گوۋۇيۈەن زۇڭلىسى لى كېچياڭ تۈنۈگۈن چۈشتىن كېيىن رىمدىكى زۇڭتۇڭ مەھكىمىسىدە ئىتالىيە زۇڭتۇڭى ناپولىتانو بىلەن كۆرۈشتى.

لى كېچياڭ ئالدى بىلەن رەئىس شى جىنپىڭنىڭ زۇڭتۇڭ ناپالىتانوغا يوللىغان سەمىمىي سالىمىنى يەتكۈزدى. لى كېچياڭ مۇنداق دېدى: جۇڭگو بىلەن ئىتالىيە دىپلوماتىك مۇناسىۋەت ئورناتقاندىن بۇيان، ئىككى دۆلەت دوستلۇق ئەنئەنىسىگە ۋارسلىق قىلىپ، سىياسىي، ئىقتىساد، ئادىمىيەت قاتارلىق ساھەلەردىكى ھەمكارلىقنى پۈتۈن كۈچى بىلەن ئىلگىرى سۈردى، ئىككى دۆلەت خەلقى بۇنىڭدىن نەپ ئالدى. جۇڭگو ئىتالىيە بىلەن سىياسىي جەھەتتە بىر-بىرىگە ئىشىنىشنى مۇستەھكەملەپ، ئەمەلىي ھەمكارلىق ۋە مەدەنىيەت ئالماشتۇرۇشىنى كۈچەيتىپ، ئىككى دۆلەتنىڭ ئومۇميۈزلۈك ئىستراتىگىيەلىك شېرىكلىك مۇناسىۋىتىنى داۋاملىق چوڭقۇرلاشتۇرۇپ، جۇڭگو ياۋروپا مۇناسىۋىتى ۋە ئاسىيا ياۋروپا ھەمكارلىقىنى داۋاملىق تەرەققىي قىلدۇرۇشقا تۈرتكە بولۇشنى خالايدۇ.

لى كېچياڭ مۇنداق دەپ كۆرسەتتى: جۇڭگو بىلەن ئىتالىيەنىڭ ئۆز-ئارا مەبلەغ سېلىشنى كېڭەيتىشى- ئۆز-ئارا پايدا ئېلىپ تەڭ نەپكە ئېرىشىدىغان تاللاش. يېقىنقى يىللاردىن بۇيان، جۇڭگونىڭ ئىتالىيەگە مەبلەغ سېلىشى چوڭقۇرلاشتى، دائىرىسى كېڭەيدى. بۇ ئىككى دۆلەت ئىقتىسادىنىڭ ئۆز-ئارا ئىچىۋېتىش ۋە بېرىكىش دەرىجىسىنىڭ كۈنسېرى چوڭقۇرلاشقانلىقىنىڭ مۇقەررەر نەتىجىسى. جوڭگو ھۆكۈمىتى تېخىمۇ كۆپ ئىتالىيە كارخانىلىرىنىڭ جۇڭگوغا كېلىپ بازار ئېچىشىنى قارشى ئالىدۇ، جۇڭگو كارخانىلىرىنىڭ ئىتالىيەگە بېرىپ مەبلەغ سېلىشىغا داۋاملىق مەدەت بېرىدۇ. جۇڭگو بىلەن ئىتالىيە قەدىمىي مەدەنىيەتلىك دۆلەتلەر، ئىككى تەرەپ ئادىمىيەت ئالماشتۇرۇشىنى قويۇقلاشتۇرۇپ، ئىككى دۆلەت مۇناسىۋىتى تەرەققىياتىغا پۇختا ئاساس سېلىشنى ئۈمىد قىلىدۇ.

ناپولىتانو مۇنداق دېدى: جۇڭگو ئىتالىيەنىڭ مۇھىم ھەمكارلىق شېرىكى. جۇڭگونىڭ تېز تەرەققىياتى كىشىنى قايىل قىلىدۇ، دۇنيا ئىقتىسادىنىڭ ئەسلىگە كېلىشى ۋە ئېشىشىغا مۇھىم تۆھپە قوشتى. ئىتالىيە جۇڭگو بىلەن بىرلىكتە ئالماشتۇرۇش، بىر-بىردىن ئۆرنەك ئېلىشنى يەنىمۇ كۈچەيتىپ، ئىقتىساد سودا، مەدەنىيەت، مەبلەغ سېلىش، كارخانىلار ھەمكارلىقىنى كېڭەيتىپ، ئىككى دۆلەت مۇناسىۋىتىدە يېڭى تەرەققىياتلارنى قولغا كەلتۈرۈشكە تۈرتكە بولۇشنى خالايدۇ.