8 – دېكابىر تۈندىن باشلاپ ئۈرۈمچى شەھىرىدە 16 سائەت قار ياغدى. ئومۇمىي ھۆل – يېغىن مىقدارى 17.7 مىللىمېتىرغا، يىغىندى قارنىڭ قېلىنلىقى 23 سانتىمېتىرغا يەتتى. ئۈرۈمچى شەھەرلىك مېتېئورولوگىيە ئىستانسىسىنىڭ تەكشۈرۈشىگە قارىغاندا، ئۈرۈمچى شەھىرىدە 8 – دېكابىر تۈن ئۈرۈمچى ۋاقتى سائەت 11 ئەتراپىدا يېغىشقا باشلىغان قار 8 – دېكابىر چۈشتىن كېيىن سائەت 3 كىچە داۋاملاشقان.

ئۇقۇشىمچە، ئۈرۈمچى شەھىرىدىكى ئالاقىدار تارماقلار ئۈرۈمچى شەھىرىنىڭ قاتناش راۋانلىقىغا ۋە ھەر مىللەت ئاممىسىنىڭ نورمال يول يۈرۈشىگە كاپالەتلىك قىلىش ئۈچۈن، ئاسان مۇز تۇتىدىغان يوللاردا ئالدىنئالا تىيىلىشتىن ساقلىنىش تەدبىرلىرىنى قوللانغان. ئۈرۈمچى شەھەرلىك شەھەر مەمۇرىيىتى باشقۇرۇش كومىتېتى 15 تەكشۈرۈش گۇرۇپپىسى تەشكىللەپ، يول بۆلەكلىرىنى تەكشۈرگەن. ئۈرۈمچى شەھەرلىك شەھەر قىياپىتى ۋە مۇھىت تازىلىقىنى باشقۇرۇش مەركىزى بەش گۇرۇپپا تەشكىللەپ، ئاساسلىق رايونلاردىكى يىغىندى قارنىڭ تازىلىنىش ئەھۋالىنى تەكشۈرگەن. 9 – دېكابىر چۈشتىن بۇرۇن سائەت 10 غىچە، مۇناسىۋەتلىك ئورۇنلار 70 نەچچە مىڭ ئادەم/ قېتىم ئادەم كۈچى، 10 نەچچە مىڭ ئاپتوموبىل/ قېتىم ئاپتوموبىلنى ئىشقا سېلىپ، 100 مىڭ توننا يىغىندى قارنى شەھەر ئەتىراپىغا توشىغان؛ 24 مىڭ تازىلىق ئىشچىسى مۇددەتتىن ئىككى سائەت بۇرۇن تەييار بولۇپ، 40 نەچچە سائەت قار تازىلىغان. قار ياغقان مەزگىلىدە، ئۈرۈمچى شەھەرلىك ج خ ئىدارىسى قاتناش ساقچى تارماق ئەترىتى قاتناش ساقچىسىدىن 620 نى ئىشقا سېلىپ، زور قاتناش ۋەقەلىرىنىڭ ئالدىنى ئالغان.