جۇڭگو ئاخبارات تورى سان پاۋلۇ 15-مارت تېلېگراممىسى : بىرازىلىيە تاراتقۇلىرىنىڭ خەۋىرىگە قارىغاندا، بىرازىلىيەنىڭ جەنۇبىدىكى سانتا كاتارىننا ئىشتاتىدا يۈز بەرگەن ساياھەت ئاپتوبۇسى قىيادىن چۈشۈپ كېتىش ۋەقەسىدە، شۇ يەر ۋاقتى 15-مارت سائەت 11:40 گىچە 54 ئادەم قازا قىلغان، ئۈچ ئادەم يارىلانغان. بىرازىلىيە زۇڭتۇڭى روسوف قازا قىلغانلارغا تەزىيە بىلدۈرگەن ھەمدە ئۇلارنىڭ ئائىلە-تاۋابىئاتلىرىدىن ھال سورىغان .

خەۋەر قىلىنىشىچە، بۇ ۋەقە 14-مارت چۈشتىن كېيىن سائەت 5:30 ئەتراپىدا سانتا كاتارىننا ئىشتاتىدىكى 418-نومۇرلۇق يۇقىرى سۈرئەتلىك تاشيولنىڭ 89 كىلومېتىرلىق يېرىدە يۈز بەرگەن. ئەينى چاغدا بىر ساياھەت ئاپتوبۇسى ئايلانمىدىن ئەگىلىدىغان چاغدا كونتروللىقىنى يوقىتىپ، 400 مېتىر چوڭقۇرلۇقتىكى قىيادىن چۈشۈپ كېتىپ، نۇرغۇن ئادەم قازا قىلغان ۋە يارىلانغان، بەزى ئېغىر يارىدارلار دوختۇرخانىغا ئېلىپ بېرىش جەريانىدا قازا قىلغان. نۆۋەتتە، قازا قىلغانلار ئىچىدە ئاپتوبۇسنىڭ شوپۇرى، سەككىز بالا ۋە ئۈچ ئۆسمۈر بار ئىكەن .

ۋەقە يۈز بەرگەندىن كېيىن يەرلىكتىكى مۇناسىۋەتلىك تارماقلار نەق مەيدانغا بېرىپ جىددى قۇتقۇزۇش ئېلىپ بارغان. سانتا كاتارىننا ئىشتاتىنىڭ باشلىقى رايمۇن دوكولومبو مۇنداق دېگەن: بۇ بىزنىڭ ئىشتاتتا يۈز بەرگەن ئەڭ ئېغىر بىر قېتىملىق قاتناش ۋەقەسى، بىز يارىدارلارنى پۈتۈن كۈچىمىز بىلەن قۇتقۇزىمىز .

خەۋەردە ئېيتىلىشىچە، بۇ ساياھەت ئاپتوبۇسىدىكى يولۇچىلارنىڭ كۆپىنچىسى پارانا ئىشتاتىغا دىنىي پائالىيەتكە قاتنىشىش ئۈچۈن ماڭغانلار ئىكەن .