە. سىزنىڭ مېڭىڭىز باي بولغاندا، پۇل –مال ئۆزلۈكىدىن سىزنىڭ يانچۇقىڭىزغا ئېقىپ كىرىدۇ.

WWW.UYHQT.COM

	بىرىنچى باب سەككىزىنچى پارگىراف ***8. نامراتلار باشقىلارنى مازاق قىلىشنى ياخشى كۆرىدۇ،بايلار ئۆزىنى ئىسپاتلاشقا ماھىر كېلىدۇ    ئازراقلا دىققەت قىلسىڭىز سىز رىئال تۇرمۇشتا مۇنداق بىر قىزىقارلىق ھادىسىنى بايقايسىز: نۇرغۇنلىغان نامراتلار باشقىلارنى مازاق قىلىشنى ياخشى كۆرىدۇ، بۇ خۇددى ئۇلارنى باشقىلاردىن يۇقىرى تۇرىدىغاندەك ھېسىياتقا كەلتۈرىدۇ. ئەمما بايلار ئۆزىنى ئىسپاتلاشنى ياخشى كۆرىدۇ، ئۇلار تەنقىد ياكى باشقىلارنى زاڭلىق قىلىش ئارقىلىق ئۆزىنى گەۋدىلەندۈرۈشكە مۇھتاج ئەمەس، ئەكسىچە ئۈن – تىنسىز ھالدا، كەمتەرلىك بىلەن ئەمەلىي ھەرىكىتى ئارقىلىق ئۆزىنى ئىسپاتلايدۇ.    قەدىمدىن بۇيان جۇڭگو – چەتئەللەردىكى بايلارنىڭ ئىچىدە باشقىلارنى مازاق قىلىش ئارقىلىق بايلىققا ئېرىشكەنلىرى يوق، ئۇلار بايلىق يولىدا ئۆزىنى ئىسپاتلاشنىڭ ھەقىقىي مۇۋەپپەقىيەت يولى ئىكەنلىكىنى چۈشىنىدۇ.    خۇڭدىڭلىق داڭلىق سودىگەر خۇشۆشى ئەزەلدىن باشقىلارنى زاڭلىق قىلمايدۇ، يەنە باشقىلار بىلەن ئۆزىنى سېلىشتۇرمايدۇ، ئۇ توختىماستىن ئۆزىنى ئىسپاتلايدۇ. نۇرغۇنلىغان كىشىلەر ئىلگىرى ئۇنىڭ ئالدىدا باشقىلارنى مازاق قىلىپ، ئۇلار توغرۇلۇق ئۆسەك سۆزلەرنى قىلغاندا، ئۇ بۇنىڭ باشقىلارنىڭ ئىشى ئىكەنلىكىنى، ئۇ پەقەت ئۆزىنى ئىسپاتلىسىلا بولىدىغانلىقىنى ئېيىتقان. خۇشۆشىنىڭ قارىشىچە ئۆزىنى ئىسپاتلاش ھەرگىزمۇ باشقىلارنى ئارقىدا قالدۇرۇش ئەمەس، بەلكى ئۆزىنىڭ ئىلگىرىلىشى ئۈچۈندۇر.    كورىيەدىكى داڭلىق گورۇھ «سامسۇڭ» نىڭ قۇرغۇچىسى، «كارخانىدىكى تالانتلىق ئەرۋاھ» دەپ تەرىپلەنگەن لى بىڭجى دەل بىر ئاز – بىر ئازدىن تىرىشىش ئارقىلىق ئۆزىنى ئىسپاتلىغان. ئۇ «سامسۇڭ» دىن ئىبارەت سودا دۇنياسىدىكى گىگانىتنى بەرپا قىلدى، بۇ گىگانىتنىڭ سەركىسى بولۇش سۈپىتى بىلەن لى بىڭجىمۇ كورىيەدىكى بىرىنچى مالىيە ماگناتىغا ئايلىنىپ، ئىسمى – جىسمىغا لايىق بايغا ئايلاندى.    نۇرغۇنلىغان بايلارنىڭ ئىچىدە، ياپونىيەنىڭ ئالدىنقى باش ۋەزىرى ماشېڭ تەيلاڭنىڭ ئىچكى كابېنىتىدا ئىستىمال ھۆددىگىرى بولغان ۋەزىر يېتىيەن شېڭزى ئۆزىنى ئىسپاتلاشقا ماھىر بايلارنىڭ ۋەكىلى.    يېتىيەن شېڭزى 1960 – يىلى ياپونىيە فۇفېڭدىكى بىر ئادەتتىكى ئائىلىدە دۇنياغا كەلگەن.1983 – يىلى شاڭجى ئۇنىۋېرسىتىتى چەتئەل تىللىرى فاكولىتىتى سېىشتۇرما مەدەنىيەتشۇناسلىق كەسپىدىن ئوقۇش پۈتتۈرگەن.    ئوقۇش پۈتتۈرگەندىن كىيىن يېتىيەن شېڭزى توكيو ئىمپىرىيە مېھمانسارىيىغا كۈتكۈچىلىككە بۆلۈنگەن. رەھبەرلىك ئۇنى ياتاق بۆلۈمىدە ھاجەتخانا تازىلاشقا ئورۇنلاشتۇرغان،ھەمدە ھاجەتخانىدىكى تەرەت قاچىسىنىڭ ناھايىتى پاكىز بولۇشىنى تەلەپ قىلغان.    ئۆزىنىڭ خىزمىتىنىڭ نېمە ئىكەنلىكىنى بىلگەن يېتىيەن شېڭزى ئۆزىنى بوزەك قىلىنغاندەك ھېس قىلغان. ئەمدىلا ئالى مەكتەپنى پۈتتۈرگەن بۇ قىزغا نىسبەتەن، تەرەت قاچىسى تازىلاش ئۇنىڭغا قىلىنغان ھاقارەت ھېسابلىناتتى. يېتىيەن شېڭزى ئۆزىنىڭ قارىشىچە ناھايىتى قاملاشمىغان بۇ خىزمەتتىن ئىستىپا بەرمەكچى بولىدۇ، ھالبۇكى ئىرادىسى كۈچلۈك بولغان بۇ قىز ئۆزىنىڭ بۇنداقلا مەغلۇب بولۇشىغا تەن بەرمەيدۇ،چۈنكى ئۇ ئوقۇش پۈتتۈرگەندە توختىماستىن ئۆزىگە شۇنداق ئېيىتقان: ھاياتىمنىڭ بىرىنچى قەدىمىنى چوقۇم ياخشى ئالىمەن.    يېتىيەن شېڭزىنىڭ كۆڭلى ناھايىتى زىددىيەتلىك تۇرغاندا، مېھمانسارايدىكى بىر كونا خىزمەتچى ئۇنىڭ يېنىغا كېلىدۇ، ھەمدە تازىلىق سايمانلىرىنى ئېلىپ يېتىيەن شېڭزىغا خىزمەتنى قانداق قىلىشنى كۆرسىتىپ قويىدۇ. بۇ كونا خىزمەتچىنىڭ تەرەت قاچىسىنى قايتا –قايتا سۈرتۈپ، ناھايىتى پاكىز قىلىۋەتكەنلىكىنى، ئارقىدىنلا تەرەت قاچىسىغا سۇنى لىق تولدۇرۇپ، ھەمدە ئۇنىڭ ئىچىدىن بىر ئىستاكان سۇنى ئېلىپ گەپ قىلماستىنلا ئىچىۋەتكەنلىكىنى كۆرىدۇ. ئۇ پۈتكۈل جەريانغا ناھايىتى تونۇشلۇق بولۇپ، ئازراقمۇ ئېۋەن تاپقىلى بولمايىتتى.    