جاھان ئاگېنتلىقى 14-ماي خەۋىرى؛ لەگلەك تورى تەرجىمىسى: يەمەن تاشقى ئىشلار مىنىستىرى رىياد ياسىن، ئىراننىڭ يەمەنگە پاراخوت ئەۋەتىشىنى يەمەننىڭ مۇقىملىقىنى خالىمايدىغانلىقىنىڭ ئىپادىسى دەپ قاراپ، تېھران بىلەن دىپلوماتىك مۇناسىۋەتنى ئۈزۈش ھەققىدە تالاش-تارتىش قىلىۋاتقانلىقىنى ئېيتتى. يەمەن تاشقى ئىشلار مىنىستىرى رىياد ياسىن، ئىران پاراخوتلىرىنىڭ يەمەن دېڭىز تەۋەلىكىگە يەمەن ھۆكۈمىتىنىڭ رۇخستىنى ئالماستىن كىرگەنلىكى ئۈچۈن پاراخوتقا قارىتا بەزى تەدبىرلەرنى قوللىنىدىغانلىقىنى بىلدۈردى. ياسىن، ئىران بىلەن بولغان دىپلوماتىيە مۇناسىۋىتىنى تامامەن ئۈزۈش ھەققىدە ئويلىشىۋاتقانلىقىنى ئېيتتى. ياسىن، ھەر قانداق بىر تاجاۋۇزغا ئۇچرىغان ياكى ھۇقۇققا رىئايە قىلىنمىغان ئەھۋالدا پۈتۈن ھۇقۇقنىڭ سەئۇدى ئەرەبىستان باشچىلىقىدىكى بىرلەشمە ئارمىيەگە بېرىلگەنلىكىنى بىلدۈردى. بىرلەشكەن دۆلەتلەر يەمەن ئالاھىدە ۋەكىلى، ب د ت خەۋىپسىزلىك كېڭىشىگە ئەۋەتكەن ئۇچۇرىدا، ئىراننىڭ يەمەنگە ئەۋەتكەن پاراخوتلىرىنىڭ تەكشۈرۈلۈشكە رۇخسەت قىلىنماسلىقى مەسىلە پەيدا قىلىشى مۇمكىنلىكى ھەققىدە ئەسكەرتىپ، ھەر قانداق ئەھۋال كېلىپ چىقسا ئىراننىڭ مەسئۇل بولىدىغانلىقىنى ئېيتقان ئىدى. ب د ت يەمەن ئالاھىدە ۋەكىلى، يەمەن ھۆكۈمىتى ۋە ئەرەب بىرلەشمە ئىتتىپاقىنىڭ ياردەم پاراخوتلىرىنىڭ يەمەنگە كىرىشىگە قارشى تۇرمايدىغانلىقىنى ، ئەمما يەمەن ھۆكۈمىتىدىن رۇخسەت ئېلىنىشى ۋە تەكشۈرۈلۈشى كىرەكلىكىنى تەكىتلىگەن.
ئىران تەرەپنىڭ ئېيتىشىچە، ئىنساني ياردەم پاراخوتى ئىراندىن دۈشەنبە كۈنى يولغا چىققان بولۇپ، پاراخوتنىڭ يەمەننىڭ ھۇدايدا پورتىغا يىتىپ بېرىشى بەلگىلەنگەن ئىكەن، پاراخوتتا 2 مىڭ 200 توننا يىمەكلىك ۋە تىببى ئەشيالار بارلىقى، پاراخوتتا يەنە 60 نەپەر قىزىل ئاي جەمئىيتى خادىمى ۋە تەخمىنەن 20 مۇخبىر بار ئىكەن.