نۇر تورى تەرجىمىسى: دۆلەتلىك ئىستاتىستىكا ئىدارىسى ئېلان قىلغان سانلىق مەلۇماتتا كۆرسىتىلىشچە، 2015- يىلى مەملىكىتىمىزدىكى ئىجتىمائىي ئىستېمال بۇيۇملىرىنىڭ پارچە سېتىلىش ئومۇمىي سوممىسى 30 تىرىليون يۈەندىن ئېشىپ، ئامېرىكىدىنلا قالسا جاھاندىكى 2- چوڭ ئىستېمال دۆلىتىگە ئايلانغان. ئىستېمالنىڭ خەلق ئىگىلىكىگە قوشقان تۆھپىسى %66 تىن ئېشىپ، ئىقتىسادنىڭ ئېشىشىغا تۈرتكە بولىدىغان بىرىنچى ھەرىكەتلەندۈرگۈچ كۈچكە ئايلانغان. ئىستېمال ئىقتىدارى بۇنچە كۈچلۈك بولغان جۇڭگولۇقلار پۇللىرىنى نېمىگە خەجلەيدۇ؟ بۇنىڭغا ئائىت سانلىق مەلۇماتلارنى كۆرۈپ باقايلى:

بەش مىليارد دانىدىن ئارتۇق يىنليەن كارتىسى ئارقىلىق جۇغلانغان ئىستېمالغا ئائىت سانلىق مەلۇماتتا، جۇڭگونىڭ 2015- يىللىق ئىستېمالىغا ئائىت بىر سانلىق مەلۇماتلىق رەسىم سىزىپ چىقىلدى. بۇ رەسىمدە يېمەك- ئىچمەك ئىستېمالىنىڭ ھېلىھەم ئەڭ چوڭ چىقىم ئىكەنلىكى كۆرسىتىپ بېرىلدى. سانلىق مەلۇماتتا كۆرسىتىلىشچە، 2015- يىلىدىن بۇيان يېمەك- ئىچمەك ئىستېمالى سىجىل ئاشقان، ئالدىنقى 11- ئايدا، ئىستېمال سوممىسى ئالدىنقى يىلنىڭ ئوخشاش مەزگىلىگە سېلىشتۇرغاندا %16.6 كۆپەيگەن. كىشى بېشىغا توغرا كەلگەن ئوتتۇرىچە كارتا سۈرۈپ ئىستېمال قىلىش سوممىسى 434 يۈەن بولۇپ، ئالدىنقى يىلدىكىگە سېلىشتۇرغاندا بىر ئاز ئازايغان. گەرچە يەككە ئىستېمال سوممىسى ئازايغان بولسىمۇ، ئەمما ئاھالىلەرنىڭ سىرتقا چىقىپ تاماق يېيىش قېتىم سانى كۆپەيگەن، ئۇنىڭ ئۈستىگە تاماق يېيىش ئادىتىدىمۇ ئۆزگىرىش بولغان. 2015- يىلى، ئاھالىلەر ھەپتە ئاخىرى سىرتقا چىقىپ تاماق يېيىشنى تېخىمۇ ياقتۇرىدىغان بولغان، ئالدىنقى 11 ئايدىلا بۇنىڭغا سەرپ قىلىنغان چىقىم 73 مىليارد 900 مىليون يۈەنگە يەتكەن.