كونا خىزمەتچىنىڭ سۇنى ئىچىۋىتىشى يېتىيەن شېڭزىنىڭ قەلبىنى  لەرزىگە سالىدى، ھەم بۇ ئىش ئۇنىڭ ئېسىدىن ئۆمۈر بويى چىقمىدى. شۇنىڭ بىلەن بىر ۋاقىتتا، ئۇ بۇنىڭدىن ناھايىتى ئاددى، ھېس قىلىش ئاسان بولغان ھەقىقەتنى ھېس قىلدى: رەھبەر ساڭا تەرەت قاچىسىنى ناھايىتى پاكىز قىل دەپ تەلەپ قىلسا، ئۇنداقتا ئۆزەڭنى قانداق ئىسپاتلىشىڭ كېرەك؟ ئۆزى تازىلاپ پاكىزلىغان تەرەت قاچىسىدىكى سۇنى ئىچىۋېتىشنىڭ ھەر قانداق گەپ – سۆزگە قارىغاندا قايىل قىلىش كۈچى يۇقىرى بولىدۇ.    شۇنداق قىلىپ، يېتىيەن شېڭزى بىر ئۆمۈر ھاجەتخانا تازىلىسىمۇ، چوقۇم نەتىجە قازىنىشنى كۆڭلىگە پۈكتى. ئۇ پۈتۈن دىققىتى بىلەن ھاجەتخانا تازىلاش خىزمىتى قىلىشقا كىرىشتى. ئەستايىدىل، جاپادىن قورقمايدىغان بولغاچقا، ئۇنىڭ خىزمىتىنىڭ سۈپىتى ناھايىتى تىزلا ئۆلچەمگە يىتىپ، ھېلىقى كونا خىزمەتچىنىڭ سەۋىيىسىدىن ھالقىپ كەتتى.    ئۆزىنىڭ خىزمەتنى ناھايىتى ئىنچىكە قىلىدىغانلىقىنى. ئۆزىگە ئىشىنىدىغانلىقىنى ئىسپاتلاش ئۈچۈن، يېتىيەن شېڭزى كۆپ قېتىم ئۆزى تازىلىغان تەرەت قاچىسىدىكى سۇنى ئىچكەن.شىركەتتىكى خىزمەتداشلىرى ۋە رەھبەرلەر ئۇنىڭ كەسىپنى ھۆرمەتلەش روھىدىن تەسىرلىنىپ، بىردەك ھالدا ئۇنى شىركەتتىكى ئەڭ مەسئۇلىيەتچان، كەسىپنى ئەڭ ھۆرمەتلەيدىغان خىزمەتچى دەپ قارىغان. بۇنىڭغا ئەگىشىپ يېتىيەن شېڭزىنىڭ ئىناۋىتى ئۆسكەن، دەرىجىسى يۇقىرى كۆتۈرۈلۈپ مۇئاشىمۇ ئۆرلىگەن.    شۇنداق قىلىپ، كەسىپنى ھۆرمەتلەش، توختىماستىن تىرىشىش ئارقىلىق ئۆزىنى ئىسپاتلاش يېتىيەن شېڭزىنىڭ خاراكتېرىدىكى ئايرىلماس بىر قىسىمغا ئايلانغان. ئۇ مەيلى قايسى خىزمەتنى قىلسۇن، ئۆزىنىڭ ئەڭ ياخشى قىلالايدىغانلىقىنى تىرىشىپ ئىسپاتلىغان.    يېتىيەن شېڭزى توختىماستىن تىرىشىش ئارقىلىق ئۆزىنىڭ ئىقتىدارىنى قايتا – قايتا ئىسپاتلىغان، ئۇنىڭ ئىشلىرىمۇ كۈنسىرى راۋاج تاپقان.    1987 – يىلى27 ياشقا كىرگەن يېتىيەن شېڭزى گىفۇ ناھىيىسىنىڭ پارلامېنت ئەزالىقىغا سايلىنىپ،ئەينى ۋاقىتتىكى ئەڭ ياش پارلامېنىت ئەزاسىغا ئايلانغان. ھالبۇكى يېتىيەن شېڭزى بۇ نەتىجىدىن قانائەتلىنىپ قالماي، توختىماستىن ئەمەلىي ھەرىكىتى ئارقىلىق ئۆزىنى ئىسپاتلىغان.    1998 – يىلى7 – ئايدا، يېتىيەن شېڭزى شاۋيۈەن خۇيسەن ئىچكى كابېنتىنىڭ پوچتا ۋەزىرلىكىنى ئۆزئۈستىگە ئېلىپ، ياپونىيەدىكى ئەڭ ياش ئىچكى كابېنت ئەزاسىغا ئايلانغان. كىيىن ئۇ ماشېڭ تەيلاڭ ئىچكى كابېنتىدا ئىستىمالغا مەسئۇل ۋەزىرگە ئايلانغان.    بىر تەرەت قاچىسى تازىلايدىغان ئادەتتىكى خىزمەتچىدىن ياپونىيە ئىچكى كابېنتىنىڭ ۋەزىرىگە ئايلىنىشتىن ئىبارەت- يېتىيەن شېڭزىنىڭ بۇ  كىشىلىك ھايات سەرگۈزەشتىسى ئادەمنى ھاڭ – تاڭ قالدۇرىدۇ. ئۇنىڭ بۇنچە نەتىجىلەرگە ئېرىشىشىنى ئۇنىڭ ئۆزىنى ئىسپاتلاشقا ماھىرلىقىدىن ئايرىپ قارىغىلى بولمايدۇ.    دەل ئۆزىنى ئىسپاتلاشقا ماھىر بولغاچقا، يېتىيەن شېڭزى باشقىلارنىڭ نەزىرىدە ناھايىتى تۆۋەن سانالغان تەرەت قاچىسى تازىلاش خىزمىتىدىن باشلاپ يۇقىرىغا ئۆرلىيەلىگەن؛ ئۆزىنى ئىسپاتلاشقا ماھىر بولغاچقا، يېتىيەن شېڭزى ناھىيەدىكى ئەڭ ياش پارلامېنت ئەزاسىغا ئايلىنالىغان؛ ئۆزىنى ئىسپاتلاشقا ماھىر بولغاچقا، ئايال زاتى بولغان يېتىيەن شېڭزى ئەرلەرنى ھۆرمەتلەپ، ئاياللارنى پەس كۆرۈش ئىدىيىسى ئېغىر بولغان ياپونىيەدە ئىچكى كابېنت باش ۋەزىرلىكىگە سايلىنالىغان.    