مەركىزىي تېلىۋىزىيە ئىستانسىسىنىڭ خەۋىرىگە قارىغاندا، 2015-يىلى 12-ئاينىڭ 30-كۈنى، گوۋۇيۇەن تەكشۈرۈش ئۆمىكى تەكشۈرۈش ئارقىلىق < شەرق يۇلتۇزى> ناملىق ساياھەت پاراخوتى چۆكۈپ كېتىش ۋەقەسىنى تۇيۇقسىز يۈز بەرگەن، كەم ئۇچرايدىغان كۈچلۈك كونۋىكسىيىلىك ھاۋارايى ئېلىپ كەلگەن كۈچلۈك قارا قويۇن پەيدا قىلغان ئالاھىدە زور ئاپەت خاراكتېرلىك ۋەقە دەپ بېكىتكەن. 2015-يىلى 6-ئاينىڭ 1-كۈنى كەچ سائەت توققۇزدىن 32 مىنۇت ئۆتكەندە، چۇڭچىڭ شەرق پاراخوت شىركىتىگە قاراشلىق ساياھەت پاراخوتى نەنجىڭدىن چۇڭچىڭغا قاراپ يولغا چىققان بولۇپ، بۇ پاراخوت خۇبىي ئۆلكىسى جىيەنلى ناھىيىسىدىكى چاڭجىياڭ داماجوۋ سۇ يولىغا كەلگەندە ئۆرۈلۈپ كېتىپ، 442 ئادەم قازا قىلغان.

    ۋەقە يۈز بەرگەن چاغدا، بۇ پاراخوتتا 454 ئادەم بار بولۇپ، ھەر قايسى تەرەپلەرنىڭ توختىماي ئىزدىشى نەتىجىسىدە، 12 ئادەم ھايات قالغان، ئۇنىڭدىن باشقا 442 ئادەمنىڭ جەسىتى تېپىلغان.

      تەكشۈرۈش ئارقىلىق، <شەرق يۇلتۇزى> ناملىق ساياھەت پاراخوتى چۆكۈپ كېتىش ۋەقەسى  تۇيۇقسىز يۈز بەرگەن، كەم ئۇچرايدىغان كۈچلۈك كونۋىكسىيىلىك ھاۋارايى ئېلىپ كەلگەن كۈچلۈك قارا قويۇن پەيدا قىلغان ئالاھىدە زور ئاپەت خاراكتېرلىك  ۋەقە دەپ بېكىتىلگەن.

     تەكشۈرۈش ئۆمىكىدىكىلەر يەنە < شەرق يۇلتۇزى> ناملىق پاراخوتنىڭ بوراندا ئۆرۈلۈپ چۈشۈشكە قارشى تۇرۇش ئىقتىدارى ئەينى چاغدا كۆرۈلگەن ناچار ھاۋارايىغا تاقابىل تۇرۇشقا يەتمەي قالغان دەپ كۆرسەتكەن.

     ئۇنىڭدىن باشقا، مەزكۇر پاراخوتنىڭ باشلىقى شۇنداقلا شۇ كۈنكى مۇئاۋىن پاراخوت باشلىقىنىڭ ناچار ھاۋارايى ۋە ناچار ھاۋارايى ئېلىپ كېلىدىغان خېيىم-خەتەرگە بولغان تونۇشى يېتەرلىك بولمىغان بولۇپ، يۇقارقى خادىملارنىڭ جىددىي ئەھۋالغا تاقابىل تۇرۇش ئىقتىدارىمۇ يېتەرلىك بولمىغان. پاراخوت ئۆرۈلۈپ كېتىۋاتقاندا، مەزكۇر پاراخوتنىڭ باشلىقى سىرتقا قارىتا قۇتقۇزۇش تەلەپ قىلىش سىگنالى تارقاتمىغان شۇنداقلا پاراخوتتىكىلەرگىمۇ ئاگاھلاندۇرۇش سىگنالى تارقاتمىغان.

      بۇ ۋەقەدە شۇ قېتىملىق ۋەقەگە ئالاقىدار 43 ئادەم جازالانغان بولۇپ، بۇنىڭ ئىچىدە بىر نەپەر ئۆلكە دەرىجىلىك كادىرغىمۇ جازا بېرىلگەن. چۇڭچىڭ پاراخوت شىركىتىگىمۇ تىجارەتنى توختىتىپ تۈزەش ئېلىپ بېرىش جازاسى بېرىلگەندىن باشقا، يەنە شىركەتتىكى بەش ئادەم ۋەزىپىسىدىن ئېلىپ تاشلانغان.