ئاپتونوم رايوننىڭ ‹‹ئىككى يىغىن›› ىنىڭ مۇۋەپپەقىيەتلىك يېپىلغانلىقىنى قىزغىن تەبرىكلەيمىز

ئالقىش سادالىرى، ئۈمىد كەلگۈسىدىن بېشارەت بەردى، كاتتا يىغىن ئارزۇلارنى نامايان قىلدى. ئاپتونوم رايونلۇق 12 – نۆۋەتلىك خەلق قۇرۇلتىيى 3 – يىغىنى ۋە سىياسىي كېڭەش ئاپتونوم رايونلۇق 11 – نۆۋەتلىك كومىتېتىنىڭ 3 – يىغىنى تۈرلۈك قارالمىلارنى تاماملاپ مۇۋەپپەقىيەتلىك ئاخىرلاشتى. بىز ‹‹ئىككى يىغىن›› نىڭ مۇۋەپپەقىيەتلىك ئېچىلغانلىقىنى قىزغىن تەبرىكلەيمىز!

بۇ قېتىمقى ‹‹ئىككى يىغىن›› ئاپتونوم رايون تۈرلۈك ئىشلاردا يېڭى ئىلگىرىلەش، يېڭى بۆسۈش، يېڭى نەتىجىلەرنى قولغا كەلتۈرگەن، ئاپتونوم رايون بويىچە يۇقىرىدىن – تۆۋەنگىچە باش شۇجى شى جىنپىڭنىڭ بىر قاتار مۇھىم سۆزىنىڭ روھى ۋە پارتىيە مەركىزىي كومىتېتىنىڭ يېڭى ۋەزىيەتتە شىنجاڭنى ئىدارە قىلىش تاكتىكىسىنى چوڭقۇر ئۆگىنىپ، ئىزچىللاشتۇرۇۋاتقان، مەركەزنىڭ 2 – قېتىملىق شىنجاڭ خىزمىتى سۆھبەت يىغىنى، ج ك پ ئاپتونوم رايونلۇق 8 – نۆۋەتلىك كومىتېتىنىڭ 8 – ئومۇمىي(كېڭەيتىلگەن) يىغىنى ۋە ئاپتونوم رايونلۇق پارتكومنىڭ ئىقتىساد خىزمىتى يىغىنىنىڭ روھىنى ئومۇميۈزلۈك ئەمەلىيلەشتۈرۈۋاتقان، شىنجاڭنى قانۇن بويىچە ئىدارە قىلىشنى ئومۇميۈزلۈك ئىلگىرى سۈرۈپ، ئىجتىمائىي مۇقىملىق ۋە ئەبەدىي ئەمىنلىكنى زىچ چۆرىدەپ، تەرەققىياتنى تۇتۇۋاتقان مەزگىلدە چاقىرىلغان مۇھىم يىغىن بولۇپ، ئىسلاھات، تەرەققىيات ئومۇمىيىتىگە چېتىلىدۇ، بۇنىڭ ئەھمىيىتى ناھايىتى زور.