ئەگەر يېتىيەن شېڭزى پەقەتلا باشقىلارنى مازاق قىلىشنى، باشقىلارنى پەس كۆرۈشنى ياختۇرۇپ، ئۆزىنى ئىسپاتلاش ئارقىلىق ئۆزىنىڭ ئورنىنى يۇقىرى كۆتۈرمىگەن بولسا، ئۇ جەزمەن ھېلىقى كونا خىزمەتچىنىڭ تەرەت قاچىسىدىكى سۇنى ئىچكەن «ئەخمىقانە»ھەرىكىتىنى ئەيىپلىگەن، بۇ ھەرىكەتنىڭ ئىچىدىكى ئۆزىگە قوزغىتىش بېرەلەيدىغان ھەقىقەتنى بايقىيالىشى تېخىمۇ مۇمكىن بولمىغان بولاتتى؛ ئەگەر ئۇ باشقىلارنى زاڭلىق قىلىپ ئۆزىنى ئىسپاتلاشقا ماھىر بولمىغان بولسا، ئۇ ھەرگىز گەۋدىلىك نەتىجە قازىنالمىغان، ئىچكى كابېنتنىڭ ۋەزىرى بولالمىغان بولاتتى؛ ئەگەر يېتىيەن شېڭزى پەقەت باشقىلارنى مازاق قىلىپ ئۆزىنى ئىسپاتلاشقا ماھىر بولمىغان بولسا، ئۇھەرگىزمۇ بىر مېھمانساراينىڭ ھاجەتخانىسىدىن ياپونىيەنىڭ سىياسىي سەھنىسىگە چىقالمىغان بولاتتى.    يېتىيەن شېڭزىنىڭ سەرگۈزەشتىلىرىدىن بىز مۇنداق بىر ھەقىقەتنى بايقايمىز: مەيلى قانچىلىك كۆزگە ئىلىنمايدىغان كىچىك جايلار بولسۇن، بىز ئۆزىمىزنى ئىپادىلەپ، ئۆزىمىزنى ئىسپاتلايدىغان چوڭ سەھنىگە ئىگە بولالايمىز؛ ئەگەر سىز ئەڭ كىچىك، ھېچكىم كۆزگە ئىلمايدىغان خىزمەتنى ياخشى قىلالىسىڭىز، ئۆزىڭىزنىڭ ئىقتىدارىنى ئىسپاتلاپ بېرەلىسىڭىز،بايلىق شۇنىڭغا ئەگىشىپلا كېلىدۇ. ئەكسىچە، ھەمىشە باشقىلارنى مازاق قىلىپ،ئەمەلىي ھەرىكىتىڭىز ئارقىلىق ئۆزىڭىزنى ئىسپاتلىمىسىڭىز، ئۇ چاغدا چوقۇم بايلىق رىقابىتىدە مەغلۇب بولىسىز.    يېتىيەن شېڭزى، خۇشۆشى، لى بىڭجى قاتارلىق بايلارنىڭ كىشىلىك ھاياتى بىزگە شۇنى ئېيتىپ بېرىدۇ: باشقىلارنى زاڭلىق قىلىپ ئۆزىنى كۆرسىتىشنىڭ ئۈنۈمى، كونكېرىت، ئەمەلىي ھەرىكىتى ئارقىلىق ئۆزىنى ئىسپاتلىغانغا يەتمەيدۇ، پەقەت شۇنداق قىلغاندىلا،ئاندىن بايلىق يولىغا قاراپ دادىل قەدەم تاشلىغىلى بولىدۇ.   نامراتلىقتىن قۇتۇلۇپ باي بولۇشنى ئويلايدىغان دوستلار، ئۆزىڭلەرگە قاراپ بېقىڭلار، سىلەردە  مۇشۇنداق پەزىلەت بارمىكەن؟     بايلىقنىڭ بايانى    باشقىلارنى چۈشۈرۈش ئۇسۇلى بىلەن ئۆزىنىڭ ئورنىنى يۇقىرى كۆتۈرۈش بولسا نامراتلارنىڭ ئادەتلەنگەن ھىيلە – مىكىرى. بۇنداق ئۇسۇلنىڭ ھېچقانداق پايدىسى يوق.ئادەم بۇ خىل ئۇسۇلنى قوللانغاندا ئۆزىنىڭ ئىلگىرىلىشىنى قولغا كەلتۈرەلمەيلا قالماستىن، يەنە نۇرغۇنلىغان زۆرۈرىيىتى يوق ئاۋارىچىلىقلارنى كەلتۈرۈپ چىقىرىدۇ. پەقەت بايلارغا ئوخشاش ئۆزىنى ئىسپاتلاشقا ماھىر بولغاندىلا، ئاندىن بايلىق رىقابىتىدە يىتەكچى ئورۇننى ئىگىلىگىلى بولىدۇ.

WWW.UYHQT.COM

	بىرىنچى باب توققۇزىنچى پارگىراف ***9. نامراتلار مەغلۇب بولسا ۋاز كېچىدۇ، بايلار مەغلۇب بولسا قايتىدىن باشلايدۇ بۇ بۆلەكنى ئوقۇشتىن بۇرۇن بىز ئاۋۋال بىر تاللاش سۇئالىنى كۆرۈپ باقايلى:    سىز ئىلگىرىكى ۋاقىتلاردا مەغلۇبىيەتكە دۇچار بولسىڭىز قانداق ئىنكاس قايتۇراتتىڭىز؟ A.ۋاز كىچىمەن       B. قايتىدىن باشلايمەن    نەتىجىنى خۇلاسىلىگەندىن كىيىن بىز شۇنىڭغا ئىشىنىمىزكى، Aجاۋابنى تاللىغان دوستلار ھازىرغىچە ھېچقانداق ئىش قىلالمىغان ھالەتتە، B نى تاللىغانلارنىڭ ئىچىدە چوقۇم ئىشلىرىدا نەتىجە قازانغان،تۇرمۇشى پاراۋان كىشىلەر بار.    ئەگەر بۇتاللاش سۇئالىنى تېخىمۇ ئاددى سۆز بىلەن ئىپادىلىسەك، ئۇ ھالدا:    بايلىق قوغلىشىش جەريانىدا سىز نامراتلىققا قاراپ ماڭامسىز ياكى بايلىققا قاراپ ئىلگىرىلەمسىز؟    A. نامراتلىققا قاراپ ماڭىمەن      B. بايلىققا قاراپ ماڭىمەن    ئىككىنچى خىل تاللاش سۇئالىنى كۆرگەندىن كىيىن، كۆپچىلىك چوقۇم دىيىشىۋالغاندەكلا B جاۋابنى تاللايدۇ. بۇنىڭدىن كۆرۈۋالغىلى بولىدۇكى، ھەر بىرئادەمدە بايلاردىن بولۇش ئىستىكى بولىدۇ، ھالبۇكى ئەمەلگە ئاشۇرۇش ئۇنداق ئاسان ئەمەس،كۆپىنچە كىشىلەر نامرات بولۇپ، بايلار ئاز سانلىقنى ئىگەللەيدۇ. بۇنداق ھادىسىنى كەلتۈرۈپ چىقىرىدىغان سەۋەبلەر ناھايىتى كۆپ، بىزنىڭ بۇيەردە مۇھاكىمە قىلىدىغىنىمىز بولسا كىشىلەرنىڭ مەغلۇبىيەتكە بولغان ئوخشىمىغان پوزىتسىيىسى.    