يېڭى كۈچنى جۇغلاپ، كارخانا ئوبرازىنى قايتا تىكلەش
ئابلىكىم ھەسەن ئۆگەن

ئەنگلىيە ئاۋىياتسىيە شىركىتى 1924 – يىلى قۇرۇلغان بولۇپ، ئۇچۇش لىنىيەسى يەر شارىدىكى 75 دۆلەتنى قاپلىغان دۇنيادىكى ئەڭ چوڭ خەلقئارالىق ئاۋىياتسىيە شىركەتلىرىنىڭ بىرى. بۇ شىركەت ھەر يىلى 36 مىليون خېرىدارنى كۈتۈۋالىدۇ. شىركەت مەسئۇللىرى بىر قېتىملىق خېرىدارلارنى تەكشۈرۈش جەريانىدا، خېرىدارلارنىڭ ‹‹ئەنگلىيە ئاۋىياتسىيە شىركىتىنىڭ خىزمەتچىلىرىنىڭ تەكەببۇر، كىشىنى كۆزگە ئىلمايدىغان سۆز – ھەرىكەتلىرى ئەنگلىيەلىكلەرنىڭ ئەدەپ – ئەخلاقلىق، مېھماندوست ئوبرازىغا تەسىر كۆرسەتتى›› دېگەندەك ئىنكاسىنى ئاڭلايدۇ.

تىجارىتىنى پۈتۈن دۇنياغا يۈزلەندۈرگەن، %60 خېرىدارى چەت ئەللىكلەرنى ئاساس قىلغان ئاۋىياتسىيە شىركىتىنىڭ ‹‹تەكەببۇر››، ‹‹مەنمەنچى›› دېگەن ئاتاقنى ئېلىشى، شىركەتنىڭ تەرەققىيات پىلانىغا قىلچە ماس كەلمەيتتى. شىركەتنىڭ يۇقىرى قاتلام باشقۇرغۇچىلىرى خېرىدارلارنىڭ ئىنكاسىغا جىددىي پوزىتسىيە تۇتۇپ، بىر يۈرۈش تەدبىرلەرنى تۈزۈپ، شىركەتنىڭ ئوبرازىنى قايتا تىكلەش قارارىغا كېلىدۇ.

بۇ قېتىمقى ئوبرازنى قايتا تىكلەشنىڭ مۇھىم نۇقتىسى كىبىر كۆرسىتىپ تىجارەت قىلىش ئەندىزىسىنى ئۆزگەرتىش، يولۇچىلارغا كۆڭۈللۈك يېڭى ئەنگلىيە ئوبرازىنى نامايان قىلىشنى ئاساس قىلىدۇ. شىركەتنىڭ يەرشارىلىشىش ئىستراتېگىيەسىگە ماسلىشىش ئۈچۈن، ئەنگلىيە ئاۋىياتسىيەسى ئىللىق رەڭدە، غۇۋا لايىھەلەش ئىدىيەسىنى قوللىنىدۇ. ئۇلار شىركەتنىڭ 308 ئايروپىلانىغا 50 تىن ئارتۇق ‹‹دۇنياۋى ئوبراز››نى سىزىدۇ، بۇ سىزمىلار ئافرىقا قۇملۇقىدىكى خەلقلەرنىڭ رىۋايەتلىرىنى ياكى گوللاندىيە دېلفىت ساپال بۇيۇملىرىنى ماتېرىيال مەنبەسى قىلغان. شىركەتنىڭ كونا بەلگىسى ‹‹ئۇچار قانات ئىسترېلكىسى›› يۇمىلاق گىرۋەكلىك ئوبرازغا ئۆزگەرتىلىدۇ.

بۇرۇنقى ئەنگلىيە ئاۋىياتسىيەسىگە ۋەكىللىك قىلىدىغان B بىلەن A (بۇ ئىككى ھەرپ دائىم كىشىلەر تەرىپىدىن تەمەننالىق، دەپ چۈشىنىلەتتى) ھەرىپى ئېلىۋېتىلىدۇ، ھەرپنىڭ سىزىقچە كۆرۈنۈشىمۇ سىلىق، يېقىشلىق لايىھەلىنىدۇ. شىركەت يەنە يېڭى ئۈسكۈنىلەرنى كىرگۈزۈپ، ئىشچى – خىزمەتچىلەرنى تەربىيەلەيدۇ. ئەنگلىيە ئاۋىياتسىيە شىركىتىنىڭ بۇ قېتىملىق قايتا ئوبراز تىكلەش قۇرۇلۇشىغا ئۈچ يىل ۋاقىت، 60 مىليون فوندستېرلىڭ مەبلەغ سەرپ قىلىنىدۇ. زور كۈچ بىلەن تەرتىپكە سېلىش ئارقىلىق ئەنگلىيە ئاۋىياتسىيە شىركىتىنىڭ تىجارەت مىقدارى شىددەت بىلەن ئاشىدۇ.

ئەقلىي يەكۈن:

كارخانىلار بىرىنچىدىن، كىرىزىسقا دۇچ كېلىپ، نام – ئاتىقى ئېغىر زەربىگە ئۇچرىغاندا؛ ئىككىنچىدىن، ئەسلىدىكى كارخانا ئوبرازى كۆرۈنەرلىك بولماي، كارخانا تەرەققىياتى ئۈچۈن تېگىشلىك رولىنى جارى قىلدۇرالمىغاندا، كارخانا ئوبرازىنى قايتا تىكلەشنىڭ زۆرۈرلۈكىنى مۇھاكىمە قىلىشى كېرەك. كارخانا ئوبرازىنى قايتا تىكلەشتە مۇھىمى، ئېنىق نىشان بولۇشى؛ نىشان بېكىتىلگەندىن كېيىن، ياخشى ئەمەلىيلەشتۈرۈش كېرەك. 