چېڭ لوڭ دۆلەتلىك ئاخبارات-نەشرىيات-رادىيو-كىنو-تېلېۋىزىيە باش ئىدارىسىنىڭ مۇئاۋىن باشلىقى توڭ گاڭ ، ئارتىس جاڭ زىيى قاتارلىقلار بىلەن بىللە

خەلقئارا لىنىيەسى خەۋىرى : 2014-يىللىق رۇمىنىيە-جۇڭگو كىنو بايرىمى بېيجىڭ ۋاقتى 11-سېنتەبىر سائەت 21:30 دا رۇمىنىيەنىڭ پايتەختى بۇخارېستتا رەسمىي باشلاندى . ئەمدىلا چاغانلىق فىلىمى ‹‹ ساماۋى قۇدرەتلىك قوشۇن ›› نى سۈرەتكە ئېلىپ تاماملىغان خەلقئارالىق چولپان چېڭ لوڭ كىنو بايرىمىنى ئۇيۇشتۇرغۇچى تەرەپنىڭ تەكلىپى بىلەن كىنو بايرىمىغا قاتناشتى .

نۇرغۇن چەت ئەل مۇخبىرلىرىنىڭ زىيارىتىنى قوبۇل قىلغاندا ، چېڭ لوڭ ئاشكارىلاپ مۇنداق دېدى : ئۆزۈم فىلىم ئىشلىگۈچى بولغان ھەم باش رول ئالغان قىسسە خاراكتېرلىك فىلىم ‹‹ ساماۋى قۇدرەتلىك قوشۇن ›› ناملىق فىلىم 2015-يىلى 2-ئاينىڭ 19-كۈنى چاغان مەزگىلىدە تاماشىبىنلار بىلەن يۈز كۆرۈشىدۇ . نۆۋەتتە فىلىمنىڭ كېيىنكى باسقۇچلۇق ئىشلىرى جىددىي ئېلىپ بېرىلىۋاتىدۇ . دىققەت قىلىشقا ئەرزىيدىغىنى شۇكى ، بۇ فىلىمنىڭ ئاساسىي ناخشىسى ئىجاد قىلىنىپ بولدى ، پەقەت ناخشىچىلا بېكىتىلمىدى . مەن بۇ ناخشىنى ئۆزۈم ئېيتىش-ئېيتماسلىقنى ئويلىشىۋاتىمەن .

چېڭ لوڭ بۇ قېتىم جۇڭگو كىنوچىلىرىنىڭ مۇنەۋۋەر ۋەكىلى بولۇش سالاھىيىتى بىلەن ، جۇڭگو كىنو ۋەكىللەر ئۆمىكى تەركىبىدە رۇمىنىيە-جۇڭگو كىنو بايرىمىغا قاتناشقان . يېقىنقى مەزگىلدە ئاممىۋى پائالىيەتلەرگە ئانچە قاتناشمايۋاتقان چېڭ لوڭ خىزمەتتە يەنىلا ئاۋۋالقىدەكلا ئەستايىدىل بولۇپ ، فىلىم ئىشلەش گۇرۇپپىسىدىن پەقەت بىر كۈنلا رۇخسەت ئېلىپ بۇ قېتىمقى پائالىيەتكە قاتناشقان ھەمدە ئاخبارات ۋاسىتىلىرىنىڭ زىيارىتىنى قوبۇل قىلغان .