كانادادا قىزىل، ئاق ۋە يېشىلدىن ئىبارەت ئۈچ خىل رەڭ كىشىدە چوڭقۇر تەسىر قالدۇرىدۇ. قىزىل رەڭ كانادا دۆلەت بايرىقىدىكى ئېرەن يوپۇرمىقىنىڭ رەڭگى بولۇپ، كۈز كۈنلىرى تاغ – دالالار قىزىل رەڭدە بوياپ قويغاندەك كۆرۈنىدۇ. بىراق قىش پەسلىدە كانادادا قار ياغمايدىغان كۈن بولمايدۇ. ھاۋارايى مەلۇماتىغا ئاساسلانغاندا، بۇلتۇر قىشتا شەرقىي قىسىم رايونلاردا 70 قېتىمدىن كۆپرەك قار ياغقان.

كانادانىڭ يېشىللىقى بىر جەھەتتىن ئەۋزەل شارائىتتىن، يەنە بىر جەھەتتىن كىشىلەرنىڭ ئورمانلارنى كۆڭۈل قويۇپ ئاسرىشى ۋە ھۆكۈمەتنىڭ ئۈنۈملۈك باشقۇرۇشىدىن كەلگەن. كانادا ئورمانچىلىق ئىدارىسى ئېلان قىلغان ماتېرىيالغا ئاساسلانغاندا، كانادادىكى 9 مىليون 90 مىڭ كىۋادرات كىلومېتىر كېلىدىغان قۇرۇقلۇق كۆلىمى ئىچىدە شىمالىي تەرىپىدىكى ئورمانلىقنىڭ كۆلىمى 5 مىليون 700 مىڭ كىۋادرات كىلومېتىر بولۇپ، قۇرۇقلۇق كۆلىمىنىڭ %60 ىنى ئىگىلەيدۇ. كانادا كىشىلەرنىڭ ئېكولوگىيەگە ئەھمىيەت بېرىشى، ھۆكۈمەتنىڭ ئورمانلارنى كېسىشىنى قاتتىق باشقۇرۇشىغا تايىنىپ مۇشۇنداق زور ئورمان بىلەن قاپلىنىش نىسبىتىنى ساقلاپ قالغان. كانادا گەرچە ياغاچ ماتېرىيال ۋە قەغەز بوتقىسى ئېكسپورت قىلىدىغان چوڭ دۆلەت بولسىمۇ، بىراق كانادانىڭ شىمالىدىكى ئورمانلىقنىڭ كېسىلىش نىسبىتى ئاران %0.2 كېلىدىكەن. ئورمانلارنى كەسكەندىن كېيىن قايتا تىكىش نىسبىتى% 100 كە يېتىدىكەن، بىر تۈپ دەرەخ كېسىلگەندىن كېيىن بىر تۈپ دەرەخ تىكىلىدىكەن.

كانادادا دەرەخلەرنى كېسىش قانۇنغا خىلاپ بولۇپلا قالماي، دەل – دەرەخلەرگە زىيان سالغانلارنىڭ مەسئۇلىيىتى قانۇن بويىچە سۈرۈشتۈرۈلىدۇ. يەنى دەرەخنىڭ ئەتراپىغا ئەخلەت ياكى زىيانلىق كېرەكسىز سۇيۇقلۇقنى تۆكۈشكە بولمايدۇ، قۇرۇلۇش قىلىنغاندا، دەل – دەرەخلەردىن مەلۇم ئارىلىق ساقلىنىدۇ، قۇرۇلۇش ئاپتوموبىللىرى دەرەخنىڭ يىلتىزىدىكى تۇپراقنى بېسىۋەتكەندە، دەرەخلەرنىڭ ساغلام ئۈسۈپ يېتىلىشىگە پايدىسىز، دېگەندەك قانۇن بەلگىلىمىلەر بار.

ئاممىنىڭ دەل – دەرەخلەرنى كۆڭۈل قويۇپ ئاسرىشى، قانۇننى قاتتىق ئىجرا قىلىشى ۋە ئۇزۇن مۇددەت تەۋرەنمەي داۋاملاشتۇرۇلغانلىقى ئۈچۈن، كانادانىڭ شەھەر، يېزىلىرى كۆز يەتكۈسىز يېشىللىق بىلەن قاپلانغان.