ئامېرىكا ‹‹ دەۋر ھەپتىلىك ژورنىلى ›› يېقىندا 2014-يىللىق يەرشارى بويىچە ئەڭ تەسىر كۈچكە ئىگە ئون پارچە سۈرەتنى باھالاپ چىقتى . بۇ سۈرەتلەر چېگرا ، تىل ۋە مەدەنىيەت جەھەتتىكى پەرقلەردىن ھالقىپ ، كىشلەر قەلبىنى زىلزىلىگە سالدى .

ئىتالىيە دېڭىز ئارمىيەسى ئوتتۇرا دېڭىزىغا تۆت ھەربىي پاراخوت ئەۋەتىپ ، شۇ يەر ۋاقتى 20-ئىيۇل كەچتىن 21-ئىيۇل سەھەرگىچە 800 گە يېقىن كۆچمەننى قۇتۇلدۇرغان .

لىبىرىيەنىڭ پايتەختى مونروۋىيەدە سەككىز ياشلىق بىر ئوغۇل بالا ئېبولا ۋىروسى بىلەن يۇقۇملىنىپ ، ئىككى نەپەر سەھىيە خىزمەتچىسى تەرىپىدىن شىپاخانىغا ئېلىپ كېتىلگەن .

فوتوگراف يۇقىرى بوشلۇقتىن سۈرەتكە تارتىش تېخنىكىسى ئارقىلىق ئامېرىكىنىڭ كالىفورنىيە ئىشتاتىدىكى ئوروۋىللې كۆلىنى سۈرەتكە تارتقان . سۈرەتتە كۆلدىكى پاراخوتلار قۇرغاقچىلىق سەۋەبىدىن نەچچە ئايغىچە تىزىلىپ تۇرۇپ كەتكەن .

پىژغىرىم ئىسسىق بولىدىغان ئىيۇلدا رۇسىيەنىڭ نوۋوسىبىرسكىدىكى بىر دېڭىز ساھىلىدا توساتتىن مۆلدۈر يېغىپ ، سۇ ئىچىدە خوشال ئويناۋاتقان كىشىلەر نېمە قىلارىنى بىلەلمەي باشلىرىنى توسىغىنىچە قىرغاققا يۈگۈرگەن .

17-ئىيۇل مالايسىيا ئاۋىياتسىيەسىنىڭ MH17 يولۇچىلار ئايروپىلانى ئۇكرائىنادا چۈشۈپ كەتكەن . سۈرەتتە بىر تالاپەتكە ئۇچرىغۇچى بىخەتەرلىك تاسمىسى بىلەن ئورۇندۇققا باغلانغان ھالەتتە شامال ئۇرۇپ تۇرغان بۇغدايلىقتا قالغان . بۇ تېراگىدىيە كۆزنى يۇمۇپ-ئاچقۇچە نۇرغۇن كىشىنىڭ ھاياتىنى ھالاك قىلغان .

ئامېرىكا 2014-يىللىق ئوسكار ئالتۇن ھەيكەل مۇكاپاتى مۇراسىمىدا رىياسەتچى ئەلىن بىر توپ ھوللىۋود چولپانلىرى بىلەن يانفوندا سۈرەتكە چۈشكەن . بۇ سۈرەت بىر سائەتكە قالماي بىر مىليون قېتىم ئۇلاپ تارقىتىلىپ ، دۇنيا ‹‹ ئۇلاپ تارقىتىش مىقدارى ›› رېكورتىنى ياراتقان .

ئاۋغۇستتا ‹‹ ئىراق ئىسلام دۆلىتى ›› قۇراللىق ئۇنسۇرلىرى باشقا دىن مۇرتلىرىنى ئىراقنىڭ شىمالىي كۇردس رايونىدا تۇتقۇن قىلىپ تۇرغان .

ئامېرىكا مىسسۇرى ئىشتاتىدىكى فىرگۇسون توپىلاڭىدا ، ئاق تەنلىك ساقچىلار قولىدا تۆمۈرنىڭ سونىقىمۇ يوق بىر قارا تەنلىك نامايىشچىنى قولغا ئالغان .

ئاممىۋى ئاپتوبوسنىڭ دېرىزىسىدىن تارتىلغان بۇ سۈرەتتە ئۇكرائىنانىڭ پايتەختى كىيېۋدا يۈز بەرگەن رۇسىيەپەرەسلەر ھۆكۈمىتىنى ئاغدۇرۇش زوراۋانلىق ۋەقەسى ئەكس ئەتتۈرۈلگەن .

بۇ يىل يازدا غەززە رايونى ئىسرائىلىيەنىڭ بومباردىمان قىلىشىغا ئۇچرىغان . نۇرغۇنلىغان نارسىدىلەر بۇ قېتىمقى بومباردىماندا ھاياتىدىن ئايرىلغان.