شىنخۇا تورى، سانائا، 26-مارت تېلېگراممىسى: سەئۇدى ئەرەبىستان قاتارلىق دۆلەتلەر 26-مارت يەمەندىكى خۇسەي قوراللىقلىرىغا ھاۋادىن ھۇجۇم قىلغان.
يەمەن دۆلەت مۇداپىئە مىنىستىرلىقىنىڭ ئۆزىنى ئاشكارىلاشنى خالىمىغان بىر ئەمەلدارىنىڭ شىنخۇا تورى مۇخبىرىغا ئېيتىشپ بېرىشىچە، ئۇرۇش ئايروپىلانلىرى پايتەخت سانائادىكى نۇرغۇن نىشانلارغا راكېتا بومبا قويۇپ بەرگەن، شىئە مەزھىپىدىكى خۇسەي قوراللىق تەشكىلاتى ئىگىلىۋالغان شىمالدىكى بىر ھاۋا ئارمىيە بازىسى ۋە جەنۇبتىكى زۇڭتۇڭ مەھكىمىسىمۇ بومباردىمان قىلىنغان. شۇنىڭ بىلەن بىر ۋاقىتتا، ھاۋا ھۇجۇمىدا يەنە سانائانىڭ جەنۇبىدىكى ھۆكۈمەت ئارمىيەسىنىڭ بىر راكېتا بومبا ئامبىرىمۇ ۋەيران بولغان.
بۇ ئەمەلدارنىڭ ئېيتىشىچە، خۇسەي تەشكىلاتى ھاۋا ھۇجۇمىغا قارشى توپ ئېتىپ قارشىلىق بىلدۈرگەن.
خۇسەي قوراللىق تەشكىلاتى سىياسىي بىيۇروسى ( ئەڭ ئالىي تەدبىر بەلگىلەش ئورگىنى ) نىڭ ئەزاسى مۇھەممەد بۇكاخاتتى مۇخبىرغا مۇنداق دېگەن: سەئۇدى ئەرەبىستان تاجاۋۇز قىلىپ كىرىپ يەمەن خەلقىگە جەڭ ئېلان قىلدى، بىز قايتۇرما ھۇجۇم قىلىمىز، بۇنىڭ بىلەن پۈتۈن رايون ئومۇميۈزلۈك ئۇرۇش ھالىتىگە ئۆتۈشى مۇمكىن.
يەمەننىڭ سابىق زۇڭتۇڭى سالىھ رەھبەرلىكىدىكى مەملىكەتلىك خەلق قۇرۇلتىيى پارتىيەسىمۇ بايانات ئېلان قىلىپ مۇنداق دېگەن: سەئۇدى ئەرەبىستاننىڭ ‹‹ ب د ت ئاساسىي قانۇنى ۋە ئىككى دۆلەت ھۆكۈمىتىنىڭ ئارىسىدىكى كېلىشىمگە خىلاپلىق قىلغانلىقىنى ئەيىبلەيمىز.
يەمەن زۇڭتۇڭى ھادى ۋە ئۇنىڭ ئاساسلىق ئىتتىپاقدىشى سەئۇدى ئەرەبىستان نۇرغۇن قېتىم سالىھنىڭ خۇسەي قوراللىق تەشكىلاتىنى قوللاپ، يەمەن ھاكىمىيىتىنى ئاغدۇرۇشقا ئۇرۇنغانلىقىنى ئەيىبلىگەن.
يەنە بىر خەۋەردە ئېيتىلىشىچە، سەئۇدى ئەرەبىستاننىڭ ئامېرىكىدا تۇرۇشلۇق باش ئەلچىسى ئادېر شۇ يەر ۋاقتى 25-مارت كەچتە مۇنۇلارنى بىلدۈرگەن، سەئۇدى ئەرەبىستاننى ئۆز ئىچىگە ئالغان 10 دۆلەت شۇ كۈنى كەچتە يەمەن خۇسەي قوراللىقلىرىغا ھاۋادىن ھۇجۇم قىلدى.
ئادىرنىڭ تاراتقۇلارغا ئېيتىپ بېرىشىچە، ھاۋا ھۇجۇمىنىڭ مەقسىتى يەمەن زۇڭتۇڭى ھادىنىڭ قانۇنلۇق ھۆكۈمىتىنى ‹‹ قوغداش ۋە مۇھاپىزەت قىلىش ››ئىكەن. ئۇ يەنە: سەئۇدى ئەرەبىستان ھاۋا ھۇجۇمىدا ئامېرىكا بىلەن سۆھبەتلەشتى، لېكىن ئامېرىكا بۇ قېتىمقى ھەربىي ھەرىكەتكە قاتناشمىدى، دېدى. ئۇ بۇ قېتىمقى ھاۋا ھۇجۇمىغا قايسى دۆلەتلەرنىڭ قاتناشقانلىقىنى ئاشكارلىمىدى.
خۇسەي قوراللىق تەشكىلاتى يەمەننىڭ شىمالىدىكى سادا ئۆلكىسىنى ئۇزۇن مەزگىل ئىشغال قىلىۋالغان بولۇپ، 2010-يىلى يەمەن ھۆكۈمىتى بىلەن ئۇرۇش توختىتىش كېلىشىمى ئىمزالاپ، ھۆكۈمەت ئارمىيەسى بىلەن بولغان ئالتە يىللىق قوراللىق توقۇنۇشنى ئاخىرلاشتۇرغان. 2014-يىلى 9-ئايدا خۇسەي قوراللىقلىرى پايتەخت سانائانى كونترول قىلىۋالغان، بۇ يىل 1-ئايدا يەمەن زۇڭتۇڭ قوغدىغۇچىلىرى بىلەن توقۇنۇشقان ھەمدە زۇڭتۇڭ مەھكىمىسىنى ئىگىلىۋالغان، كېيىن زۇڭتۇڭ ھادىنى نەزەربەند قىلىۋالغان. ھادى 21-فېۋرال سانادىن قېچىپ دايادىڭ شەھىرىگە بېرىۋالغان ھەمدە زۇڭتۇڭلۇق ۋەزىپىسىنى ئەسلىگە كەلتۈرگەن.
25-مارت خۇسەي قوراللىق تەشكىلاتى ئادېن شەھىرىگە ھۇجۇم قىلغان ھەمدە 26-مارت سەھەردە ئادېن خەلقئارا ئايرودۇرۇمىنى كونترول قىلىۋېلىپ، ئادېن شەھىرىدىكى زۇڭتۇڭ مەھكىمىسىنىڭ قىسمەن بىنالىرىنى بۇزۇۋەتكەن. زۇڭتۇڭ ھادى يېقىندا ب د ت خەۋپسىزلىك كېڭىشىگە خەت يېزىپ، يەمەندە تېخىمۇ كۆپ قالايمىقانچىلىقنىڭ كېلىپ چىقىشىنىڭ ئالدىنى ئېلىش ئۈچۈن، ب د ت نىڭ دەرھال ياردەم قىلىشىنى مۇراجىئەت قىلغان. يەمەن دىپلوماتىيە مىنىستىرى يادې 25-مارت مىسىردا ئەرەب دۆلەتلىرىنىڭ يەمەنگە قارىتا ھەربىي ھەرىكەت قوللىنىپ، خۇسەي قوراللىق تەشكىلاتىنىڭ ھۇجۇمىنى توسۇشنى مۇراجىئەت قىلغان.