فرانسىيە خەلقئارا رادىيو ئىستانسىسى 5-يانۋار فرانسىيە ئاخبارات ئاگېنتلىقىنىڭ خەۋىرىنى نەقىل كەلتۈرۈشىچە، جەنۇبىي ئافرىقىلىق ئاق تەنلىك ئايال ئۆي-مۈلۈك ۋاسىتىچىسى پېننىي سپارروۋ ئىجتىمائىي ئالاقە تورىدا سۆز قالدۇرۇپ، يېڭى يىل بايرىمىدا دېڭىز بويىغا بېرىپ ئويناپ ئەخلەت تاشلاپ كەتكەن قارا تەنلىكلەرنى مايمۇنغا ئوخشىتىپ، ئىرقى كەمسىتىش تالاش-تارتىشى پەيدا قىلغان.     خەۋەردە ئېيتىلىشىچە، ئافرىقىلىقلار خەلق قۇرۇلتىيى بايانات ئېلان قىلىپ، ئىجتىمائىي ئالاقە تورىدا ئىرقى كەمسىتىش خاراكتېرىدىكى گەپ-سۆزلەرنى تارقاتقان كىشىلەرنى ‹‹باشقىلارنىڭ ئىززەت-ئابرۇيىغا قەستەن زىيان يەتكۈزدى›› دەپ ئەيىبلىگەن ھەمدە جەنۇبىي ئافرىقىدىكى قارا تەنلىكلەرنى كەمسىتىدىغان ۋە ھاقارەتلەيدىغان گەپ-سۆزلەر ئۈستىدىن جەنۇبىي ئافرىقا كىشىلىك ھوقۇق كومىتېتىغا ئەرز سۇنغان.

   پېننىي سپارروۋ ئىجتىمائىي ئالاقە تورىدا، يېڭى يىل بايرىمى مەزگىلىدە قارا تەنلىك كىشىلەرنىڭ دېڭىز ساھىلىغا ئەخلەت تاشلىغانلىقىدىن زارلىنىپ، ‹‹ھازىردىن باشلاپ، مەن قارا تەنلىكلەرگە خۇددى مايمۇنغا مۇئامىلە قىلغاندەك مۇئامىلە قىلىمەن، ئۇلار خۇددى مەن كۆرۈپ باققان ئوماق كىچىك ياۋا مايمۇنغا ئوخشاش قالايمىقان ئەخلەت تاشلايدۇ›› دەپ يازغان. ئۇزۇن ئۆتمەي ئۇ بۇ يازمىسىنى ئۆچۈرۈپ، كەچۈرۈم سورىغان ھەمدە ھېچقانداق ئادەمنى قەستەن ھاقارەتلەش مەقسىتى يوقلىقىنى بىلدۈرگەن.

   خەۋەردە كۆرسىتىلىشىچە، ماندېلا جەنۇبىي ئافرىقىنىڭ پرېزىدېنتى بولۇپ پۈتۈن مەملىكەتنى ياراشتۇرۇشقا قەسەم قىلغانلىقىغا 22 يىلدىن ئاشقان بولسىمۇ، ئادالەت ۋە ياراشتۇرۇش تەتقىقات يۇرتىنىڭ 12-ئايدا ئېلىپ بارغان بىر تۈرلۈك تەكشۈرۈشىدە كۆرسىتىلىشىچە، كۆپ قىسىم جەنۇبىي ئافرىقىلىقلارنىڭ قارىشىچە، 1994-يىلى تۇنجى قېتىم دېموكراتىك سايلام ئۆتكۈزۈلگەندىن باشلاپ، ئىرقلار مۇناسىۋىتى ‹‹بىر ئىزدا توختاپ قالغان ياكى يامانلاشقان››.