جۇڭگو ئۇيغۇرچە رادىيو تورى 9-ئىيۇن بېيجىڭ خەۋىرى:
دەسلەپكى مەلۇماتتىن قارىغاندا، تۈركىيەدە ھاكىمىيەت يۈرگۈزۈۋاتقان ھەققانىيەت ۋە تەرەققىيات پارتىيەسى 7-ئىيۇن ئېچىلغان پارلامېنت سايلىمىدا %41.45 ئاۋازغا ئېرىشىپ، باشقا پارتىيەلەردىن ئۈستۈن تۇرغان. بىراق پارلامېنتتا يېرىمدىن كۆپرەك ئورۇننى ئىگىلىيەلمىگەنلىكتىن بىر پارتىيە ئۆز ئالدىغا ھاكىمىيەت يۈرگۈزەلمەيدۇ.
ھازىرقى ئېرىشكەن ئاۋاز سانىدىن قارىغاندا، ھەققانىيەت ۋە تەرەققىيات پارتىيەسى 261 ئۇرۇنغان، جۇمھۇرىيەت خەلق پارتىيەسى 130 ئورۇنغا، مىللىي ھەرىكەت پارتىيەسى 84 ئورۇنغا، خەلق دېموكراتىك پارتىيەسى 75 ئورۇنغا ئېرىشكەن. تۈركىيە سايلام قانۇنىغا ئاساسلانغاندا، پارلامېنتتا ئېرىشكەن ئورنى يېرىمىدىن كۆپرەكىنى ئىگىلىسە ئۆز ئالدىغا كابىنېت تەشكىللەپ ھاكىمىيەت يۈرگۈزسە بولىدۇ. ئېرىشكەن ئاۋاز نىسبىتى %10 گە يەتمىگەن پارتىيە پارلامېنتقا كىرەلمەيدۇ. ئەگەر بىر پارتىيە پارلامېنتتىكى ئورۇننىڭ يېرىمىدىن كۆپرەكىنى ئىگىلىيەلمىسە، تۇنجى چوڭ پارتىيە بولۇش سۈپىتى بىلەن باشقا پارتىيەلەر بىلەن بىرلەشمە ھۆكۈمەت قۇرۇش ئۈستىدە ئىزدەنسە بولىدۇ.