جۇڭگو دېڭىز ئارمىيەسىنىڭ پاراخوتى يەمەندىن چېكىنگەن 225 چەتئەللىكنى ئېلىپ شۇ يەرنىڭ ۋاقتى بىلەن 2-ئاپرېل سائەت 19 دىن 15 مىنۇت ئۆتكەندە جىبۇتى پورتىغا تىنچ ئامان يېتىپ باردى، كېيىنكى خىزمەتلەرگە ھەر قايسى دۆلەتلەرنىڭ جىبۇتىدا تۇرۇشلۇق ئەلچىخانىلىرى مەسئۇل بولۇپ ئورۇنلاشتۇرىدۇ.
بۇ قېتىم چېكىنگەن 225 چەتئەللىك پاكىستان، ئېفىئوپىيە، سىنگاپور، ئىتالىيە، ئېرلاندىيە، پولشا، گېرمانىيە، كانادا، ئەنگلىيە، يەمەندىن ئىبارەت ئون دۆلەتتىن كەلگەن.
جۇڭگونىڭ جىبۇتىدا تۇرۇشلۇق باش ئەلچىسى، جىبۇتى دىپلوماتىيە مىنىستىرلىقى، پاكىستاننىڭ ئېفىئوپىيەدە تۇرۇشلۇق باش ئەلچىسى، ئېفىئوپىيەنىڭ جىبۇتىدا تۇرۇشلۇق باش ئەلچىسى، گېرمانىيەنىڭ جىبۇتىدا تۇرۇشلۇق باش ئەلچىسى قاتارلىقلار پىرىستانغا چىقىپ كۈتۈۋالدى.
جىبۇتىنىڭ دىپلوماتىيە مىنىستىرى يۈسۈپ مۇنداق دېدى: جۇڭگونىڭ چەتئەللىك مۇھاجىرلارنى چېكىندۈرۈشكە ياردەم بەرگەنلىكىگە مىننەتدارلىق بىلدۈرىمەن، سىلەرنىڭ ھەرىكىتىڭلار كىشىنى تەسىرلەندۈردى.
پاكىستاننىڭ ئېفىئوپىيەدە تۇرۇشلۇق باش ئەلچىسى داستاجىر مۇنداق دېدى: جۇڭگو بىلەن پاكىستان دوست بولۇپلا قالماستىن، قېرىنداش.
جۇڭگو دېڭىز ئارمىيەسىنىڭ مۇھاپىزەتچى پاراخوتىنىڭ قوماندانى جاڭ گوپىڭ مۇنداق دېدى: چەتئەللىك پۇقرالارنى چېكىندۈرۈشكە ياردەم بېرىش، جۇڭگونىڭ چوڭ دۆلەتلىك خىسلىتىنى تولۇق نامايان قىلدى، شۇنداقلا جۇڭگو دېڭىز ئارمىيەسىنىڭ ياخشى ئوبرازىنى ئەكس ئەتتۈردى.