فىرانسىيە ئاخبارات ئاگېنتلىقى، نيۇيورك، 11ـ يانۋار تېلېگراممىسى: ئىراننىڭ يېقىنقى نەچچە ھەپتىدە نېفىت ئېكىسپورتىنى كۆپەيمەكچى بولۇۋاتقانلىقىنىڭ ئالامىتى كۆرۈلگەنلىكتىن، خەلقئارادا نېفىت باھاسى 12 يىلدىن بۇيانقى ئەڭ تۆۋەن چەككە چۈشۈپ، ھەر بىر تۇڭ نېفىتنىڭ باھاسى 32 ئامېرىكا دوللىرىدىن تۆۋەنلىدى.

     نيۇيورك بازىرىدا غەربىي تېكساس نېفىتىنىڭ باھاسى 1.75 دوللار تۆۋەنلەپ، ھەر بىر تۇڭنىڭ باھاسى 31.41 دوللار بولغان. بۇ باھا 2003ـ يىلى 23ـ دېكابىردا بىر قېتىم كۆرۈلگەنىكەن.

     نېفىت باھاسى ئالدىنقى ھەپتە %10 چۈشكەن. بۇ ھەقتە گېين مەبلەغ باشقۇرۇش شىركىتىنىڭ ئانالىزچىسى فىياد مۇنداق دېدى: «ھازىر كىشىلەر نېفىت باھاسىنىڭ يەنە ئۆرلەيدىغانلىقىدىن ئۈمىدسىزلەندى، شۇڭا بازار كەيپىياتى تېخىمۇ ناچارلىشىپ، نېفىت باھاسى بەك تۆۋەنلەپ كەتتى. بىراق سەئۇدى ئەرەبىستانى بىلەن ئىراننىڭ زىددىيىتى، شۇنداقلا ئىرانغا يۈرگۈزۈلگەن ئىقتىسادىي جازا بىكار قىلىنغاندىن كېيىن، ئىراندىن كېلىدىغان يېڭى نېفىت تەمىناتى نېفىت بازىرىنىڭ كەلگۈسىنى مۆلچەرلەشتىكى مۇھىم ئامىلى بولۇپ قالىدۇ. ئىرانغا يۈرگۈزۈلگەن ئىقتىسادىي جازا بىكار قىلىنغاندىن كېيىن، ئىران خەلقئارا بازارنى كۈنىگە 1 بىر مىليون تۇڭدىن ئارتۇق نېفىت بىلەن تەمىنلەۋاتىدۇ».

بلومبېرگ ئاخبارات ئاگېنتلىقى تور بېكىتىنىڭ 12ـ يانۋاردىكى خەۋىرى: خام نېفىت باھاسى 11ـ يانۋار يەنە شىددەت بىلەن تۆۋەنلىدى، شىمالىي دېڭىز بېرېنت خام نېفىتى ۋە غەربىي تېكساس خام نېفىتىنىڭ باھاسى %6 چۈشتى. ئانالىزچىلار بۇ ھەقتە توختىلىپ مۇنداق دېدى: «نېفىت تەمىناتىنىڭ باھا چۈشۈشكە بولغان ئىنكاسى داۋاملىق ئاستا بولۇۋاتىدۇ، ھازىرقى ئەھۋالدىن قارىغاندا، جۇڭگونىڭ بۇ يىلقى نېفىت ئېھتىياجى سەل تۆۋەنلەيدىغاندەك قىلىدۇ».

     نېفىت باھاسىنىڭ تۆۋەنلىشى كىشىلەرنى قاتتىق ئۈمىدسىزلەندۈرگەن، مورگېن سىتانلېي شىركىتى «ھەر بىر تۇڭ نېفىت باھاسى 20 دوللارغا چۈشۈپ قالىدۇ» دېسە؛ گۇگگېنخايما شىركىتى «25 دوللارغا چۈشىدۇ» دەپ مۆلچەرلىگەن.

    ئەنگلىيەدىكى «پۇل - مۇئامىلە ۋاقتى گېزىتى» تور بېكىتىنىڭ 12ـ يانۋاردىكى خەۋىرى: نېفىت باھاسى داۋاملىق چۈشتى، نۇرغۇن شىركەتلەر «نېفىت باھاسى يەنە چۈشىدۇ» دېيىشىۋاتىدۇ.

     جۇڭگونىڭ ئۇچقاندەك تەرەققىياتى ئۆتكەن ئون يىلدا خەلقئارادا نېفىت ئېھتىياجىنىڭ ئېشىشىغا تۈرتكە بولغانىدى، بىراق يېقىندىن بۇيان بازاردىكى نېفىت تەمىناتىنىڭ ئېھتىياجدىن ئېشىپ كېتىشى، بۇ خىل ئەھۋالنى كەلتۈرۈپ چىقىرىشتىكى يەنە بىر ئامىل بولۇشى مۇمكىن.

ئامېرىكا بانكىسى مېررىل لىنچ گۇرۇھى 11ـ يانۋار 2016ـ يىلىدىكى خام نېفىت باھاسىنى تۆۋەن مۆلچەرلىگەن، ئۇلار بۇنىڭغا نېفىت ئېكسپورت ئەللىرى تەشكىلاتىنىڭ تەمىناتنى ئاشۇرۇۋېتىشى، نېفىت ئىسكىلاتىنىڭ توشۇپ كېتىشى دېگەندەك باھانىلەرنى كۆرسەتكەن. ئۇلارنىڭ ئانالىزچىلىرى نېفىت باھاسىنىڭ كەلگۈسىدىكى ئەڭ تۆۋەن چېكىنى ھازىرلاتىن پەرەز قىلىشنىڭ سەل بالدۇرلۇق قىلىدىغانلىقىنى بىلدۈرگەن.