ماقال –تەمسىللەردە: «كىشىلىك ھايات ئەگرى – توقاي بولىدۇ.» دىيىلگەن. ھەر بىر ئادەمنىڭ تۇرمۇشىنىڭ بىر ئۆمۈر راۋان، ئوڭۇشلۇق ئۆتىشى مۇمكىن ئەمەس، مەغلۇبىيەتتىن ساقلىنىش تەس، بىراق ھەر بىر ئادەمنىڭ مەغلۇبىيەتكە بولغان پوزىتسىيىسى ئوخشىمايدۇ، بۇ دەل بايلار بىلەن نامراتلارنىڭ پەرقى.    نامراتلار مەغلۇبىيەتكە دۇچ كەلگەندە پۈتۈنلەي باش ئېگىپ زەربىگە ئۇچراپ، مەغلۇب بولىدۇ،شۇنىڭدىن كىيىن قايتا باشلاشقا جۈرئەت قىلالماي، ھەممە تىرىشچانلىقلىرىدىن ۋازكېچىدۇ، نەتىجىدە ۋاقىتلىق مەغلۇبىيەتتىن قايتا باش كۆتۈرۈش پۇرسىتىگە ئېرىشەلمەيدۇ. بايلار ئوخشىمايدۇ، ئۇلار ئوڭۇشسىزلىق ئىچىدىن پۇرسەتنى تاپالايدىغانلىقىغا چوڭقۇر ئىشىنىدۇ، شۇ سەۋەبتىن مەغلۇبىيەتكە دۇچ كەلسىمۇ ئاكتىپلىق بىلەن، ناھايىتى سوغۇققان ھالدا مەغلۇب بولۇشنىڭ سەۋەبىنى تەھلىل قىلىدۇ، تەجرىبىلەرنى خۇلاسىلەيدۇ، ئاندىن قايتىدىن بېشىنى كۆتۈرۈپ بايلىق يولىغا قاراپ ماڭىدۇ.    بۈگۈنكى كۈندە، كىنتاكىنىڭ ماركا لايىھەسى ئۈستىدىكى ياشانغان كىشى نۇرغۇنلىغان كىشىلەرنىڭ قەلب تۆرىدىن ئورۇن ئالدى (ئۇ كىنتاكىنىڭ قۇرغۇچىسى ھالىن. سەندىش). ھالبۇكى ئۇنىڭ كىنتاكىنىڭ قۇرۇش جەريانىدىكى ئەگرى – توقاي سەرگۈزەشتىسىنى كىشىلەر تېخى بىلمەيدۇ.    1890 – يىلى 9 – ئاينىڭ 9 –كۈنى، ھالىن ئامېرىكىنىڭ ئىندىئانا شىتاتىدىكى شىلۋېرغا يېقىن بولغان بىر ئېكىنزارلىقتا تۇغۇلغان. ئائىلىدىكى سەۋەب تۈپەيلى، ئۇ ناھايىتى بالدۇرلا تاماق ئىتىشنى ئۆگەنگەن، ئۇنىڭ پىشۇرۇش تېخنىكىسىمۇ بۇ ۋاقىتتا ناھايىتى زور ئىلگىرىلەشكە ئېرىشكەن.    سەندىش كىچىك ۋاقىتلىرىدا نۇرغۇنلىغان خىزمەتلەرنى قىلغان، مال ساتقۇچى، ئاقلىغۇچى، ئوت ئۆچۈرۈش خادىمى قاتارلىق ئىشلارنى قىلغان. 40 ياش ۋاقىتلىرىدا ئۇ كېنتۇككى شىتاتىدا بىر ماي قاچىلاش پونكىتىنى قۇرغان، يىراق يوللاردىن ھېرىپ – ئېچىپ كەلگەن ئاشۇ كىشىلەرگە قاراپ، سەندىش ماي قاچىلاش پونكىتىدىكى كىچىك ئاشخانىدا قولايلىق يىمەكلىكلەرنى تەييارلاپ ئۇلارنى كۈتۈۋېلىشنى قارار قىلغان. بۇ ۋاقىتتا، سەندىش ئۆزىنىڭ ئاشپەزلىك ھۈنىرىنى چىقارغان، بۇ دەل كىيىنكى دۇنياغا داڭقى چىققان كىنتاكى تىز تاماقخانىسىدىكى توخۇ پىشۇرۇش شەكلى ئىدى. تەمى ناھايىتى ئۆزگىچە بولغاچقا، قاقلانغان توخۇ كاۋىپى كىشىلەرنىڭ بىردەك ياخشى باھاسىغا ئېرىشكەن،ھەتتا بەزىلەر بۇ كاۋاپنىڭ نامىنى ئاڭلاپ ئاتايىتەن يىگىلى كېلىدىغان بولغان.    ناھايىتى تىزلا، قاقلانغان توخۇ كاۋاپلىرى ئەسلىدىكى ماي قاچىلاش سودىسىدىن ئېشىپ كېتىپتۇ،توخۇ كاۋىپى يىگىلى كەلگەنلەر ماي قاچىلىغىلى كەلگەنلەردىن كۆپ بوپتۇ. توخۇ كاۋىپىنىڭ سودىسى ناھايىتى قىزىپ كەتكەچكە، ماي قاچىلاش پونكىتىغا ئادەم پاتمايدىغان بوپتۇ، بۇ ۋاقىتتا سەندىش ماي قاچىلاش پونكىتىنىڭ ئۇدۇلىغا بىر تىزتاماقخانا ئېچىپ، مەخسۇس توخۇ كاۋىپى يىگىلى كەلگەنلەرنى كۈتۈۋاپتۇ.    تاماقخانىنىڭ داڭقى بارغانسىرى تارقىلىپ، كېلىدىغان كىشىلەرنىڭ ئايىغى ئۈزۈلمەپتۇ. 20 –ئەسىرنىڭ 30 – يىللىرىدىكى چوڭ كاساتچىلىق مەزگىلىدىمۇ سودا ناھايىتى ياخشى بوپتۇ.ھالبۇكى بەختنىڭ ئىچىدە بەختسىزلىكمۇ بولىدۇ، ئىككىنچى دۇنيا ئۇرۇشىنىڭ پارتىلىشى ۋە كېنتۇككى شىتاتلىق يۇقىرى سۈرئەتلىك تاشيولنىڭ ياسىلىشى سەندىشنىڭ سودىسىغا ئېغىر تەسىر يەتكۈزۈپ، ئۇنىڭ بارلىق پىلانلىرىنى قالايمىقان قىلىۋېتىپتۇ.قەرزلىرىنى قايتۇرۇش ئۈچۈن، ئۇ مال – مۈلۈكلىرىنى سېتىپتۇ، ھەتتا بانكىدىكى ئامانەت پۇلىسىنىمۇ ئىشلىتىپ تۈگىتىپتۇ. بىر كېچىنىڭ ئىچىدىلا، ھالىن. سەندىش كىشىلەر ھۆرمەت قىلىدىغان بايدىن ھېچنىمىسى يوق نامراتقا ئايلىنىپ قاپتۇ.    بۇ ۋاقىتتا سەندىش ئاللىقاچان 66 ياشقا كىرگەن ئىدى، پەقەت ھۆكۈمەت تارقاتقان 105 ئامېرىكا دوللىرىغا تايىنىپ تۇرمۇشىنى قامدايىتتى، تۇرمۇشى ناھايىتى جاپالىق ئىدى. يېشى ئاتمىشتىن ھالقىغان سەندىش بۇ سەۋەبتىن ۋاز كەچمىدى، ئۇ قۇرۇق قول ئىگىلىك تىكلەپ،قايتىدىن باشلاشنى قارار قىلدى.    