ئامېرىكا غارايىباتلار تورىنىڭ خەۋىرىگە قارىغاندا، جۇڭگونىڭ ئەنخوي ئۆلكىسىدىكى 21 ياشلىق قىز شياۋ خۇ بىر پۇتى بىلەن خەت بېسىپ رومان يازغان . ئىگىلىنىشىچە، شياۋ خۇ تۇغما چوڭ مېڭە پارالىچى سەۋەبلىك پالەچ بولۇپ قېلىپ، پەقەت باش قىسمى بىلەن سول پۇتىلا نورمال ھەرىكەت قىلالايدىكەن. ئەمما قەيسەر قىز شياۋ خۇ ئىرادىسىنى يوقاتماي، سول پۇتى بىلەن خەت بېسىشنى مەشىق قىلىپ، ئارزۇ ۋە مۇھەببەتنى قوغلىشىشنى تېما قىلغان رومان يازغان.

پالەچ سەۋەبلىك شياۋ خۇ باشقا تەڭتۇشلىرىغا ئوخشاش مەكتەپ تەربىيەسىدىن بەھرىمان بولالمىغان. ئۇ ئاپىسىنىڭ ياردىمىدە ئوقۇش ۋە يېزىشنى ئۆزى ئۆگەنگەن، ئاپىسىنىڭ ئېيتىشىچە، ‹‹ ئۇنىڭ ئۆگىنىش مۇساپىسى ئاسانغا چۈشمىگەن، باشقا بالىلار بىر نەچچە قېتىم يېزىپلا ئۆگىنەلەيدىغان خەتلەرنى شياۋ خۇ نەچچە يۈز ھەتتا نەچچە مىڭ قېتىم يېزىپ ئاندىن ئۆگەنگەن ››. جاپا تارتمىغىچە ھالاۋەت يوق دېگەندەك شياۋ خۇنىڭ تىل-ئەدەبىيات جەھەتتىكى ئىقتىدارى كۈنسايىن ئاشقان.

ئۇ ئۆگەنگەنلىرىنى يېزىپ قالدۇرۇش ئۈچۈن سول پۇتىدا كومپيۇتېرغا خەت ئۇرۇشنى مەشىق قىلىپ، مىنۇتىغا 30~20 خەت باسالايدىغان بولغان. ئۇ بۇنىڭ بىلەنلا قانائەتلىنىپ قالماي، ئۆز كەچۈرمىشلىرى ئارقىلىق تېخىمۇ كۆپ كىشىلەرگە مەدەت بېرىش ئۈچۈن رومان يېزىشقا بەل باغلىغان. نۆۋەتتە ئۇ رومانىنىڭ ئالتە باب ( 60 مىڭ خەت ) نى تۈگەتكەن بولۇپ، يەنە ئىككى بابدىن كېيىن رومان تاماملىنىدىكەن. شياۋ خۇ باشقىلارنىڭ ماختاشلىرىغا : مەن تالانت ئىگىسى ئەمەس ، مەن پەقەت تىرىشتىم خالاس ، دېگەن.