تۈنۈگۈنگە قەدەر لىۋىيەدىكى ئىككى گۇرۇھ خەلق ئەسكەرلىرى قوراللىقلىرىنىڭ پايتەخت تېرىپولىدا قوراللىق توقۇنۇشىۋاتقانلىقىغا بىر ئاي بولدى، ئۇنىڭ ئۈستىگە بۇ توقۇنۇش بارغانسېرى كەسكىنلىشىپ كەتتى. شۇنىڭ بىلەن بىر ۋاقىتتا، بەنغازى، دىلناھ، زاۋىياخ قاتارلىق جايلاردىكى توقۇنۇشمۇ ئۈزۈلۈپ قالمىدى. ھەر قايسى گۇرۇھتىكى قوراللىقلار لىۋىيە ھۆكۈمىتى ۋە خەلقئارا جەمئىيەتنىڭ دەرھال شەرتسىز ئۇرۇش توختىتىش مۇراجىئىتىگە پىسەنت قىلمىدى، لىۋىيەنىڭ ۋەزىيىتى ئومۇميۈزلۈك كونتروللۇقىنى يوقاتتى.

بىر ئايدىن بۇيان، ئىككى گۇرۇھتىكى خەلق ئەسكەرلىرى قوراللىقلىرى تېرىپولى خەلقئارا ئايرودۇرۇمىنىڭ كونتروللۇق ھوقۇقىنى تالىشىپ توقۇنۇشتى، ھازىرغىچە تېخى ھېچقايسى تەرەپ يېڭەلمىدى. دىنىي كۈچلەرنى قوللايدىغان مىسۇراتا قوراللىقلىرى 9-ئاۋغۇست ئايرودۇرۇم ئەتراپىدىكى %60 رايوننى كونترول قىلىۋالغانلىقىنى جاكارلىغان بولسىمۇ، لېكىن ئايرودۇرۇمنى دىندىن خالىي كۈچلەرنى قوللايدىغان زىنتان قوراللىقلىرى كونترول قىلىۋاتىدۇ. ئىككى گۇرۇھنىڭ توقۇنۇشى شەھەر رايونىغىچە يامرىدى، شۇنىڭ بىلەن بىرگە تېرىپولىغا 50 كىلومتېر كېلىدىغان زاۋىياخ شەھىرىگىچە كېڭەيدى.

بۇندىن باشقا لىۋىيەنىڭ شەرقىدىكى بەنغازى شەھىرىدە، دىندىن خالىي كۈچلەرنىڭ ۋەكىلى، سەپتىن چېكىنگەن گېنىرال غاپتار كونترول قىلىۋاتقان قوراللىقلار بىلەن ئەنسەر بېرگادىسىنى ئۆز ئىچىگە ئالغان دىنىي قورالىقلار كۆپ قېتىم كەسكىن ئېتىشتى. دىنىي كۈچلەرنى قوللايدىغان قوراللىقلار 7-ئاينىڭ ئاخىرىدا بەنغازىنى كونترول قىلغانلىقىنى جاكارلىدى، لېكىن غاپتار كونترول قىلغان قوراللىقلارنىڭ كۈچى ئاجىزلىغىنى يوق، ئۇلار ھەر ۋاقىت قايتۇرما زەربە بېرىشى مۇمكىن. بىر قانچە كۈندىن بۇيان، غاپتار كونتېروللىقىدىكى ھاۋا ئارمىيەسى بەنغازى ۋە دىلناھ شەھەرىدىكى ئالاقىدار نىشانلارنى ئارقا-ئارقىدىن بومباردىمان قىلدى.

لىۋىيە خەلق قۇرۇلتىيى، ۋاقىتلىق ھۆكۈمىتى، باش ئىشتابى ئۈزلۈكسىز كەسكىنلىشىپ كېتىۋاتقان توقۇنۇشقا ئامال قىلالمىدى. لىۋىيە خەلق قۇرۇلتىيى تۈنۈگۈن قارار چىقىرىپ، بىرلەشكەن دۆلەتلەر تەشكىلاتى خەۋپسىزلىك كېڭىشىنى ئۆز ئىچىگە ئالغان خەلقئارا جەمئىيەتنىڭ ياردەم بېرىپ، پۇقرالارنى قوغدىشىنى ئىلتىماس قىلدى. 6-ئاۋغۇست، لىۋىيە خەلق قۇرۇلتىيى ھەر قايسى قوراللىقلاردىن دەرھال شەرتسىز ئۇرۇش توختىتىشنى تەلەپ قىلدى. لىۋىيەنىڭ باش ئىشتاب باشلىقى ئوربىدىمۇ ھەر قايسى قوراللىقلارغا ئۇرۇش توختىتىش توغرىسىدا بۇيرۇق چۈشۈردى. بۇندىن ئىلگىرى، ۋاقىتلىق ھۆكۈمەت ئۇرۇش قىلىۋاتقان ھەر قايسى تەرەپلەرنىڭ دەرھال ئۇرۇش توختىتىشىنى كۆپ قېتىم مۇراجىئەت قىلغان ئىدى. لېكىن ھەر قايسى قوراللىقلار بۇلارغا پىسەنت قىلمىدى.

