ئالدىنقى ھەپتە چېلسى ترېنېر ئالماشتۇرۇشنى ئېلان قىلدى، ھىدنىك مورىنھونىڭ ئورنىنى ئېلىپ كۆك قوشۇننىڭ يېڭى ترېنېرىغا ئايلاندى. بىراق چېلسى مەستانىلىرى كۇلۇب يۇقىرى قاتلىمىنىڭ بۇ قارارىنى قوللىمىدى، ئالدىنقى ھەپتە ئېنگىلاند بىرلەشمىسىدە سىتەنفورد كۆۋرۈكى مەيدانىدىكى مەستانىلەر كۆپلىگەن لوزۇنكا چىقىرىپ مورىنھونى قوللايدىغانلىقىنى بىلدۈردى. چېلسى كاپىتانى تېررىمۇ ئۇدۇللا ئەسلىدە بىر قىسىم توپچىلارنى ھەيدەش كېرەك ئىدى دېدى.

      «كۈندىلىك پوچتا گېزىتى» نىڭ خەۋەر قىلىشىچە، تېررى «دەرۋەقە بىز توپچىلارنىڭ ئىپادىسى ياخشى بولماي ترېنېرنىڭ ئىشتىن بوشىتىلىشىنى كەلتۈرۈپ چىقاردۇق، بىز توپچى بولۇش سۈپىتىمىز بىلەن بۇنىڭغا مەسئۇل بولىشىمىز كېرەك، بىز بۇ نۇقتىنى يوشۇرۇشنى ئويلىمايمىز. ناۋادا كۇلۇب كۆپلىگەن توپچىلارنى ھەيدىۋەتسە بولىدىغان بولسا، ئۇنداقتا مەن كۇلۇبنىڭ مۇشۇنداق قىلىشىنى قوللايمەن، ئەمما بەخىتكە قارشى، بۇ قېتىملىق ھەيدەش تەقدىرى ترېنېرغا بېكىتىلىپ قالدى، بىز بۇنىڭغا ئامالسىز.» دەپ ئېنىق ئىپادە بىلدۈردى.

      گەرچە تېررى ئىسمىنى ئاتىمىغان بولسىمۇ، ئەمما ئالدىنقى ھەپتە ئاخىرىدىكى بىرلەشمە مۇسابىقىدە كوستا، فابرىگاس، پېدرو، ئىۋانوۋىچ بۇ بىرقانچە نەپەر توپچىلار چېلسى مەيدانىدىكى مەستانىلەرنىڭ ئىسقىرتىشىغا ئۇچرىدى. مەستانىلەر ئۈزۈلۈكسىز يۇقىرى ئاۋازدا مورىنھونىڭ ئىسمىنى توۋلىدى ھەمدە بۇ توپچىلارنى كوماندىنىڭ نۆۋەتتىكى قىيىن ئەھۋالىغا مەسئۇل بولىشى كېرەك دەپ قارىدى.

     تېررى بۇنىڭغا قارىتا «جۈمە كۈنى بىز كوماندا ئىچىدە بىر قېتىم يىغىن ئېچىپ، بىز چوقۇم بىرلىشىشىمىز كېرەك دەپ قارار قىلدۇق، بۈگۈن ياكى ئەتىلا ئەمەس، كەلگۈسىدىكى بەش ئالتە ئاينىڭ ھەممىسىدە مۇشۇنداق قىلىمىز. مەستانىلەرنىڭ ئىپادىسى ئۇلارنىڭ مورىنھوغا بولغان ساداقىتىنى ئىپادىلەپ بەردى، ئۇ بۇ كۇلۇب ئۈچۈن ئېلىپ كەلگەن گۈزەل ئەسلىمىنى بارلىق مەستانىلەرنىڭ ھەممىسى مەڭگۈ ئۇنتۇلۇپ قالمايدۇ، دەرۋەقە ئۇلار ھازىر مورىنھونىڭ ئايرىلىشىدىن ئۈمىدسىزلىك ھېس قىلدى. ئەمما ھازىر ترېنېر كەتتى، قايتا ئاچچىقلانغاننىڭ ئەھمىيىتى يوق، بىز چوقۇم ئالدىغا نەزەر سېلىشىمىز كېرەك.» دەپ ئىپادە بىلدۈردى.