شۇنداق قىلىپ ئۇ ئۆزىنىڭ توخۇ كاۋىپى پىشۇرۇش رېتسىپىنى ئېلىپ، كېنتۇككى شىتاتىدىن ئېگەي شىتاتىغا كىلىپ ئۆزىنىڭ پىلانىنى ھەر بىر ئاشخانا خوجايىنىغا ئېيتىپتۇ. ئەگەرقايسى ئاشخانا بۇنى قوبۇل كۆرسە، ئۇلارغا رېتسىپنى ئىشلىتىش ھوقۇقىنى سېتىپ بېرىپ،ماتېرىياللىرىنى تەمىنلەيدىكەن، ھەمدە ئۇلارغا پىشۇرۇش ئۇسۇلىنى ئۆگىتىپ قويىدىكەن.    ئىشنى يېڭىدىن باشلىغاندا كىشىلەر سەندىشكە ئىشەنمەپتۇ، ھەممىسى ئۇنىڭغا مازاق قىلغان پوزىتسىيەدە مۇئامىلە قىپتۇ. ھەتتا بەزى ئاشخانىنىڭ خوجايىنلىرى بۇ قېرىنىڭ گىپىنى ئاڭلاش ۋاقىتنى ئىسراپ قىلغانلىق دەپ قاراپتۇ. شۇ سەۋەبتن سەندىشنىڭ تونۇشتۇرۇپ سېتىش خىزمىتى ناھايىتى قىيىن بوپتۇ.بىراق ئۇ يەنىلا ۋاز كەچمەپتۇ، ئۇنىڭ ئاياغ ئىزى پۈتكۈل ئامېرىكا زىمىنىنى قاپلاپتۇ، ئىككى يىلدا 1009 قېتىم رەت قىلىنىپتۇ، ئاخىرى 1010 قېتىمدا سەندىشنىڭ ئويىنى باشقىلار قوبۇل قىپتۇ.    ھەر بىرئىشنىڭ باشلانمىقى تەس، بىرىنچى ئادەم بولغان ئىكەن، ئىككىنچى، ئۈچىنچىسىمۇ بولىدۇ... سەندىشنىڭ توختىماستىن تىرىشىش ئارقىسىدا ئۇنىڭ ئويلىرى تېخىمۇ كۆپ كىشىلەر تەرىپىدىن قوبۇل قىلىنىپتۇ، كەسپىمۇ بارغانسىرى راۋاجلىنىپتۇ، ئاخىرىدا تەرەققىي قىلىپ بۈگۈنكى پۈتۈن دۇنياغا داڭلىق بولغان كىنتاكى زەنجىرسىمان تىز تاماقخانىسىغا ئايلىنىپتۇ.    ئەگەر ئۆزىڭىزنىڭ ئاز – ئازدىن ياراتقان بايلىقلىرىڭىزنىڭ بىر كېچىنىڭ ئىچىدىلا يوقىلىپ كەتكەنلىكىنى كۆرسىڭىز، سىز قانداق قىلىسىز؟ نۇرغۇنلىغان كىشىلەر چوقۇم كۆڭلى سوۋۇپ، ھەرگىزمۇ قايتىدىن باشلاشدەك ئىشەنچى ۋە جاسارىتى قالمايدۇ – دە، ۋازكېچىدۇ. ھالبۇكى ئاللىقاچان 66 ياشقا كىرگەن ھالىن. سەندىش ئۇنداق قىلمىغان،شۇنچىلىك ئېغىر زەربىگە دۇچ كەلگەندىمۇ، ئۇ قايتىدىن باشلاشنى تاللىغان.    شۇنداق قىلىپ باشقىلارنىڭ نەزىرىدە ئۆيىدە جىم ئولتۇرۇپ ئاخىرقى ئۆمىرىنى خاتىرجەم ئۆتكۈزۈشى كېرەك بولغان بۇ ياشانغان كىشى نام – نىشانسىز، قۇرۇق قول ئەھۋال ئاستىدا، ئۆيىدىن چىقىپ، ئۆزىنىڭ بايلىق سەپىرىنى قايتىدىن باشلىغان.    ئويلاپ باقايلى، ئەگەر ھالىن. سەندىش تۇيۇقسىز كەلگەن زەربىنىڭ ئالدىدا باش ئېگىپ ۋاز كەچكەن بولسا، ئۇنداقتا ئۇ يەنە ئۆمىرىنىڭ ئاخىرىدا قايتا باش كۆتۈرۈپ، بايلىق ۋە شان – شەرەپكە ئېرىشەلەمتى؟ ئەگەر ئۇ باشقىلارنىڭ مازاق قىلىشى ۋە رەت قىلىشى ئارقىسىدا ۋاز كىچىپ، قايتا سىناش پۇرسىتىنى قولدىن بېرىپ قويغان بولسا، ئۇنداقتا بۈگۈن بىز كىنتاكىنىڭ مەززىلىك تاماقلىرىدىن بەھىر ئېلىپ، ماركا ئۈستىدىكى ئۇ ياشانغان كىشىنىڭ تەبەسسۇمىنى كۆرەلەمدۇق؟    جاۋاب ئەلۋەتتە «ياق». ئەگەر مەغلۇبىيەتكە قايتىدىن يۈزلىنىدىغان جاسارەت ۋە قايتىدىن باشلايدىغان چىداملىق روھ بولمىسا، ھالىن. سەندىشنىڭ ياشانغان ۋاقىتلىرىمۇ قۇتقۇزۇش پۇلىسىغا تايىنىپ ئۆتكەن،  كىيىنكىلەرمۇ ئۇنىڭ توخۇ كاۋىپىنىڭ مەززىلىك تەمىدىن بەھرە ئالالمىغان بولاتتۇق.   مەغلۇبىيەتكە نىسبەتەن، ھالىن. سەندىش قايتىدىن باشلاشنى تاللىدى. بىر 60تىن ھالقىغان ئادەم بۇنداق قىلغان يەردە، بەدىنى ساغلام بولغان بىز ياشلارچۇ؟    تارىخقا ۋە رىئال تۇرمۇشتىكى بايلارغا نەزەر سالىدىغان بولسىڭىز سىز شۇنى بايقايسىزكى،ئۇلارنىڭ ھەممىسىدە ھالىن. سەندىشقا ئوخشاش ئاسانلىقچە ۋاز كەچمەيدىغان، كۈچلۈك روھ بار، مەسىلەن: سودا مەيدانلىرىدا قاتتىق مەغلۇبىيەتكە دۇچ كەلگەن شى يۈجۇاڭ؛مۇۋەپپەقىيەت قازىنىشتىن بۇرۇن بەش قېتىم ۋەيران بولغان ھېنرى. فۇت قاتارلىقلار.    كۆرۈۋالغىلى بولىدۇكى، بايلىق سەپىرى جەريانىدا مەغلۇپ بولغاندىن كىيىن ۋاز كىچىشنى تاللىغان كىشىلەرنىڭ كۆپىنچىسى سەپتىن چۈشۈپ قالغانلار، قايتا باش كۆتۈرۈشنى تاللىغانلار بولسا بۇ سەپتىن چىقىپ مۇۋەپپەقىيەت قازىنالايدۇ.    