جۇڭگو ياشلار گېزىتى خەۋىرى، 14- يانۋار خەلقئارالىق كەسپىي خىزمەتچى تەكلىپ قىلىش گورۇھى خەيىس ئېلان قىلغان «2016 يىللىق خەيىس ئىش ھەققى كۆرسەتكۈچى» ( تۆۋەندە كۆرسەتكۈچ دەپ ئېلىنىدۇ) دە كۆرسىتىلىشچە، جۇڭگو، شياڭگاڭ، سىنگاپور، مالايسىيا، ياپونىيە قاتارلىق دۆلەت ۋە رايونلاردىكى 3000 دىن ئارتۇق ئادەم ئىشلەتكۈچى ئورۇننى تەكشۈرۈپ تەتقىق قىلغان(بۇ 6 مىليون خىزمەتچى ھەمدە 1200 دىن ئارتۇق خىزمەت ئورنىغا چېتىلغان) . كۆرسىتىلىشچە، جۇڭگودىكى ئادەم ئىشلەتكۈچىلەرنىڭ يېرىمى دېگۈدەك 2016-يىلى ئىش ھەققىنى %10-%6 گىچە ئۆستۈرۈشنى پىلانلىغان بولۇپ، بوغالتىرلىق ۋە پۇل-مۇئامىلە مۇلازىمىتى ساھەسى ئىش ھەققىنىڭ ئۆسۈش نىسبىتى تېخىمۇ يۇقىرى بولىدىكەن.

      بوغالتىرلىق ۋە پۇل-مۇئامىلە مۇلازىمىتى كەسپىدىن ئۈمىدۋار بولۇش بىلەن بىر ۋاقىتتا، ئەكسىچە ئەنئەنىۋىي بانكا كەسپى تېخىمۇ كۆپ خىرىسلارغا دۇچ كېلىدىكەن، « كۆرسەتكۈچ» تە مۆلچەرلىنىشىچە، بانكا كەسپى ساھەسىنىڭ خىزمەتچى قوبۇل قىلىش قىزغىنلىقى ۋە ئىش ھەققىنىڭ ئېشىش سۈرئىتى زەربىگە ئۇچرايدىكەن. ماكرولۇق ئىقتىسادىي مۇھىتنىڭ تەسىرىدە، كارخانا، پارچە سېتىش ۋە شەخىسلەر بانكا كەسپى ساھەسىدە نۆۋەتتە يەنىلا كەسپكە پىشقان يۇقىرى دەرىجىلىك ئىقتىساسلىقلار كەمچىل ئىكەن.

      « كۆرسەتكۈچ» تە كۆرسىتىلىشچە، خىزمەتچى سەپلەش جەھەتتە، كۆپ ساندىكى ئادەم ئىشلەتكۈچىلەر ( %60) 2016 –يىلى سودا پائالىيىتى كۆپىيىدۇ دەپ مۆلچەرلىگەن. كەلگۈسى بىر يىل ئىچىدە، %43 ئادەم ئىشلەتكۈچى تېخىمۇ كۆپ ئۇزاق مەزگىل ئىشلىيەلەيدىغان خىزمەتچىلەرنى ئىشلىتىشنى ئارزۇ قىلىدىغان بولۇپ، %46 ئادەم ئىشلەتكۈچى ھازىر بار بولغان خىزمەتچىلىرىنى ساقلاپ قالىدىكەن.