خەلقئارا لىنىيەسى خەۋىرى : ئاۋسترالىيە ئاخبارات تورىنىڭ 12-دېكابىردىكى خەۋىرىگە قارىغاندا ، ئاۋسترالىيە مېلبۇرنلۇق فوتوگراف پېتېر لىك فوتو سۈرەت تارىخىدا رېكورت ياراتقان ، ئۇ تارتقان ‹‹خىيالىي مەنزىرە›› ناملىق بىر پارچە رەڭسىز سۈرەت 7 مىليون 800 مىڭ ئاۋسترالىيە دوللىرى(تەخمىنەن 39 مىليون 890 مىڭ يۈەنگە باراۋەر) لىق يۇقىرى باھاغا سېتىلىپ ، دۇنيادىكى ئەڭ قىممەت رەڭسىز سۈرەت بولۇپ قالغان .

ئىگىلىنىشىچە ، لىك كىچىكىدىنلا سۈرەت تارتىشنى ياخشى كۆرىدىغان بولۇپ ، ھازىرغا قەدەر بۇ ئىشنى ئۈزۈپ قويمىغان . بۇ سۈرەتنى ئۇ ئامېرىكىنىڭ غەربىي جەنۇبىدىكى ئارىزونا ئىشتاتىنىڭ بۆكەن جىلغىسىدا تارتقان بولۇپ ، بۇ داڭلىق جىلغا ئېقىن سۇلارنىڭ نەچچە مىليون يىل يالىشىدىن شەكىللەنگەن .

لىك نۆۋەتتە ئامېرىكىدا تۇرىدىكەن . ئۇ ئاۋسترالىيە كەسپىي فوتوگرافلار جەمئىيىتى ۋە ئامېرىكا كەسپىي فوتوگرافلار جەمئىيىتىنىڭ ئۇستاز دەرىجىلىك فوتوگرافى ئىكەن . دۇنيادىكى ئەڭ قىممەت 20 پارچە سۈرەت ئىچىدە ئۇنىڭ تۆت پارچە ئەسىرى بار ئىكەن .