شۇنىڭ ئۈچۈن، قەدىرلىك دوستۇم، ئېھتىمال سىز يېقىندا خوجايىنىڭىز تەرىپىدىن ئىشتىن بوشىتىلغانسىز؛ ئېھتىمال سىز ھازىر ئۆيىڭىزدە خىزمەت كۈتۈپ، خىزمەت تاپالمىغان بولۇشىڭىز مۇمكىن؛ ئېھتىمال سىز ئىلگىرى سودا مەيدانلىرىدا مەغلۇبىيەتكە دۇچاربولغانسىز؛ ئېھتىمال ... بىراق ئېسىڭىزدە تۇتۇڭ، بۇ مەغلۇبىيەت ۋە ئوڭۇشسىزلىق ھەممىسى ۋاقىتلىق، پەقەت سىز قايتىدىن باشلاشنى تاللىسىڭىزلا، ئىزچىل تىرىشسىڭىز،چوقۇم بايلىق ئىشىكىدىن ھالقىيدىغان كۈنىڭىز كېلىدۇ. بايلىقنىڭ بايانى :    كىشىلىك ھاياتتا دائىم ئۇنداق ياكى مۇنداق كېلىشمەسلىك، كۆڭۈلسىزلىك بولۇپ تۇرىدۇ،تۇيۇقسىز كەلگەن ئاشۇ زەربە ۋە مەغلۇبىيەت خۇددى يولنىڭ ئىككى تەرىپىدىكى«چاتاقچى» لارغا ئوخشايدۇ، تۇيۇقسىز سىزنىڭ ئالدىڭىزدا پەيدا بولۇپ، سىزنىڭ بايلىق يولىڭىزنى توسىدۇ. ئەگەر ئەڭ ئاخىرقى مەنزىلگە يىتىپ بارماقچى بولسىڭىز، سىز ھەرگىزمۇ ئارقىڭىزغا چىكىنمەسلىكىڭىز، يولىڭىزدىكى توسالغۇلارغا خاتىمە بېرىشىڭىزكېرەك. بىلىشىڭىز كېرەككى،  مەغلۇبىيەتنىڭ يەنە بىر ئىسمى «ۋاز كېچىش» تۇر.

WWW.UYHQT.COM

	بىرىنچى باب ئونىنچى پارگىراف 10.نامراتلار «ئۇتتۇرۇپ قويماسلىق» نى ئويلايدۇ، بايلار «چوقۇم ئۇتۇپ چىقىش» نى ئويلايدۇ    بىر ئىشنى قىلىشتىن بۇرۇن، نامراتلارنىڭ كۆڭلىدە ئويلايدىغىنى بولسا «ئۇتتۇرۇپ قويماسلىق»،ئەمما بايلار قەتئىي ھالدا «مەن چوقۇم يېڭىشىم كېرەك» دەپ ئويلايدۇ. كۆپچىلىك قانداق قاراشتىن قەتئىينەزەر بۇ ئىككى خىل ئوي-پىكىرنىڭ مەنىسى بىردەك بولىدۇ.  بىراق پىسخولوگىيەلىك  نۇقتىنەزىرى بۇيىچە قارىغاندا ئۇلارنىڭ پەرقى ناھايىتى چوڭ.    «ئۇتتۇرۇپ قويماسلىق» تىن ئىبارەت پىسخىكا پاسسىپ تەرەپنى چىقىش قىلغان ھالدا مەسىلىلەرنى ئويلايدۇ، «ئۇتتۇرۇپ قويماسلىق» تىن ئىبارەت بۇ ئوي پەيدا بولغاندىن كىيىنلا، نامراتلار ئىش قىلغاندا ئىزچىل مۇداپىئەلىنىش ھالىتىدە تۇرىدۇ، ناھايىتى ئېھتىياتچان بولۇپ، توخۇ يۈرەكلىك قىلىدۇ، ئۆزىنىڭ مەلۇم بىر ھەرىكىتىنىڭ مەغلۇب بولۇشىنى كەلتۈرۈپ چىقىرىشىدىن قورقىدۇ. بىلىش كېرەككى، بۇ خىل باشلىنىشتىلا ئۇتتۇرۇپ قويۇشتىن قورقىدىغان پىسخىكا بايلىق ئىزدەش يولىدىكى توسالغۇ بولۇپ ھېسابلىنىدۇ.    بايلارئويلايدىغان «چوقۇم يېڭىش» تىن ئىبارەت پىسخىكا ئاكتىپ تەرەپتىن چىقىش قىلىپ مەسىلىلەرنى ئويلايدۇ، «چوقۇم يېڭىش» تىن ئىبارەت جەزمەن يېڭىدىغاندەك پىسخىكىلىق ھالەت پەيدا بولغاندىن كىيىن، بايلار ئىش قىلغاندا ناھايىتى كۆپ يۈرەك قېنىنى ۋە تىرىشچانلىقىنى سەرىپ قىلىپ،  ئاكتىپلىق بىلەن ئىلگىرىلەپ، «ئاخىرغىچە بەرداشلىق بەرمىسەم قايتمايمەن» دىگەن روھ بۇيىچە ئىلگىرىلەيدۇ. بۇ خىل كۈچلۈك مۇۋپپەقىيەت قازىنىش ئىستىكى ئالدىدا پۈتۈن دۇنيا يول بېرىدۇ، ئۇنداقتا بايلىقچۇ؟    ئەگەر سىز بۇ گەپنى ھەددىدىن زىيادە مۇبالىغە قىلىۋىتىلگەن دەپ قارىسىڭىز، ئۇنداقتا بىزمۇنداق بىر سېلىشتۇرما قىلىپ باقايلى: مۇسابىقە جەريانىدا ئىككى نەپەر ئەمەلىي كۈچى ئوخشاش بولغان ماھىر مۇسابىقىلىشىۋاتقان بولسا، ئۇلارنىڭ بىرى «مەن چوقۇم يېڭىشىم، ھەمدە يەڭگەندىمۇ ناھايىتى ئۇستىلىق بىلەن يېڭىشىم كېرەك.» دەپ ئويلايدۇ؛يەنە بىرى قورقۇنچ بىلەن «مەن ئۇتتۇرسام بولمايدۇ، ئۇتتۇرغان تەقدىردىمۇ ئېچىنىشلىق ئۇتتۇرۋىتىشكە بولمايدۇ.» دەپ ئويلىسا، ئۇنداقتا قايسى ماھىرنىڭ غەلبىنى قولغا كەلتۈرۈش نىسبىتى يۇقىرى بولار؟    جاۋاپ ناھايىتى ئېنىق، كۈچ نىسبىتى ئوخشاش بولغان ئەھۋالدا، شىجائىتى كۈچلۈك بولغان تەرەپنىڭ يېڭىش نىسبىتى يۇقىرى. كۆرۈۋېلىشقا بولىدۇكى، غەلبە قازىنىشقا بولغان ئىشەنچ ۋە جاسارەت غەلبە قىلىش ياكى مەغلۇب بولۇشنى بەلگىلەيدىغان مۇھىم ئامىل.