ئىلگىرى ئەتراپىمىزدىكى تاللا بازارلىرىدىن كۆكتاتلارنى قىممەت باھادا سېتىۋالاتتىم ، ھازىر مەھەللىمىزدىكى كۆكتات بىۋاسىتە سېتىش نۇقتىسىدىن سېتىۋالىدىغان بولدۇم . بۇ يەردىكى كۆكتاتلارنىڭ باھاسىمۇ ئەرزانكەن –دېدى شەھەر ئاھالىسى سۈي جيەن .

ئۈرۈمچى شەھىرىدە ئەتىگەنلىك بازارلار ئېتىۋېتىلگەندىن كېيىن ، مۇناسىۋەتلىك ئورۇنلار شەھەر ئاھالىلىرىنى كۆكتات بىلەن تەمىنلەشنى تولۇق كاپالەتكە ئىگە قىلىش ئۈچۈن ، ئۈرۈمچى شەھىرىنىڭ تەڭرىتاغ رايونى ، سايباغ رايونى ، يېڭى شەھەر رايونى قاتارلىق بەش رايوندا 27 كۆكتات بىۋاسىتە سېتىش نۇقتىسىنى كۆپەيتىپ قۇردى . ئۈرۈمچى شەھەرلىك كۆكتات بىۋاسىتە سېتىش نۇقتىلىرىنى باشقۇرۇش ئىشخانىسىنىڭ تەلىپى بويىچە، كۆكتات سېتىش نۇقتىلىرىدىكى كۆكتاتلارنىڭ باھا پەرقى %10 ئەتراپىدا بولغان، <<22 – ماي ۋەقەسى>>دىن كېيىن، شەھەرلىك پارتكوم، ھۆكۈمەتنىڭ تەلىپى بويىچە، ئۈرۈمچى شەھەرلىك كۆكتات بىۋاسىتە سېتىش نۇقتىلىرىنى باشقۇرۇش ئىشخانىسى يېڭىدىن تەدبىر قوللىنىپ، كۆكتاتلارنى ھېچقانداق پايدا قوشماي سېتىشنى تەلەپ قىلغان.

ئىگىلىشىمىزچە، ئۈرۈمچى شەھەرلىك سودا ئىدارىسى بازار تەمىنلەشكە كاپالەتلىك قىلىش، مال باھاسىنى قالايمىقان ئۆرلىتىۋېلىش، باھا ئالدامچىلىقى قاتارلىق قىلمىشلارغا زەربە بېرىش ئۈچۈن، يېقىندا مۇناسىۋەتلىك ئورۇنلار بىلەن بىرلىكتە ئۈرۈمچى شەھىرىدىكى زەنجىرسىمان تاللا بازىرى، يول بويىدىكى دۇكانلارنى تەكشۈرگەن. كۆكتات بىۋاسىتە سېتىش نۇقتىلىرىدا ئېلېكتىرونلۇق كۆرسەتمە ئېكران ئورنىتىلىۋاتقان بولۇپ، بۇ ئارقىلىق كۆكتاتلارنىڭ باھاسىنى نازارەت قىلىپ تۇرىدىكەن. ئەگەر شەھەر ئاھالىلىرىنىڭ باھا قاتارلىق مەسىلىلەرگە ئىنكاسى بولسا 12312 گە تېلېفون قىلسا بولىدىكەن.