18-سېنتەبىر چۈشتىن بۇرۇن سائەت 13:00 دە ، ئۈرۈمچى تەڭرىتاغ رايونى داشىزىغا جايلاشقان ئەسلىدىكى تەڭرىتاغ سودا سارىيى بىناسىغا ئوت كەتتى، نۆۋەتتە، ئادەم يارىلىنىش ۋە قازا قىلىش ئەھۋاللىرى كۆرۈلمىگەن بولۇپ، ئوت كېتىش سەۋەبى ۋە كېلىپ چىققان زىيان تەكشۈرۈلمەكتە.    سائەت 13:05 دە مۇخبىرنىڭ ئوت كەتكەن نەق مەيداندىن ئىگىلىشىچە، ئوت  قۇرۇلۇش قىلىنىۋاتقان ئەسلىدىكى تەڭرىتاغ سودا سارىيىنىڭ 1- قەۋىتىدىن 3- قەۋىتىگىچە يامرىغان. سائەت 13:10 دە، شامال بىر قەدەر كۈچلۈك بولغاچقا ، ئوت بىردەمدىلا داشىزىدىكى پىيادىلەر ئاسما كۆۋرۈكىگە تۇتاشقان. سائەت 13:30 دە ئوت پۈتۈنلەي ئۆچۈرۈۋېلىنغان .    

ئىگىلىنىشىچە ، ئوت ئۆچۈرۈلۈۋاتقاندا،  داشىزى، شىياۋشىزى ، BRT خەلق مەيدانى بېكىتى قاتارلىق يول بۆلەكلىرىدە قاتناش تىزگىلىنىپ ، جۇڭشەن يولى ، تىنچلىق شىمالىي يولى قاتارلىق يول بۆلەكلىرىدە قاتناش توسۇلۇپ قالغان . ئوت ئۆچۈرۈلگەندىن كېيىن قاتناشنى تىزگىنلەش ئەمەلدىن قالدۇرۇلغان بولۇپ ، مۇناسىۋەتلىك يول بۆلەكلىرىدە قاتناش ئەسلىگە كەلتۈرۈلگەن .    

ئۈرۈمچى ئوت ئۆچۈرۈش تارماق ئەترىتى ساقچى ئىشلىرى بۆلۈمىنىڭ مۇئاۋىن باشلىقى بەي پېڭنىڭ تونۇشتۇرۇشىچە، ئۈرۈمچى شەھىرى تەڭرىتاغ رايونى شىنخۇا شىمالىي يولى ئوتتۇرا ئەترىتىنىڭ ئالتە ئوت ئۆچۈرۈش ئاپتوموبىلى، 20 ئوت ئۆچۈرۈش خادىمى نەق مەيداندا ئوت ئۆچۈرۈشكە قاتناشقان.    

بەي پېڭنىڭ بىلدۈرۈشىچە: گەرچە ئوت كېتىش سەۋەبى تېخى ئېنىق بولمىسىمۇ، لېكىن ھۆكۈمگە ئاساسلانغاندا ، قۇرۇلۇش مەيدانىدىكى سىرتقى تامنىڭ ئىسسىقلىق ساقلاش قەۋىتى ، سىرتىغا قاپلانغان تور قاتارلىق ئاسان ئوت ئالىدىغان ماددىلار ئوت ئاپىتى كېلىپ چىقىش سەۋەبلىرىنىڭ بىرى ئىكەن .