ئوخشاشلا، بايلىق رىقابىتى جەريانىدا «چوقۇم يېڭىمەن» دەپ ئويلايدىغان ئادەمنىڭ ئېرىشىدىغان بايلىقى «ئۇتتۇرۇشقا بولمايدۇ» دەپ ئويلايدىغان ئادەمنىڭكىدىن كۆپ بولىدۇ.    رۇەنكۇ شىركىتىنىڭ قۇرغۇچىسى، باش لېدىرى قوشۇمچە مەمۇرىيەت يۈرگۈزگۈچىسى سۈن جېڭيى «چوقۇم يېڭىمەن»دەيدىغان شىجائىتى بار بايلاردىن.    سۈن جېڭيى1957 – يىلى ياپونىيەدە تۇغۇلغان. 1973 – يىلى تولۇق ئوتتۇرىدا ئوقۇۋاتقان سۈن جېڭيى ئائىلىسىدىكىلەرگە ئەگىشىپ ياپونىيەدىن ئامېرىكىنىڭ كالفورنىيە شىتاتىغا كۆچۈپ، بروكلىن ئۇنىۋېرسىتىتىغا ئېنگلىزتىلى ئۆگىنىشكە كىرگەن. نەتىجىسى ياخشى،ئەقىللىق ۋە زىرەك بولغاچقا، سۈن جېڭيى 1977 – يىلى كالفورنىيە ئۇنىۋېرسىتىتى بروكلىن تارماق مەكتىپىگە ئىقتىساد ئۆگىنىشكە كىرگەن.    ئالى مەكتەپتىكى مەزگىلدە، سۈن جېڭيى ئامېرىكا پۈركىمە تەتقىقات ئورگىنىنىڭ تەجرىبە ئۈسكۈنىلىرىدىن پايدىلىنىپ  كۆپ  تىللىق تەرجىمە ئەسۋابىنى  ياساپ چىقىدۇ، ھەمدە بىر مىليون ئامېرىكا دوللىرىلىق باھادا پاتنېت ھوقۇقىنى شارپ شىركىتىگە سېتىپ بېرىدۇ (بۇ كىيىن شارپ شىركىتى ياساپ چىققان Wizard تىپىدىكى مەھسۇلاتنىڭ ئۈلگىسى)، بۇ ئارقىلىق سۈن جېڭيى ھاياتىدىكى تۇنجى مەبلەغنى قولغا كەلتۈرىدۇ. ئۇنىڭدىن باشقا، سۈن جېڭيى ياپونىيەدىن ئېلېكترونلۇق ئويۇنچۇق ماشىنىسى كىرگۈزۈپ، مەكتەپنىڭ يېقىن ئەتراپىدا قوراشتۇرۇپ سېتىش تىجارىتىنى باشلايدۇ، ھەمدە كۆپ خىل ئېلېكترونلۇق ئويۇنچۇقلارنى لايىھەلەپ چىقىدۇ.    19 ياشلىق سۈن جېڭيى ئوقۇۋاتقان ۋاقتىدىلا ئۆزىنىڭ كىيىنكى 50 يىللىق ھاياتىنى پىلانلاپ بولىدۇ. يەنى قانداق قىلىپ مەبلەغ جۇغلاپ شىركەت قۇرۇش، ئۆزىنىڭ كەشپىيات يارتىش ۋە ئۇنى مەسھۇلاتقا ئايلاندۇرۇش پىلانىنى قانداق ئىشقا ئاشۇرۇش ۋە ھەر ئون يىلدا يەتمەكچى بولغان نىشان قاتارلىقلارنى تەپسىلى  پىلانغا ئالىدۇ .ھەمدە نۇرغۇن قېتىملاپ سېلىشتۇرۇش ئارقىلىق تەرەققىياتى دەسلەپكى باسقۇچتا تۇرۋاتقان كومپيۇتېر ۋە ئېنتېرنىت كەسپىگە كىرىشنى قارار قىلىدۇ، شۇنداقلا چوقۇم بۇ كەسىپتە مۇۋەپپەقىيەت قازىنىشنى كۆڭلىگە پۈكىدۇ. «چوقۇم يېڭىش» تىن ئىبارەت ئىستەكنى كۆڭلىگە پۈككەن سۈن جېڭيى ئۆزىنىڭ بايلىق يارىتىش سەپىرىنى باشلايدۇ.    1980 – يىلى23 ياشلىق سۈن جېڭيى كالفورنىيە شىتاتىنىڭ ئوكلاند شەھىرىدە UnisonWorld كومپيۇتېر شىركىتىنى قۇرۇپچىقىدۇ.  ئالىي مەكتەپنى پۈتتۈرگەندىن كىيىن ياپونىيەگە قايتىپ كېلىپ، يۇمشاق دېتال بانكىسى شىركىتىنى قۇرۇپ چىقىپ كومپيۇتېر يۇمشاق دېتاللىرىنى توپ تارقىتىش خىزمىتى بىلەن شۇغۇللىنىدۇ.ئىزچىل «چوقۇم يېڭىمەن» دەيدىغان پىسخىكىدا بولغاچقا، سۈن جېڭيىنىڭ شىركىتىنىڭ يۇمشاق دېتال سېتىش سوممىسى پۈتكۈل ياپونىيە بۇيىچە بىرىنچى ئورۇندا تۇرىدۇ. 1994 –يىلى سۈن جىڭيى شىركەتنىڭ پېيىنى بازارغا سالىدۇ، ھەمدە بىر مىليارىد 40 مىليون ئامېرىكا دوللىرى جۇغلاپ يۇمشاق دېتال گورۇھىغا ئايلىنىپ، ئۆزىنىڭ گۈللىنىش سەپىرىنى داۋام ئېتىدۇ.    1995 – يىلى سۈن جېڭيى «چوقۇم يېڭىش كېرەك» دەيدىغان ئىدىيە بۇيىچە ئاساسلىق زېھنىنى توركەسپىگە بېرىپ، بۇ جەھەتتە يۈكسەك نەتىجە قازىنىشنى قارار قىلىدۇ. ئۇ ئاۋۋال ئىككى مىليون ئامېرىكا دوللىرى مەبلەغنى ياخو شىركىتىگە بېرىدۇ، كىيىن ياخو شىركىتىنىڭ %33 پېيىغا ئىرىشىش  شەرتى ئاستىدا شىركەتنى يەنە بىر مىليارىد ئامېرىكا دوللىرى مەبلەغ بىلەن تەمىنلەيدۇ. ئۇ ۋاقىتتا ياخو شىركىتىنىڭ قۇرغۇچىسى ياڭ جىيۈەن سۈن جېڭيىنىڭ تەلپىنى ئاڭلىغاندىن كىيىن ناھايىتى ھەيران قېلىپ ئۇنى ساراڭ بوپتۇ دەپ ئويلايدۇ. چۈنكى، ياڭ جىيۈەن ئۆزىمۇ ياخو شىركىتىنىڭ كەلگۈسىنىڭ قانداق بولىدىغانلىقىنى بىلمەيدىغان شارائىت ئاستىدا، سۈن جېڭيى ئەمدىلا قۇرۇلغان يېڭى شىركەتكە شۇنچە كۆپ مەبلەغ سېلىشقا قانداقمۇ پېتىنسۇن؟ ئەگەر مەغلۇب بولسا قانداق بولىدۇ؟    