ئاپتونوم رايونلۇق 12 – نۆۋەتلىك خەلق قۇرۇلتىيىنىڭ 3 – يىغىنىدا ئاپتونوم رايونلۇق خەلق قۇرۇلتىيى، ھۆكۈمەتنىڭ ئاساسلىق رەھبەرلىرى سايلاپ چىقىلدى، ئاپتونوم رايونلۇق خەلق قۇرۇلتىيى دائىمىي كومىتېتىنى تەشكىل قىلىدىغان ئەزالار تولۇقلاپ سايلاندى؛ سىياسىي كېڭەش ئاپتونوم رايونلۇق 11 – نۆۋەتلىك كومىتېتىنىڭ 3 – يىغىنىدا ئاپتونوم رايونلۇق سىياسىي كېڭەشنىڭ مۇئاۋىن رەئىسى تولۇقلاپ سايلاندى، بۇ شىنجاڭنىڭ تەرەققىيات مۇساپىسىدە مۇھىم ئەھمىيەتكە ئىگە. ‹‹ئىككى يىغىن›› مەزگىلىدە، ۋەكىللەر، ئەزالار تولۇپ تاشقان سىياسىي قىزغىنلىق ۋە يۈكسەك مەسئۇلىيەتچانلىق روھى بىلەن ھۆكۈمەت خىزمىتىدىن بېرىلگەن دوكلات ۋە باشقا دوكلاتنى ئاڭلاپ ۋە قاراپ چىقىپ، ئىجتىمائىي مۇقىملىق ۋە ئەبەدىي ئەمىنلىك ئۇلۇغۋار نىشانىنى چۆرىدەپ، تەرەققىيات داۋامىدا يولۇققان يېڭى مەسىلە، يېڭى ئەھۋال ھەمدە خەلق ئاممىسى كۆڭۈل بۆلۈۋاتقان قىزىق نۇقتا، قىيىن نۇقتا مەسىلىلىرىنى قىزغىن مۇھاكىمە قىلىپ، پائال ئەقىل كۆرسەتتى. يىغىن نەتىجىسى پارتىيەنىڭ تەشەببۇسى بىلەن خەلق ئارزۇسىنىڭ بىردەكلىكىنى تولۇق نامايان قىلىپ، شىنجاڭدىكى ھەر مىللەت خەلقنىڭ ئورتاق ئارزۇسىنى ئەكس ئەتتۈردى. يىغىن ناھايىتى جۇشقۇن، جەڭگىۋار روھىي قىياپەتتە داغدۇغىلىق، مۇۋەپپەقىيەتلىك ئېچىلدى. بۇ بىر قېتىملىق دېموكراتىك، ئىتتىپاق، ئەمەلىيەتچىل، جاسارەت بىلەن ئىلگىرىلەيدىغان يىغىن، شۇنداقلا ئىجتىمائىي مۇقىملىق ۋە ئەبەدىي ئەمىنلىك ئومۇمىي نىشانىنى ئىشقا ئاشۇرۇش ئۈچۈن ‹‹ئەلرايىنى مۇجەسسەملەپ››، ‹‹ئەقىل كۆرسىتىدىغان›› يىغىن بولۇپ، شىنجاڭدىكى ھەر مىللەت خەلقنى تېخىمۇ ئىتتىپاقلاشتۇرۇپ ۋە سەپەرۋەر قىلىپ، ئۇلارنى ئومۇميۈزلۈك ھاللىق جەمئىيەت قۇرۇپ چىقىش، شىنجاڭنىڭ ئىجتىمائىي مۇقىملىقى ۋە ئەبەدىي ئەمىنلىكىنى ئىشقا ئاشۇرۇش ئۇلۇغۋار ئىشلىرىغا يەنىمۇ جاسارەت بىلەن ئاتلاندۇرىدۇ.

بۇ يىل ئاپتونوم رايوننىڭ تەرەققىيات مۇساپىسىدىكى ناھايىتى مۇھىم بىر يىل، بۇ يىللىق ئىقتىسادىي، ئىجتىمائىي خىزمەتلەرنى ياخشى ئىشلەشنىڭ ئەھمىيىتى ناھايىتى زور. ھازىر بىز <<ئىككى يىغىن>> روھىنى ئۆگىنىشنى پۇرسەت دەپ بىلىپ، ئۆزگىرىش ياساپ، ئىسلاھ قىلىپ، دادىل زىممىمىزگە ئېلىپ، ئۈنۈمنى كۆزلەپ، خەلقنىڭ ئارزۇسىنى ئۆزىمىزنىڭ ھەرىكىتىگە ئايلاندۇرۇپ، خەلقنىڭ ئۈمىدىنى گۈزەل رېئاللىققا ئايلاندۇرۇپ، بىر نىيەتتە ھەمكارلىشىپ، چىڭ تۇتۇپ ئەمەلىيلەشتۈرۈشتە ئۈزلۈكسىز يېڭى ۋەزىيەت يارىتىشىمىز كېرەك.

