بازار تەكشۈرۈش شىركىتى TalkingData نىڭ سانلىق مەلۇماتىدا كۆرسىتىلىشىچە، ئالما شىركىتى يېڭىدىن ئوتتۇرىغا چىقارغان چوڭ ئېكرانلىق تاختا كومپىيوتېر iPad Pro جۇڭگو بازىرىغا كىرگىلى بىر ئاي بولغان. ئەمما سېتىلىش مىقدارى ئاران 49 مىڭ دانىگە يەتكەن. جۇڭگو ئىستىمالچىلىرىنىڭ ئالمىنىڭ يېڭى مەھسۇلاتىغا بولغان قىزغىنلىقى ئىنتايىن يۇقىرى. شۇڭلاشقا كىشىلەر ئومومىيۈزلۈك ھالدا iPad Pro نىڭ سېتىلىشىمۇ ياخشى بولىدۇ دەپ قارىغان ئىدى. ئەمما TalkingData نىڭ سانلىق مەلۇماتىدا ئايان بولىشىچە، iPad Pro جۇڭگو بازىرىغا سېلىنغاندىن كېيىن، تۇنجى ئېيىدا ئاران 49 مىڭ دانە سېتىپ چىقىرىلغان. سېلىشتۇرۇپ كۆرسەك iPad Air 2 جۇڭگو بازىرىغا سېلىنغان تۇنجى ئېيىدا 557 مىڭ دانە سېتىلغان. iPad mini 4 نىڭ بازارغا سېلىنغان ۋاقتى iPad Pro دىن ئۈچ ئاي بالدۇر بولغان، ئەمما سېتىلىش مىقدارى 92 مىڭ دانىگە يەتكەن.

TalkingData شىركىتىنىڭ دېيىشىچە، iPad Pro نىڭ دەسلەپكى قەدەمدىكى سېتىلىش مىقدارى كۆڭۈلدىكىدەك بولمىغان، بۇ بەلكىم iPad Pro نىڭ يۇقىرى سېتىلىش باھاسى بىلەن مۇناسىۋەتلىك بولىشى مۇمكىن. iPad Pro نىڭ جۇڭگو بازىرىدىكى باشلىنىش باھاسى 5888 يۈەن (908 دوللار) قىلىپ بېكىتىلگەن. شۇنداق بولىشىغا قارىماي كەسپى ئانالىزچىلارنىڭ مۆلچەرلىشىچە، iPad Pro بازارغا سېلىنغان تۇنجى پەسلىدە يەر شارى بويىچە  سېتىلىش مىقدارى 3 مىليون دانىگە يىتىپ، ئالما شىركىتىگە 2 مىليارت 400 مىليون دوللارلىق تىجارەت كىرىمى يارىتىپ بېرىدىكەن. نۆۋەتتە جۇڭگو ئالما شىركىتىنىڭ ئەڭ چوڭ بازىرىغا ئايلانغان بولۇپ، بۇ يىل ئۈچىنچى پەسىلدە ئالما شىركىتى ئۈچۈن 13 مىليارد دوللارلىق تىجارەت كىرىمى يارىتىپ بەرگەن.