ھالبۇكى،«چوقۇم يېڭىمەن» دەيدىغان شىجائىتى بار سۈن جېڭيى ياڭ جىيۈەندەك ئىككىلىنىپ ئولتۇرماي، 1996 – يىلى ئۆزىنىڭ مەبلەغ سېلىش ۋەدىسىنى رەسمىي ئەمەلگە ئاشۇردى.ئارقىدىنلا ياخو شىركىتىگە يەنە نۇرغۇن مەبلەغ سالدى، مەبلەغنىڭ ئومۇمىي سوممىسى ئۈچ مىليارىد 55 مىليون ئامېرىكا دوللىرىغا يەتكەن ئىدى. سۈن جېڭيىنىڭ نۇرغۇنلىغان مەبلىغىگە ئېرىشكەندىن كىيىن، ياخو شىركىتى بىرلا سەكرەپ دۇنيادا ئالدىنقى قاتاردىكى تور شىركىتىگە ئايلاندى، ھەمدە ئەڭ چوڭ پايچېك بولۇش سۈپىتى بىلەن سۈنجېڭيىمۇ بۇنىڭدىن نۇرغۇن پايدىغا ئېرىشىپ، ئۇنىڭ شىركىتى رۇەنكۇمۇ ئېنتېرنىت ئىنقىلابىدىكى سەردارغا ئايلاندى.    بۈگۈنكى كۈندە سۈن جېڭيى قۇرغان يۇمشاق دېتال بانكىسى گورۇھىمۇ پۈتكۈل يەر  شارى مىقياسىدا 400 دىن ئارتۇق تورشىركەتلىرىگە مەبلەغ سېلىپ، ياخو، Etrade قاتارلىق بىرىنچى ئورۇندا تۇرىدىغان تور شىركەتلىرىنىڭ ئاساسلىق پايچېكىگە ئايلانغان. سۈن جېڭيىنىڭ رۇەنكۇ شىركىتىدە  نۇرغۇنلىغان مۇھىم ۋەزىپىسى بولغاندىن تاشقىرى،يەنە باش ۋەزىر سايلام رىقابىتى كومېتىتىنىڭ ئاساسلىق ئەزاسى. ئۇدا بىر نەچچە يىل«يەر شارىدىكى ئون چوڭ سەردار» بولۇپ باھالانغان. «فوربىس» ژورنىلى ئۇنىڭغا باھابېرىپ «ياپونىيەدىكى ئەڭ بازارلىق كارخانىچى» دەپ تەرىپلىگەن .ئاخبارات ۋاستىلىرىنىڭ خەۋەرلىرىدە ئۇ «رەقەم دەۋرىدىكى ياپونىيەدە ئەڭ شەرەپلىك كارخانىچى»دەپ ئاتالغان.    سۈن جىڭيىنىڭ بىر ئۆمۈرلۈك بايلىق سەرگۈزەشتىسىدىن بىز شۇنى كۆرۈۋالالايمىزكى، ئۇنىڭ بۈگۈنكىدەك زورغەلبىگە ئېرىشىشىنى ئۇنىڭ «چوقۇم يېڭىمەن» دەيدىغان شىجائىتىدىن ئايرىپ قارىغىلى بولمايدۇ. دەل مۇشۇ خىل غەلبە قازىنىشقا بولغان قەتئىيلىك بولغاچقا، ئۇ ئۆزىنىڭ بۈگۈنكى بايلىق پادىشاھلىقىنى قۇرۇپ چىقىپ، بايلىق دەرىخىدىكى سانجاق – سانجاق مېۋىلەرگە ئېرىشكەن.    ئەگەر«چوقۇم يېڭىمەن» دەيدىغان ئىرادىسى بولمىغاندا، سۈن جېڭيىنىڭ ئوقۇغۇچىلىق ۋاقىتلىرىدىلا ئۆزىنىڭ 50 يىللىق ھاياتلىق پىلانىنى تۈزىيەلىشى، ھەمدە ئۇنىڭ ئۈچۈن كۆرەش قىلىشى مۇمكىن ئەمەس ئىدى؛ ئەگەر «ئۇتتۇرۇشقا بولمايدۇ»، «ئۇتتۇرسام نېمە ئامال» قاتارلىق ئەنسىرەشلەر ھەمىشە ساقلانسا، سۈن جېڭيىدا ئەمدىلا قۇرۇلغان ياخوشىركىتىگە مەبلەغ سالىدىغان غەيرەت ۋە جاسارەت بولمىغان بولاتتى، بۈگۈنكىدەك ناھايىتى چوڭ بولغان خەلقئارالىق تور شىركىتىنى قۇرۇپ چىقىشى تېخىمۇ مۇمكىن بولماس ئىدى؛ ئەگەر كۆڭلىدە «ئۇتتۇرۇشقا بولمايدۇ» بولۇپ، «چوقۇم يېڭىش» بولمىغاندا ئىدى،سۈن جېڭيىنىڭ 37 ياش ۋاقتىدىلا 10 مىليارىد ئامېرىكا دوللىرىلىق كاتتا زەردارغا ئايلىنىشى مۇمكىن ئەمەس ئىدى.    بۇنىڭدىن كۆرۈۋالغىلى بولىدۇكى، بايلىق رىقابىتى جەريانىدا «چوقۇم يېڭىمەن» دەيدىغان ئىرادىدە بولۇش مۇۋەپپەقىيەت قازىنىشنىڭ ئالدىنقى شەرتى، بۇ خىل چوقۇم يېڭىش پىسخىكىسى بولغاندا، ھەمدە توختىماستىن تىرىشقاندىلا بايلىق قولىمىزغا  كېلىدۇ.    پۇل تېپىپ باي بولماقچى بولغان دوستۇم، ئۆزىڭىزگە قاراپ بېقىڭ، ئۆزىڭىزنىڭ پىسخىكىسىنىڭ دۇرۇس ياكى ئەمەسلىكىگە قاراپ بېقىڭ، سىزدە باي بولۇشقا نىسبەتەن كۈچلۈك ئىرادە بارمۇ – يوق؟ بايلىقنىڭ بايانى:   مۇۋەپپەقىيەت قازىنىش ئارزۇسى بىر خىل ئاكتىپ روھى ھالەت. ئۆز-ئۆزىگە ‹ مەن چوقۇم غەلبە قىلىمەن› دەيدىغان ئاڭ ۋە يۈكسەك   شىجائەت. بۇ پۇلدىنمۇ مۇھىم بولغان، ھېچكىممۇ تارتىۋالالمايدىغان بايلىق. بايلار بۇ خىل بايلىققا ئىگە، شۇڭا ئۇلار پۇل بىلەن ئېتىشىۋاتقان چاغدا ھەمىشە «چوقۇم يېڭىمەن» دەپ ئويلايدۇ. ئەمما نامراتلار ھەمىشە ‹ ئۇتتۇرۇپ قويمىساقلا تەلىيىمىزنىڭ كەلگىنى شۇ› دەپ ئويلايدۇ،چوقۇم غەلبە قازىنىشنى ئويلاشقا تېخىمۇ پېتىنالمايدۇ. بۇ خىلدىكى پاسسىپ پىسخىكىلىق ھالەت بىلەن بايلىق رىقابىتىدە ئۇتۇپ چىققىلى بولامدۇ؟