ئاقسۇ-قەشقەر يۇقىرى سۈرئەتلىك تاشيولى

جەنۇبىي شىنجاڭدىكى ئاقسۇ-قەشقەر يۇقىرى سۈرئەتلىك تاشيولى ، مەكىت-قەشقەر يۇقىرى سۈرئەتلىك تاشيولى ۋە ئاچال-يەكەن يۇقىرى سۈرئەتلىك تاشيولىدا مۇشۇ ئاينىڭ ئاخىرى قاتناش باشلىنىدۇ . بۇنىڭ بىلەن بۇ يىل قاتناش باشلانغان يۇقىرى سۈرئەتلىك تاشيول مۇساپىسى 1000 كىلومېتىردىن ئېشىپ ، شىنجاڭدىكى يۇقىرى سۈرئەتلىك تاشيول ئومۇمىي مۇساپىسى 4300 كىلومېتىرغا يېتىدۇ .
مۇخبىرنىڭ 3-دېكابىر شىنجاڭ ئۇيغۇر ئاپتونوم رايونلۇق قاتناش-تىرانسىپورت نازارىتىدىن ئىگىلىشىچە ، ئاقسۇ-قەشقەر يۇقىرى سۈرئەتلىك تاشيولىنىڭ ئومۇمىي ئۇزۇنلۇقى 428.493 كىلومېتىر بولۇپ ، كۇچا-ئاقسۇ يۇقىرى سۈرئەتلىك تاشيولىدىن باشلىنىپ ، قەشقەر شەھىرىنىڭ شىمالىدىكى ياسىلىش ئالدىدا تۇرغان شەھەر ئايلانما يۇقىرى سۈرئەتلىك تاشيولىغا تۇتاشتۇرۇلىدىكەن . پۈتۈن لىنىيەدە قوش يۆنىلىشتە تۆتتىن ئاپتوموبىل يولى تەسىس قىلىنغان بولۇپ ، يولنىڭ كەڭلىكى 28 مېتىر، سائەتلىك سۈرئىتى 120 كىلومېتىر بويىچە لايىھەلەنگەن . ئاقسۇ-قەشقەر يۇقىرى سۈرئەتلىك تاشيولى پۈتكەندىن كېيىن ، ئۈرۈمچىدىن قەشقەرگە بارىدىغان پۈتۈن مۇساپە يۇقىرى سۈرئەتلىك تاشيول بولۇش ئەمەلگە ئاشۇرۇلىدىكەن .

ئاچال-يەكەن يۇقىرى سۈرئەتلىك تاشيولى

ئاچال-يەكەن يۇقىرى سۈرئەتلىك تاشيولى ‹‹ دۆلەت يۇقىرى سۈرئەتلىك تاشيول تورى پىلانى ›› دىكى G3012 لىنىيەسىنىڭ مۇھىم بۆلىكى ، شۇنداقلا شىنجاڭنىڭ غول تاشيول تورىنىڭ مۇھىم تەركىبىي قىسمى بولۇپ ، قەشقەر ۋىلايىتىنىڭ مارالبېشى ، مەكىت ، يەكەن ناھىيەلىرىدىن ئۆتىدۇ .

ئاچال-يەكەن يۇقىرى سۈرئەتلىك تاشيولى قۇرۇلۇشىغا 2011-يىلى ئىيۇلدا ئىش باشلانغان ، ئومۇمىي ئۇزۇنلۇقى 233.6 كىلومېتىر ، 12 مىليارد يۈەن مەبلەغ سېلىنغان بولۇپ ، شىنجاڭدىكى ھازىرغا قەدەر ئەڭ كۆپ مەبلەغ سېلىنغان تاشيول ھېسابلىنىدىكەن .ئاچال-يەكەن يۇقىرى سۈرئەتلىك تاشيولى قەشقەر-قاغىلىق يۇقىرى سۈرئەتلىك تاشيولى ، ئاقسۇ-قەشقەر يۇقىرى سۈرئەتلىك تاشيولى ۋە مەكىت-قەشقەر يۇقىرى سۈرئەتلىك تاشيولى بىلەن بىرىكىپ جەنۇبىي شىنجاڭدىكى ھالقىسىمان يۇقىرى سۈرئەتلىك تاشيولنى ھاسىل قىلىدىكەن .

مەكىت-قەشقەر يۇقىرى سۈرئەتلىك تاشيولى

مەكىت-قەشقەر يۇقىرى سۈرئەتلىك تاشيولى ‹‹ دۆلەت يۇقىرى سۈرئەتلىك تاشيول تورى پىلانى ›› دىكى ئاقسۇ-خوتەن ، مارالبېشى-يەكەن يۇقىرى سۈرئەتلىك تاشيول لىنىيەلىرىنى تۇتاشتۇرۇپ ، شۇنداقلا شىنجاڭنىڭ غول تاشيول تورىدىكى تۆت غول تاشيولنى تۇتاشتۇرۇپ ، يوپۇرغا ، پەيزاۋات ، كوناشەھەر ناھىيەلىرى ۋە قەشقەر شەھىرىدىن ئۆتىدۇ .
ئىگىلىنىشىچە ، 2015-يىلى خوتەن ۋىلايىتىدە قاراقاش-خوتەن يۇقىرى سۈرئەتلىك تاشيولى ياسىلىدىكەن ، بۇ يولدا قاتناش باشلانغاندىن كېيىن، پۈتۈن شىنجاڭدىكى 14 ۋىلايەت، ئوبلاست، شەھەرنىڭ ھەممىسىگە يۇقىرى سۈرئەتلىك تاشيول تۇتىشىدىكەن .