جۇڭگو خەۋەر تورى 21-دېكابىر خەۋىرى: تاراتقۇلارنىڭ خەۋىرىگە قارىغاندا، ئامېرىكىنىڭ گىئورگىيە ئىشتاتىدىكى كۆپلىگەن ماشىنا شوپۇرلىرى مۇشۇ ھەپتە قاتناش ساقچىسى تەرىپىدىن توسۇۋېلىنغان چاغدا، جازاغا ئۇچرىماستىن ئەكسىچە 100 دوللار مۇكاپات ئالغان، بەزى كىشىلەر بۇنىڭدىن تەسىرلەنگەنلىكتىن ھەتتا خۇشال بولۇشۇپ، كۆزلىرىدىن ياش ئېقىتقان. ئەسلىدە بۇ پۇللارنى نامەلۇم كىشى ساقچىلار ئارقىلىق قائىدىگە خىلاپلىق قىلغانلار ئۈچۈن ئىئانە قىلغان.   خەۋەردە دېيىلىشچە، گىئورگىيە ئىشتاتىدىكى مونروي ناھىيەسىنىڭ ساقچى ئەمەلدارى جون بىتىك ساقچىلارغا 54 دانە 100 دوللارلىق پۇل تارقىتىپ بەرگەن بولۇپ، ئالدىنقى ھەپتىنىڭ ئۈچ كۈنىدە بۇ رايوندا قاتناش قائىدىسىگە يېنىك دەرىجىدە خىلاپلىق قىلغان شوپۇرلارغا 100 دوللاردىن مۇكاپات بەرگەن.

     جون بىتىك مۇنداق دېدى:  بۇ ئىسمىنى ئاشكارىلاشنى خالىمىغان پۇل ئىئانە قىلغۇچىنىڭ قارىشىچە، نۆۋەتتە پۈتۈن مەملىكەت مىقياسىدا ساقچىلار بىلەن پۇقرالارنىڭ مۇناسىۋىتى يامانلىشىپ قالغان بولۇپ، بۇ ئۇلارنىڭ مۇناسىۋىتىنى ياخشىلاشتىكى بىر ئۈنۈملۈك باشلىنىش ئىكەن.

  جون بىتىك ساقچىلارنىڭ بۇ پۇللارنى قارىماققا پۇلغا ئېھتىياجلىق بولغان كىشىلەر ئۈچۈن تارقىتىپ بېرىشنى تەلەپ قىلغان. مەسىلەن: ماشىنىسىدا كۆپلىگەن بىخەتەرلىك ئورۇنلىرى سەپلەنگەن ئايال شوپۇرلار، بۇ ئۇلارنىڭ بىر چوڭ ئائىلىسى بارلىقىنى، ئۇلارنىڭ ئىقتىسادى يۈكىنىڭ ئېغىرلىقى چۈشەندۈرۈپ بىرىدۇ.

   ئىگىلىنىشچە، WMZ تېلېۋىزىيە ئىستانسىسى ئېلان قىلغان سىنئالغۇدا ساقچى تەرىپىدىن توسۇۋېلىنغان بىر كىشى ئۆزىنىڭ جەرىمانىگە ئۇچرايدىغانلىقىدىن ئەنسىرىگەن، لېكىن بۇ كىشى جازاغا ئۇچرىماي ئەكسىچە پۇل ئالغانلىقىدىن خۇشال بولۇپ تەسىرلەنگەندە ھالدا ساقچىغا «مەن سىزنى قۇچاقلاپ قويسام بولامدۇ؟» دېگەن.

    بەزى كىشىلەر بۇنىڭدىن خۇشال بولۇشۇپ تەسىرلىنىپ يىغلىشىپ كەتكەن، لېكىن ھەممىلا ئادەم بۇنداق تەلەيلىك بولۇپ كەتمىگەن. قائىدىگە خىلاپلىق قىلسىمۇ مۇكاپات ئالىدىغان بۇنداق ياخشى ئىشتىن خەۋىرى يوق بىر ئايال شوپۇر ساقچى تەرىپىدىن توسۇۋېلىنىپ، ساقچىنى تىللىغانلىقى ئۈچۈن 100 دوللارلىق مۇكاپاتتىن قۇرۇق قالغان.

    جون بىتىكنىڭ دېيىشىچە، بۇ ئەھۋالنى داۋاملاشتۇرۇش ئۈچۈن، يەنە بىر ئاقكۆڭۈل كىشى بۇنىڭغا ئاۋاز قوشۇپ، 5000 دوللار چىقىرىپ بۇ پائالىيەتنى يەنە ئېلىپ بارماقچى بولغان.