ئەڭ يېڭى ئۇچۇرلارغا ئاساسلانغاندا، نۆۋەتتە ئەنئەنىۋى شەكىلدىكى تېلېۋىزور كۆرۈش، يەنى تېلېۋىزور پىروگراممىلىرىنى پاسسپ ھالدا قوبۇللاپ كۆرۈش شەكلىدە ئاستا-ئاستا ئۆزگىرىش بولۇۋاتقان ئىكەن.
Forrester ئېلىپ بارغان بىر تۈرلۈك تەكشۈرۈش نەتىجىسىگە قارىغاندا، بۇ خىل يۈزلىنىش يالغۇز ياش-ئۆسمۈرلەر ئارىسىدىلا يۈز بېرىپ قالماستىن، بەلكى يېشى بىر قەدەر چوڭ كىشىلەرمۇ بارار-بارا ئەنئەنىۋى شەكىلدىكى تېلېۋىزور كۆرۈشتىن، توردا فىلىم كۆرۈشكە يۈزلىنىۋاتقان ئىكەن. تەكشۈرۈشكە قاتناشقۇچىلارنىڭ ئېيتىشىچە، ئۇلارنىڭ تېلېۋىزور كۆرىدىغان ۋاقتى بارغانسېرى ئازىيىپ، تېخىمۇ كۆپ ۋاقتىنى توردا كىنو ياكى باشقا تۈردىكى ۋىدىئولارنى كۆرۈشكە سەرىپ قىلىدىغان ھالەت شەكىللەنگەن ئىكەن.

بۇ تەكشۈرۈش نەتىجىسىدىن شۇنى كۆرۈۋىلىشقا بولىدۇكى، ئەنئەنىۋى شەكىلدىكى تېلېۋىزور كۆرگۈچىلەرنىڭ سانى بارغانسېرى ئازىيىپ كېتىۋاتقان بولۇپ، تېلېۋىزورنىڭ بۇ جەھەتتىكى ھۆكۈمرانلىق ئورنى تەۋرىنىشكە باشلىغان.

Forrester شىركىتى جەمئىي 4709 نەپەر ئامېرىكىلىق ئۈستىدە تەكشۈرۈش ئېلىپ بارغان بولۇپ، نەتىجىدە كۆرسىتىلىشىچە، ئالدىن بەلگىلەنگەن بىر ئاي ۋاقىت ئىچىدە، 18 دىن 88 ياشقىچە بولغان كىشىلەرنىڭ ئارىسىدا، ئەنئەنىۋى ھالەتتىكى تېلېۋىزور كۆرگۈچىلەرنىڭ نىسبىتى ئاران %46 بولغان.

تېلېۋىزور كۆرگۈچىلەرنىڭ كۆپىنچىسى 50-يىللاردا تۇغۇلغانلار ۋە بوۋاق بالىلار ئىكەن، ياش-ئۆسمۈر ۋە قۇرامىغا يەتكەنلەرنىڭ سانى نىسبەتەن ئاز ئىكەن.

ئىگەللىنىشىچە، Netflix ۋە Hulu قاتارلىق كۆپلىگەن ئىنتېرنېت ئاساسىدىكى ۋىدىئو مۇلازىمەت تۈرلىرىنىڭ ئوتتۇرىغا چىقىشى ئەنئەنىۋى شەكىلدىكى تېلېۋىزىيە كەسپىگە زور بېسىم ئېلىپ كەلگەن. بىراق، ياش-ئۆسمۈرلەر ئۈچۈن ئېيتقاندا، تېلېۋىزور يەنىلا ئۇلارنىڭ ئاساسلىق كۆرۈش قورالى ئىكەن. %55 دىن ئارتۇق ياش ئابونتنىڭ دىيىشىچە، ئۇلار ئادەتتىكى ۋاقىتلاردا يەنىلا تېلېۋىزورنى ئاچىدىكەن، ھەر ھەپتىدە ئاز دىگەندە تۆت سائەت ياكى ئۇنىڭدىن ئۇزۇن ۋاقىت تېلېۋىزىيە نۇمۇرلىرىنى كۆرىدىكەن.

كىشىلەرنىڭ مەزمۇن ئىستېمال قىلىش شەكلىدە ئۆزگىرىش بولغان بولسىمۇ، بىراق، بارلىق ئىستېمال مەزمۇنلىرىنىڭ تۈرىنى ئېلىپ ئېيتقاندا، تېلېۋىزور يېتىلدۈرگەن ئەنئەنىۋى ئادەتنىڭ يېلتىزى يەنىلا ئىنتايىن چوڭقۇر ۋە مۇستەھكەم ئىكەن. مەيلى قانداق ئۈسكۈنە سۇپىسىدا بولسۇن، يېڭىدىن ئىشلەنگەن تېلېۋىزىيە فىلىملىرىنىڭ كۆرۈلۈش نىسبىتى يەنىلا ھەممىدىن يۇقىرى ئىكەن. بىراق، %37 ئامېرىكىلىق ياش توردا تېلېۋىزوردا قويۇلمايدىغان فىلىملەرنى كۆرۈشنى ياخشى كۆرىدىكەن، بەزىلىرى تېلېۋىزىيە فىلىملىرىنىڭ كونا قىسىملىرىنى ئىزدەپ كۆرىدىكەن.

تور ۋىدىئولىرىنىڭ ياش ئابونتلار ئىچىدىكى تەرەققىيات سۈرئىتى ئىنتايىن تېز ئىكەن، ھالبۇكى، بۇ بىر توپ كىشىلەر يەنە نۆۋەتتىكى تەسىر كۈچى ئەڭ يۇقىرى بولغان تاماشىبىن بولۇپ ھېسابلىنىدىكەن. شۇنىڭ ئۈچۈن، رادىئو-تېلېۋىزىيە شىركەتلىرى ئۈچۈن ئېيتقاندا، تېلېۋىزور كۆرىدىغانلارنىڭ ئىچىدە ياشلارنىڭ نىسبىتى تۆۋەنلەپ كەتكەنلىكى بىر ئاپەت بولۇپ ھېسابلىندىكەن. ئەلۋەتتە، بۇنى پۈتۈنلەي ناچار ئەھۋال دەپ قاراشقىمۇ بولمايدىكەن، گەرچە تېلېۋىزىيە ئابونتلىرى توپىدا پارچىلىنىش ئالامىتى كۆرۈلگەن بولسىمۇ، بىراق، ئەنئەنىۋى شەكىلدىكى رادىئو-تېلېۋىزىيە شىركەتلىرى يەنىلا ھەرخىل ئامال-چارىلەرنى ئىشلىتىپ تاماشىبىنلارنى تۇتۇپ قالالايدىكەن، ھەمدە ماس ھالدا كىرىم يارىتالايدىكەن.