بۇ يىللىق خىزمەتلەرنى ياخشى ئىشلەش ئۈچۈن، بىز يۇقىرىدىن تۆۋەنگىچە بىر نىيەتتە، تەشەببۇسكارلىق بىلەن ھەرىكەتكە كېلىشىمىز كېرەك. بۇ يىل شىنجاڭ مىسلى كۆرۈلمىگەن پۇرسەت، خىرىسلارغا دۇچ كېلىدۇ. مۇشۇنداق ۋەزىيەتتە بىز يۇقىرىدىن - تۆۋەنگىچە بىر نىيەتتە ھەمكارلىشىپ، بىردەك ئىتتىپاقلىشىپ، ئىتتىپاقلىق مارشىنى ياڭرىتىپ، كۆپچىلىك بىرلىكتە ئىلگىرىلىشىمىز كېرەك. پەقەت مەسئۇلىيەتنى زىممىمىزگە ئېلىپ، يۇقىرىدىن - تۆۋەنگىچە بىر نىيەتتە بولۇپ، تەشەببۇسكارلىق بىلەن ھەرىكەتكە كەلسەكلا، ئۆزىمىزنى كۈچەيتىپ، پايدىسىز شارائىتلاردىن ئوڭۇشلۇق ئۆتۈپ، تەرەققىياتنى ئىلگىرى سۈرەلەيمىز.

يېقىنقى يىللاردىن بۇيان، ئاپتونوم رايونىمىزدىكىلەر يۇقىرىدىن - تۆۋەنگىچە بىر نىيەتتە ئىتتىپاقلىشىپ، جاسارەت بىلەن ئالغا ئىلگىرىلەپ، تۈرلۈك ئىشلاردا خۇشاللىنارلىق نەتىجىلەرنى قولغا كەلتۈرۈپ، شىنجاڭنىڭ ئىجتىمائىي مۇقىملىقى ۋە ئەبەدىي ئەمىنلىك ئاساسىنى مۇستەھكەملىدى. ھازىر گەرچە ياكى ئۇنداق، ياكى مۇنداق قىيىنچىلىق ۋە مەسىلىلەر مەۋجۇت بولسىمۇ، ئەمما ئاپتونوم رايوننىڭ تەرەققىيات تەپەككۇرى ئېنىق، تەرەققىيات نىشانى ئوچۇق، تەرەققىيات تەدبىرى ئۈنۈملۈك، تەرەققىيات ئىستىقبالى پارلاق. مۇۋەپپەقىيەتلىك ئەمەلىيەت تەجرىبىسى بىزگە شۇنى ئۇقتۇرىدۇكى، بىز پەقەت جەزمەن يېڭىش ئىشەنچىنى چىڭىتىپ، ئادەتتىكىگە تەڭلەشتۈرگىلى بولمايدىغان كۈچ ۋە ئەجىر، «ھەقىقىي ئەركەك»تەك مەسئۇلىيەتچانلىق، «كومپارتىيە ئەزالىرىدەك ئەستايىدىل» پوزىتسىيە، «قىلىشقا توغرا كەلسە، ئەڭ ياخشىسىنى قىلىش»تەك ئىرادە، جاسارەت بىلەن ئىلگىرىلەپ، تەشەببۇسكارلىق بىلەن ھەرىكەت قىلىپ، بىر نىيەتتە ھەمكارلىشىپ، تەڭ قۇرۇپ، ئورتاق بەھرىمەن بولساقلا، شىنجاڭ زېمىنىنى كۆتۈرەڭگۈ روھ بىلەن ئالغا ئىنتىلىدىغان ئاكتىپ كۈچكە تولدۇرالايمىز.

