بۇنىڭدىن كېيىن كارخانىلار ئېنېرگىيە تېجەپ، مۇھىت ئاسراش ئۆلچىمىگە يەتمىسە، بانكا بۇ كارخانىلارغا قەرز بېرىشتىن ئېھتىيات قىلىدۇ، ھەتتا قەرز بەرمەيدۇ. 
مۇخبىرنىڭ 20- ئىيۇل شىنجاڭ ئۇيغۇر ئاپتونوم رايونلۇق مۇھىت ئاسراش نازارىتىدىن ئىگىلىشىچە، يېقىندا شىنجاڭ بانكا نازارەتچىلىكى ئىدارىسى بىلەن شىنجاڭ ئۇيغۇر ئاپتونوم رايونلۇق مۇھىت ئاسراش نازارىتى ئۇچۇر ئالاقىسى ۋە ئۇنىڭدىن ئورتاق بەھرىمەن بولۇش كېلىشىمى ئىمزالىدى. بۇنىڭدىن كېيىن مۇھىت ئاسراش نازارىتى شىنجاڭ بانكا نازارەتچىلىكى ئىدارىسىنى مۇھىت ئاسراش قانۇن - نىزاملىرىغا خىلاپلىق قىلغان كارخانىلارنىڭ ۋە قۇرۇلۇش تۈرلىرىنىڭ تىزىملىكىنى ھەم قۇرۇلۇش تۈرىنىڭ مۇھىتقا بولغان تەسىرىنى باھالاپ تەستىقلاش ۋە «ئۈچنى بىرلا ۋاقىت» تەكشۈرۈپ ئۆتكۈزۈۋېلىش ئۇچۇرى قاتارلىق مۇھىت ئۇچۇرلىرىنى؛ ھەرقايسى ۋىلايەت، ئوبلاست، شەھەرلەر بۇلغىما ئازايتىش كۆرسەتكۈچى يىللىق (يېرىم يىللىق) مەلۇمات ئۇچۇرلىرىنى؛ نۇقتىلىق كارخانىلارنىڭ بۇلغىما ئازايتىش ئەھۋالىنى؛ شىنجاڭدىكى مۇھىت ئاسراش ئەھۋالى ياخشى ياكى ناچار بولغان كارخانىلارنى؛ مۇھىت ئاسراش قانۇنىغا خىلاپلىق قىلغان كارخانىلارنىڭ تۈزىتىش ئەھۋالى ئۇچۇرى قاتارلىقلارنى ۋاقتىدا تەمىنلەپ تۇرىدۇ.
شىنجاڭ بانكا نازارەتچىلىكى ئىدارىسى بۇ ئۇچۇرلارنى تاپشۇرۇۋالغاندىن كېيىن، رايون تەۋەسىدىكى خاس ئاپپارات ۋە بانكا كەسپى پۇل مۇئامىلە ئاپپاراتلىرىغا ئالاقىدار كارخانىلارنىڭ مۇھىت ئاسراش توغرىسىدىكى ئۇچۇرىنى ئەۋەتىپ بېرىدۇ. ھەرقايسى جايلاردىكى پۇل مۇئامىلە ئاپپاراتلىرى مۇھىت ئاسراش ئۇچۇرىنى قەرز باشقۇرۇشتىكى مۇھىم ئاساس قىلىدۇ. قەرز بېرىشنى تەستىقلىغاندا، ئۆتكەلنى چىڭ تۇتۇپ، ئېنېرگىيە تېجەپ، مۇھىت ئاسراش تەلىپىگە ئۇيغۇن كەلمىگەن كارخانىلارغا ئاسان قەرز بەرمەيدۇ.