ئ‍امېرىكا: تۈركىيە isis قا قارشى تۇرۇشتىكى مۇھىم ھەمكارلاشقۇچى، دېدى
ئامېرىكا تاشقى ئىشلار مىنىستىرلىكى باياناتچىسى جېن پاسكى، تۈركىيەنىڭ isis «ئىراق ۋە شام ئىسلام دۆلىتى» بىلەن قىلغان كۈرەشتە مۇھىم بىر ھەمكارلاشقۇچى ئىكەنلىكىنى داۋاملاشتۇرۋاتقانلىقىنى تەكىتلەپ، «تۈركىيە isis كە قارشى ئىتتىپاقتا پەقەت ھەربىي جەھەتتىنلا ئەمەس، ھەر جەھەتتە ئىجابى قەدەم ئېلىۋاتىدۇ» دېدى.
پاسكى، ئامېرىكا دۆلەتلىك ئاخبارات ئىدارىسى باشلىقى جامېس كلاپىرنىڭ، «تۈركىيەنىڭ isis بىلەن بولغان كۈرەشكە ئەھمىيەت بەرمەيۋاتىدۇ، ۋە تۈركىيە باشقا ئىشلارغا، يەنى ئۆز مەنپەئەتلىرىگە ئ‍ەھمىيەت بېرىۋاتىدۇ» دەپ ئېيتقان ئەيىبلەشلىرى ھەققىدە توختىلىپ، «تۈركىيە مۇھىم بىر ھەمكارلاشقۇچى ئىكەنلىكىنى داۋاملاشتۇرۋاتىدۇ، بۇنىڭدىن باشقا چەتئەللىك ئۇرۇش قىلغۇچىلارنىڭ تەشكىلاتنىڭ ئىقتىسادى مەنبەلىرىنى كونترول قىلىش ۋە تەشكىلاتنىڭ قانۇنسىز ئىش ھەرىكەتلىرىدە قاتتىق تەدبىرلەر قوللىنىۋاتىدۇ» دېدى.
پاسكى يەنە، تۈركىيەنى ئۆز ئىچىگە ئالغان دۆلەتلەر بىلەن ئىتتىپاق ھالىتىدە ئىكەنلىكىنى تەكىتلەپ، دەسلەپتىن بۇيان خەلقئارا جەمئىيەتنىڭ isis بىلەن بولغان كۈرەشتە تېخىمۇ كۆپ ئىشلارنى قىلالايدىغانلىقىنى ئېيتتى.
بىر مۇخبىر پاسكىيغا ، ئامېرىكا مۇداپىئە مىنىستىرى ئاشتون كارتىرنىڭ ئوتتۇرا شەرق زىيارىتىدە تۈركىيەگە بارمىغانلىقى، ئامېرىكا تاشقى ئىشلار مىنىستىرى جون كېررىينىڭ يېقىنقى ياۋرۇپا ۋە ئوتتۇرا شەرق ساياھىتىنىڭ تۈركىيەنى ئۆز ئىچىگە ئالمايدىغانلىقىنى ئېيىتپ، «ئامېرىكا-تۈركىيە مۇناسىۋىتى نورمالمۇ؟» دەپ سورىغان سۇئالىغا، پاسكى مۇنداق جاۋاب بەردى:
«تۈركىيە مۇھىم بىر رول ئوينىغۇچى ئىكەنلىكىنى داۋاملاشتۇرىۋاتىدۇ. تۈركىيە شىمالى ئاتلانتىك ئەھدى تەشكىلاتىنىڭ غوللۇق ئىتتىپاقدىشى. isis بىلەن بولغان دۇنياۋى كۈرەش ئالاھىدە ۋەكىلى گېنىرال ئاللىن ۋە باش ئەلچى McGurk تۈركىيەدە. مىنىستىر كېررىيمۇ دائىم تۈركىيە تەرەپ بىلەن كۆرۈشىۋاتىدۇ. ھەر قېتىملىق زىيارەتتە بارلىق دۆلەتلەرنى زىيارەت قىلمىغانلىقىمىزنى بىلىسىلەر. ئەكسىچە بولغاندا ئامېرىكىغا قايتمايمىز» دېدى.
ئامېرىكا دۆلەتلىك ئاخبارات ئىدارىسى باشلىقى جامېس كلاپىر، ئامېرىكا بەش بۈرجەكلىك بىنادا قاتناشقان بىر يىغىندا، «isis بىلەن بولغان كۈرەشتە تۈركىيەنىڭ ئامېرىكا بىلەن تېخىمۇ كۆپ ھەمكارلىق ئورنىتىشى ھەققىدە ئىجابى ياكى سەلبى قاراشتا ئىكەنلىكى» سورالغان بىر سۇئالغا، «ياق، ئىجابىي قاراشتا ئەمەسمەن» دەپ جاۋاب بەرگەن ئىدى. كلاپىر، تۈركىيەنىڭ بۇنىڭدىن باشقا مۇھىم ئىشلىرى بارلىقىنى تىلغا ئېلىپ، «تۈركىيەنىڭ باشقا مۇھىم ئىشلىرى ۋە مەنپەئەتلىرى بار، ئۇلار زور تەھدىت دەپ قاراۋاتقان كۈرت قارشىلىق ھەرىكىتىگە مەركەزلەشكەن. خەلقئارادىكى بەزى ئەھۋاللار تۈركىيەنىڭ isis نى بىرىنجى تەھدىت دەپ قارىمايدىغانلىقى ئاشكارىلىماقتا. ئۇلار ئىقتىسادى خىزمەتلەر ۋە مۇشۇ خىلدىكى ئىشلارغا بەكرەك دىققىتىنى قاراتماقتا» دېدى.