بۇ يىللىق خىزمەتلەرنى ياخشى ئىشلەش ئۈچۈن، بىز خىزمەت ئىستىلىنى ھەقىقىي ئۆزگەرتىپ، چىڭ تۇتۇپ، ئەمەلىي ئىشلىشىمىز كېرەك. بارلىق گۈزەل ئارزۇلارنى ئەمەلىي ئىشلەش ئارقىلىق ئەمەلگە ئاشۇرغىلى بولىدۇ. ئۆتمۈشكە نەزەر سالساق، بىز كىشىلەرنى ھەيران قالدۇرغىدەك نەتىجىلەرنى قولغا كەلتۈرگەن؛ كەلگۈسىگە نەزەر سالساق، پۈتۈن مەملىكەت خەلقى بىلەن ماس قەدەمدە ئومۇميۈزلۈك ھاللىق جەمئىيەت قۇرۇپ چىقىش ئۇلۇغۋار ئارزۇسىغا يېتىش ئۈچۈن يەنىلا ئەمەلىي ئىشلەشكە تايىنىشقا توغرا كېلىدۇ. ئەمەلىيەت بىزگە شۇنى ئۇقتۇرىدۇكى، ئىستراتېگىيەلىك ئورۇننى توغرا بېكىتىپ، تەرەققىيات يولىنى توغرا تاللاپ، خىزمەت تەدبىرىنى كۈچەيتكەندىلا، ئانچە تەرەققىي تاپمىغان رايونلار تېز تەرەققىياتنى، ھالقىما تەرەققىياتنى تامامەن ئىشقا ئاشۇرالايدۇ. ھازىر شىنجاڭدىكى ھەر قايسى چوڭ رەھبەرلىك بەنزىسى بېكىتىلىپ، تۈرلۈك خىزمەت ئورۇنلاشتۇرمىلىرى ئايدىڭلاشتۇرۇلدى، بىز پەقەت ئۆگىنىشكە ماھىر بولۇپ، قانۇن ئىدارە قىلىشقا ئەھمىيەت بېرىپ، ئىتتىپاقلىقتا بەسلىشىپ، ئەمەلىيلەشتۈرۈشنى تۇتۇپ، ئۈنۈمگە ئەھمىيەت بېرىپ، ئاداققىچە، ئىزچىل، كۈچەپ تۇتىدىغان غەيرەت - جاسارەت بىلەن تەدبىرلەرنى داۋاملىق مۇكەممەللەشتۈرۈپ، تېز، جىددىي ھەرىكەتكە كەلسەكلا، ئىسلاھات، تەرەققىيات ئورۇنلاشتۇرمىسىنى ئىنچىكىلەشتۈرۈپ كونكرېت تەدبىرگە، ئەمەلىي ھەرىكەتكە، كۆزگە كۆرۈنىدىغان ئۈنۈمگە ئايلاندۇرالايمىز؛ بارلىق قىيىنچىلىقلارنى ئارقىدا قالدۇرۇپ، شىنجاڭ خىزمىتىدە تېخىمۇ گۈزەل كەلگۈسى يارىتالايمىز.

تارىخ ئالغا ئىلگىرىلەش ئىزىنى مۇشۇنداق قالدۇرىدۇ، گۈزەل كەلگۈسى مانا مۇشۇنداق يارىتىلىدۇ. يېڭى باشلىنىش نۇقتىسىدا تۇرۇپ، يىراققا نەزەر سالساق، شىنجاڭنىڭ تەرەققىيات ئىستىقبالىنىڭ ئېنىق ۋە پارلاق ئىكەنلىكىنى كۆرەلەيمىز. بىز بۇرچنى ئورتاق زىممىمىزگە ئېلىپ، كەلگۈسىگە يۈزلىنىپ، بىر نىيەتتە ھەمكارلىشىپ، شانلىق نەتىجىلەرنى يارىتىپ، جۇڭگو ئارزۇسىنىڭ شىنجاڭ سەھىپىسىنى بىرلىكتە يېزىپ، تەڭرىتاغ پەرزەنتلىرىنىڭ بەخت ئارزۇسىنى ئىشقا ئاشۇرايلى!