دۆلەت رەئىسى شى جىنپىڭ 21-، 22-ئاۋغۇست موڭغۇلىيەدە دۆلەت ئىشلىرى زىيارىتىدە بولدى ھەمدە موڭغۇلىيە دۆلەت بۈيۈك خورۇلدا مۇھىم نۇتۇق سۆزلىدى. خەلقئارا جەمئىيەت رەئىس شى جىنپىڭنىڭ بۇ قېتىمقى زىيارىتىگە يۈكسەك باھا بەردى ھەمدە رەئىس شى جىنپىڭنىڭ بۇ قېتىمقى زىيارىتى مول نەتىجىلەرگە ئېرىشتى، ئەھمىيىتى زور بولدى، بۇ جۇڭگونىڭ يېقىن، سەمىمىي، نەپ يەتكۈزۈش ۋە كەڭ قۇرساق بولۇشتەك ئەتراپ دىپلوماتىيە قارشىنى نامايان قىلىپ، جۇڭگو موڭغۇلىيە مۇناسىۋىتىنىڭ تەرەققىياتىغا كۈچلۈك تۇرتكە بولدى، دەپ ھېسابلىدى.

موڭغۇلىيە جۇڭگو ئىقتىساد-سودا ھەمكارلىق بىرلەشمە كومىتېتىنىڭ موڭغۇلىيە تەرەپ رەئىسى، موڭغۇلىيەنىڭ مۇئاۋىن زۇڭلىسى تىربىشتىگبا مۇنداق دېدى: رەئىس شى جىنپىڭنىڭ جۇڭگونىڭ تارىخى، دۇنيا تىنچلىقى توغرىسىدىكى بايانى ئارقىلىق مەن جۇڭگونىڭ تىنچ تەرەققىي قىلىشدەك دۆلەت سىياسىتىنى تېخىمۇ چۈشەندىم. موڭغۇلىيە بىلەن جۇڭگو ياخشى قوشنىلار، ياخشى دوستلار، رەئىس شى جىنپىڭنىڭ جۇڭگو موڭغۇلىيە مۇناسىۋىتى، خەلقئارا مۇناسىۋەت توغرىسىدىكى بايانى ئىنتايىن مۇھىم.

رۇسىيە پەنلەر ئاكادېمىيەسى يىراق شەرق تەتقىقات ئورنىنىڭ يۇقىرى دەرىجىلىك تەتقىقاتچىسى مۇنداق دېدى: جۇڭگونىڭ دۆلەت رەئىسى شى جىنپىڭ موڭغۇلىيە زۇڭتۇڭى ئىلبىگدۇرچى بىلەن بىرگە ئىمزالىغان بىرلەشمە خىتابنامىسىدىن قارىغاندا، جۇڭگو موڭغۇلىيەنى ئۆزىنىڭ باراۋەر ھەمكارلىق شېرىكى دەپ قارايدىكەن. جۇڭگو موڭغۇلىيە مۇناسىۋىتىنى ئومۇميۈزلۈك ئىستراتېگىيەلىك شېرىكلىك مۇناسىۋىتىگە كۆتۈرۈش ئىككى دۆلەتنىڭ ھەر قايسى ساھەلىرىدىكى ھەمكارلىقىنى يەنىمۇ كېڭەيتىشكە پايدىلىق بولۇپ، جۇڭگو موڭغۇلىيە مەنپەئەتى، شۇنداقلا خەلقئارا جەمئىيەتكە پايدىلىق.

پاكىستان ئىسلام ئاباد خەلقئارا ئىستراتېگىيە تەتقىقات مەركىزىنىڭ باشلىقى ئەلى ساۋار نەقلى مۇنداق دېدى: رەئىس شى جىنپىڭنىڭ نۇتقىدا جۇڭگونىڭ ھەقىقى، سەمىمىي، كەڭ قۇرساق ئەتراپ دىپلوماتىيە قارشى يەنە بىر قېتىم تەكىتلەندى.