12-ئاينىڭ 22-كۈنى سەھەر دىيارىمىز ۋاقتى 2:00 دە، 2015-2016 مۇسابىقە پەسىللىك ئېنگىلاند دەرىجىدىن تاشقىرى بىرلەشمىسىنىڭ 17-ئايلانمىسىدىكى بىر مەيدان قىززىق نۇقتىلىق مۇسابىقە ئېلىپ بېرىلىدۇ. قورال ياراق زاۋۇتى- ئارسېنال كوماندىسى خەلىپە پۇتبول مەيدانىدا ھىلال ئاي- مانچېستىر شەھىرى كوماندىسىنى كۈتۈۋالىدۇ. ئالدىنقى 16 ئايلانما مۇسابىقىدە ئارسېنال كوماندىسى 10 مەيدان يېڭىپ، ئۈچ مەيدان تەڭلىشىپ ۋە ئۈچ مەيدان مەغلۇپ بولغان. ھازىر بىرلەشمە رەت-تەرتىپتە ۋاقىتلىق ئىككىنچى ئورۇندا تۇرىۋاتىدۇ. مانچېستىر شەھىرى كوماندىسى بولسا 10 مەيدان يېڭىپ، ئىككى مەيدان تەڭلىشىپ، تۆت مەيدان ئۇتتۇرۇپ بىرلەشمىدە ئۈچىنچى ئورۇندا تۇرىۋاتىدۇ.   ئىككى كوماندىنىڭ ئۇچىرىشىش تارىخى: ئېنگىلاند دەرىجىدىن تاشقىرى بىرلەشمە تارىخىدا ئىككى كوماندا 36 مەيدان مۇسابىقىلەشكەن. بۇنىڭ ئىچىدە ئارسېنال كوماندىسى 22 مەيدان يېڭىپ، سەككىز مەيدان تەڭلىشىپ، ئالتە مەيدان ئۇتتۇرۇپ، بۇ جەھەتتىكى نەتىجىسى ئۈستۈن ئورۇندا تۇرىدۇ. 61 توپ كىرگۈزۈپ، 31 توپ كەتكۈزۈپ قويغان. ئۆز مەيدانىدا ئېلىپ بېرىلغان 18 مەيدان مۇسابىقىدە ئارسېنال كوماندىسى 11 قېتىم يېڭىپ، ئالتە قېتىم تەڭلىشىپ ۋە بىر قېتىم ئۇتتۇرغان. 28 توپ كىرگۈزۈپ، 10 توپ كەتكۈزۈپ قويغان. ئارسېنال كوماندىسىدىكى چىلىلىق داڭلىق ھۇجۇمچى سانچېس بىلەن مانچېستىر شەھىرى كوماندىسىدىكى ئاگۇيرو بۇ مۇسابىقىدە مەيدانغا چىقىشى مۇمكىن. ئىككى توپچى يېقىندىن بۇيان يارىلىنىش سەۋەبىدىن مەيدانغا چىقالمىغان. ھەر ئىككىلىسى ئۆز كوماندىسىنىڭ يادىرولۇق ماھىرلىرى ھېسابلىنىدۇ. خەۋەرگە قارىغاندا، ئاگۇيرو ساقىيىپ مەشققە قاتناشقان. ئارسېنال كوماندىسىنىڭ مەشقاۋۇلى ۋېنگىر سانچېسنىڭ مەيدانغا چىقىدىغانلىقىنى دەلىللىگەن. شۇنداق بولغاندا بۇ مۇسابىقە تېخىمۇ كەسكىنلىشىپ كېتىدۇ.

      بۇ ئايلانما مۇسابىقىدە لىكېستىر شەھىرى كوماندىسى مېھمان مەيداندا كۈچلۈك ئېۋېرتون كوماندىسىنى 3 : 2 نەتىجە بىلەن مەغلۇپ قىلدى. بىر مەيدان مۇسابىقىنى كۆپ ئوينىغان ئەھۋال ئاستىدا لىكېستىر شەھىرى كوماندىسى ھازىر ئىككىنچى ئورۇندىكى ئارسېنال كوماندىسىدىن بەش نۇمۇر ئېشىپ كەتتى. (مانچېستىر شەھىرى كوماندىسىدىن ئالتە نۇمۇر) بۇ مۇسابىقە ئىككى كوماندىغا نىسبەتەن ئىككىنچىلىكنى تالىشىش جېڭى بولۇپ قالىدۇ. ئارسېنال كوماندىسىنىڭ ئۆز مەيدانىدىكى نەتىجىسى ياخشى، ئىلگىرى ئۆز مەيدانىدا مانچېستىر شەھىرى كوماندىسىنى 11 قېتىم يەڭگەن. ئەمما يېقىنقى ئالتە مەيدان مۇسابىقىدە ئارسېنال كوماندىسى رەقىبىنى پەقەت بىر قېتىملا يەڭگەن. باشقا مۇسابىقىدە تەڭلىشىپ قالغان.

    مانچېستىر شەھىرى كوماندىسى يېقىندىن بۇيان ئۇدا تۆت قېتىم مېھمان مەيداندا يېڭىپ باقمىدى. بۇنىڭ ئىچىدە ئۈچ مەيدان مۇسابىقىدە بىرمۇ توپ كىرگۈزەلمىدى. ئەگەر بۇ قېتىم يەنە توپ كىرگۈزەلمىسە، ئۇ چاغدا 2006-يىلى 2-ئايدىن بۇيان تۇنجى قېتىم ئۇدا تۆت قېتىم مېھمان مەيداندا توپ كىرگۈزەلمەسلىك نەتىجىسىنى يارىتىدۇ.  مەشقاۋۇل ۋېنگېر بۇ مۇسابىقىدە ئاساسلىق جىرۇد بىلەن مەسئۇت ئۆزىلگە تايىنىدۇ. مەسئۇت ئۆزىلنىڭ ئىپادىسى بۇ پەسىل قالتىس بولدى. ھازىرغا قەدەر 13 ياردەمچى پاس چىقىرىپ بولدى. فرانسىيەلىك ھۇجۇمچى جىرۇدنىڭ ئىپادىسىمۇ قالتىس، ئۇ 12 مەيدان بىرلەشمە مۇسابىقىدە سەككىز توپ كىرگۈزدى. قىززىق نۇقتىلىق بۇ مۇسابىقىنى كۆرۈشنى ئۇنۇتماڭ......