تېرىپولىدا توقۇنۇشىۋاتقان ئىككى گۇرۇھ خەلق ئەسكەرلىرى قوراللىقلىرىنى ئاتاقتا ھۆكۈمەت ئۆتكۈزۈۋېلىپ قايتا تەشكىللىگەن بولسىمۇ، لېكىن 2011-يىلى لىۋىيە ئۇرۇشى ئاياغلاشقاندىن كېيىن، لىۋىيە مۇنتىزىم ئارمىيە سىستېمىسى بەرپا قىلمىغان، مەيلى لىۋىيە ۋاقىتلىق ھۆكۈمىتى بولسۇن ياكى باش ئىشتابى بولسۇن ئۇلارنىڭ خەلق ئەسكەرلىرىگە بولغان تەسىرىنى نۆل دېيىشكە بولىدۇ. 3-ئاۋغۇستىن بۇيان، لىۋىيە ھۆكۈمىتى توقۇنۇشتىكى ئۆلۈم يېتىم ئەھۋالىنى ئېلان قىلمىدى، سەھىيە تارماقلىرى ئىستاتىستىكا قىلغىلى بولمايدىغانلىقىنى بىلدۈردى.

غەرب ئەللىرى لىۋىيە ۋەزىيىتىنىڭ كونتروللۇقىنى يوقۇتۇشتىكى مەسئۇلىيەتتىن قېچىپ قۇتۇلالمايدۇ. غەرب ئەللىرى شۇ ۋاقىتتىكى ئۆكتىچىلەرگە ياردەم قىلىپ كازافى ھاكىمىيىتىنى ئاغدۇرۇپ تاشلىغاندىن كېيىن، قالغان ئىشلارغا ئارىلاشمىدى، لىۋىيەنىڭ بەلگىلىك كونترول كۈچىگە ئىگە بولغان مەركىزىي ھۆكۈمەت تەشكىللىشىگە، مۇنتىزىم ھەربىي ۋە ساقچى سسىتېمىسى بەرپا قىلىشىغا ياردەم قىلمىدى. ۋەزىيەت ناچارلاشقاندىن كېيىن، ئامېرىكا، فىرانسىيە، ئەنگلىيەنى ئۆز ئىچىگە ئالغان غەرب ئەللىرى ياراشتۇرۇش ئېلىپ بارماي، ئۆزلىرىنىڭ ئەلچىخانىلىرىنى تاقىۋەتتى. لىۋىيە كۆپ قېتىم خەلقئارا جەمئىيەتنىڭ قول تىقىشىنى مۇراجىئەت قىلغان بولسىمۇ، لېكىن ئامېرىكا قاتارلىق غەرب ئەللىرى بۇنىڭغا سوغۇق مۇئامىلە قىلدى.

بىرلەشكەن دۆلەتلەر تەشكىلاتىنىڭ لىۋىيەگە ياردەم بېرىش ئۆمىكى 12-ئاۋغۇست لىۋىيەدىكى ھەر قايسى قوراللىق گۇرۇھلارنىڭ خەلقئارا جەمئىيەتنىڭ ئۇرۇش توختىتىش تەلىپىگە پىسەنت قىلمايۋاتقانلىقىنى ئەيىبلىدى. بۇندىن ئىلگىرى، بىرلەشكەن دۆلەتلەر تەشكىلاتىنىڭ لىۋىيەگە ياردەم بېرىش ئالاھىدە ئۆمىكى لىۋىيەدىكى ھەر قايسى تەرەپلەر بىلەن زوراۋانلىق توقۇنۇشنى توختىتىش توغرىسىدا مەسىلھەتلەشكەن، بىراق نەتىجە بولمىغان.