جاھان ئاگېنتلىقى 13-مارت خەۋىرى؛ لەگلەك تورى تەرجىمىسى: قاتار ئەمىرى شەيىخ تەمىم ئىبنى ھاماد ئەل سانى، قاتارغا تۈركىيە ھەربىي بازىسى قۇرۇلۇشى ھەققىدىكى قاراردىن كېيىن، تۈركىيە پرېزىدېنتى رەجەب تاييىب ئەردوغان بىلەن تۈركىيە پايتەختى ئەنقەرەدە كۆرۈشتى.
تۈركىيە پرېزىدېنت سارىيىدىن ئېرىشكەن خەۋەرگە ئاساسلانغاندا، قاتار ئەمىرى  ئال سانى تۈركىيەدىكى زىيارىتى جەريانىدا، ئىنىرگىيە ۋە ئىقتىساد ساھەسىدە ئىككى تەرەپلىك مۇناسىۋەتلەرنى تېخىمۇ تەرەققى قىلدۇرۇش تىمىسى ھەققىدە سۆھبەتلەشتى. تۈركىيە پرېزىدېنتى ئەردوغان ۋە قاتار ئەمىرىنىڭ سۇرىيە، ئىراق، يەمەن ۋە پەلەستىن مەسىلىسى ھەققىدە سۆھبەتتە بولغانلىقى بىلدۈرۈلدى.
تۈركىيەنىڭ يېقىن ئىتتىپاقدىشى بولغان قاتاردا ھەربىي بازا قۇرۇلۇشى كېلىشىمى ئۆتكەن ھەپتە پارلامېنت تاشقى ئىشلار كومىتىتىدا ماقۇللاندى. كېلىشىم بويىچە قاتارمۇ تۈركىيەگە ھەربىي خادىملارنى ئەۋەتەلەيدۇ.
تاشقى ئىشلار كومىتىتىدىن ئېلان قىلىنغان باياناتتا، كېلىشىم بويىچە تۈركىيە قۇراللىق ئارمىيىسىنىڭ كىرەك بولغاندا قاتاردا ئەسكەر تۇرغۇزالايدىغانلىقى بېكىتىلگەن بولۇپ، « ئۇرۇش تەييارلىقى، ئىككى تەرەپلىك مانىۋېر، ئەسكەر تەربىيلەش پائالىيەتلىرى ۋە ئارمىيە تۇرغۇزۇش ئۈچۈن ئايرىم كېلىشىم ئىمزالىنىدۇ. قاتارنىڭ تەلىپى بىلەن دۆلىتىمىزگە ھەربىي خادىم ئەۋەتىلىشى مۇمكىن» دېيىلدى. ئىككى دۆلەت ئارىسىدىكى ھەربىي مۇناسىۋەتنىڭ تەرەققى قىلىشى باش تىما قىلىنغان كېلىشىم بىلەن بىرگە، ھەربىي تەربىيە خىزمىتى، مۇداپىئە سانائىتى، بىرلەشمە ھەربىي مانىۋېر ۋە تەرەپلەر ئارىسىدا ئارمىيە تۇرغۇزۇش قاتارلىق ساھەلەردىكى ھەمكارلىقنىڭ كۈچىيىشى ئۈچۈن بىر مىخانىزىم قۇرۇلۇشى پىلانلانماقتا.

كومىتىت تەرىپىدىن ئېلان قىلىنغان باياناتتا، بىرلەشمە ھەربىي مانىۋېر پىلانلانغان بولۇپ يەنە تۈۋەندىكلەر بىلدۈرۈلدى:
«دۆلىتىمىز قولتۇق دۆلەتلىرى بىلەن بولغان مۇناسىۋەتلىرىگە ئىستىراتىگىيەلىك نوقتىدىن قارايدۇ، بۇ ئىستىراتىگىيەلىك قارىشىمىزنىڭ ئەڭ مۇھىم مەقسىتى بولسا رايۇن دۆلەتلىرىنىڭ بىخەتەرلىكى ۋە مۇقىملىقىنىڭ قوللاشقا ئېرىشىشىدۇر. بۇ كېلىشىم دۆلىتىمىزنى تارىخى نوقتىدىن بىز بىلىدىغان ۋە تەسىر دائىرىمىز چوڭقۇر بولغان بۇ رايۇندا ئىستىراتىگىيەلىك ئورۇنغا ئېرىشتۈرىدۇ. كومىتىتىمىز تەرىپىدىن ماقۇللانغان بۇ كېلىشىم قارارى بىلەن بىرلا ۋاقىتتا مۇداپىئە سانائىتى ، ئەسكەر مەشىقلەندۈرۈش ۋە تەربىيلەش خىزمىتىدىمۇ يېقىن ھەمكارلىق ئورنىتىلىدۇ. دۆلىتىمىزنىڭ مۇداپىئە سانائىتى، ھەربىي ھەمكارلىق ۋە تەربىيلەش ساھەلىرىدە قولتۇق دۆلەتلىرىنىڭ كۆپىنچىسى بىلەن ئىمزالىغان كېلىشىملىرى ۋە مانىۋېر خىزمەتلىرى بار. كەلگۈسىدە بۇنىڭغا ئوخشاش كېلىشىملەر باشقا قولتۇق دۆلەتلىرى بىلەن ھەم تۈزۈلىشى مۇمكىن. قولتۇق رايۇنىدا بىر قانچە دۆلەتلەرنىڭ ئوخشاش پوزىتىسيەلىرى بار» .