كىنىيە پايتەختى نايروبىدا 16–ماي پارتلىتىپ ھۇجۇم قىلىش ۋەقەسى يۈز بېرىپ ، كەم دېگەندە 10 ئادەم قازا قىلدى ، 70 تىن كۆپرەك ئادەم يارىلاندى .

ۋەقە يۈز بەرگەن جاي نايروبىنىڭ مەركىزىي سودا رايونىغا يېقىن ئىكەن . كىنىيە دۆلەتلىك ئاپەتكە جىددىي تاقابىل تۇرۇش مەركىزىنىڭ ئاشكارىلىشىچە ، بىرىنچى قېتىملىق پارتلاش كىچىك تىپتىكى مىنبۇسنىڭ يېنىدا يۈز بەرگەن ، ئىككىنچى قېتىملىق پارتلاش جيۇكومبا بازىرىنىڭ ئىچىدىكى بىر دۇكاندا يۈز بەرگەن .

دوختۇرخانا تەرەپنىڭ ئاشكارىلىشىچە ، ۋەقە يۈز بەرگەندىن كېيىن 70 نەچچە يارىدار دوختۇرخانىغا ئېلىپ كېلىنگەن بولۇپ ، كۆپ قىسىمىنىڭ يارىسى ئېغىر ئىكەن . نۆۋەتتە دوختۇرخانىدا يەنە ئىككى ئادەم قۇتقۇزۇش ئۈنۈم بەرمەي قازا قىلغان بولۇپ ، بۇنىڭ بىلەن قازا قىلغانلارنىڭ سانى 10 غا يەتكەن .

نايروبى ساقچى ئىدارىسى باشلىقىنىڭ بىلدۈرۈشىچە ، جەمئىي ئىككى بومبا پارتلىغان . ئۇ يەنە ئاممىنىڭ بەك جىددىيلىشىپ كەتمەسلىكى ئۈچۈن : ‹‹ئالاقىزادە بولۇشنىڭ ھاجىتى يوق ، ھەممە بىزنىڭ كونتروللىقىمىزدا›› دېگەن . ساقچى تەرەپ ئىككى نەپەر گۇمانلىق ئادەمنى تۇتقان .

كىنىيە ئافرىقا ئىتتىپاقى سومالى ياشلار پارتىيەسىنى تازىلاش ھەرىكىتىگە ئاكتىپلىق بىلەن قاتناشقاچقا ، ‹‹بازا تەشكىلاتى›› بىلەن ئالاقىسى بولغان ياشلار پارتىيەسى بۇلتۇر سېنتەبىردە نايروبىنىڭ غەربىي دەرۋازىسىدىكى مال سېتىۋېلىش مەركىزىدە تېررورلۇق ھۇجۇمى قوزغاپ ، نەچچە ئون ئادەمنىڭ قازا قىلىشىنى كەلتۈرۈپ چىقارغان ، بۇ ئاينىڭ باشلىرىدا يەنە ئىككى ئاپتوبۇسنى پارتلىتىپ ، ئۈچ ئادەمنىڭ قازا قىلىشى ، 86 ئادەمنىڭ يارىلىنىشىنى كەلتۈرۈپ چىقارغان ، بۇنىڭدىن بىر كۈن بۇرۇن ، مومباسادا پارتلاش ۋەقەسى يۈز بېرىپ ، 4 ئادەم قازا قىلغان . بەزى تاراتقۇلارنىڭ خەۋىرىگە قارىغاندا ، بۇ قېتىملىق ۋەقەنىڭ پەردە ئارقىسىدىكى پىلانلىغۇچىسىمۇ سومالى ياشلار پارتىيەسى بولۇشى مۇمكىن ئىكەن .

كىنىيە ۋەزىيىتىدىكى قالايمىقانچىلىققا نىسبەتەن ، ئەنگلىيە قاتارلىق بىر قىسىم دۆلەتلەر بۇ دۆلەت پۇقرالىرىنىڭ كىنىيەدىكى خەتەرلىك جايلارغا بېرىپ ساياھەت قىلماسلىقىنى ئاگاھلاندۇردى.