ئامېرىكا «ۋاشىنگىتون كۈندىلىك پوچتا گېزىتى» نىڭ 18-چېسلا خەۋەر قىلىشىچە، فىرانسىيەنىڭ پايتەختى پارىژ شەھىرىنىڭ شەھەر سىرتىغا جايلاشقان 17-ئەسىر ئۇسلۇبىدا سېلىنغان لۇيىس 14- قەلئەسى (Louis XIV castle) يېقىندا ئوتتۇرا شەرقلىق بىر كىشى تەرىپىدىن 301 مىليون دوللارلىق باھا بىلەن سېتىۋېلىندى ۋە شۇنداقلا بۇنىڭلىق بىلەن پۈتۈن دۇنيا بويىچە ئەڭ قىممەت تۇرالغۇ بولۇپ قالدى.

ئەنگىلىيە «كۈندىلىك پوچتا گېزىتى» نىڭ خەۋەر قىلىشىچە، لۇيىس 14- قەلئەسىنىڭ ئىگىلىگەن يەر مەيدانى 23 گىكتار بولۇپ، ئۈچ يىل ۋاقىت سەرپ قىلىنىپ، 2011-يىلى پۈتتۈرۈلگەن، بىراق تاكى بۈگۈنگە قەدەر بۇ تۇرالغۇنى سېتىۋالىدىغانغا ئادەم چىقماي كەلگەن.

بىلۇنبۇرگ ئاخبارات ئاگېنتلىقىنىڭ ئاشكارىلىشىچە، ئوتتۇرا شەرقلىق بىر كىشى كىرىستېيىس كىم ئارتۇق قىلىپ سېتىش مەركىزى (Christie's auction house) نىڭ قارمىقىدىكى بىر ئۆي-مۈلۈك شىركىتىنىڭ ياردىمىدە 301 مىليون دوللارلىق (تەخمىنەن بىر مىليارد 950 مىليون يۈەن خەلق پۇلى) باھا بىلەن بۇ قەلئەنى سېتىۋالغان. بۇ قېتىملىق سودا 2011-يىلى لوندوندىكى بىر تۇرالغۇنى 221 مىليون دوللارلىق باھا بىلەن سېتىۋېلىش رىكوردىنى بۇزۇپ تاشلىغان.

خەۋەردە دېيىلىشىچە، مەزكۇر قەلئە 17-ئەسىر فىرانسىيە ئوردىسى ئۇسلۇبىدا سېلىنغان بولۇپ، ئىچىدە 10 يۈرۈش ئۆي، لۇيىس 14- پادىشاھنىڭ خان ئوردىسىگە تەقلىد قىلىپ ياسالغان گۈللۈك، ئۆي ئىچى-سىرتى سۇ ئۈزۈش كۆلى، تام توپى (راكېت توپ) مەيدانى، كۇتۇپخانا، كىنوخانا، ئىككى مۇراسىم زالى، كېچىلىك بەزمىخانا تىپىدىكى كۆڭۈل ئېچىش ئۆيى ۋە 300 بوتۇلكا ئامېرىكا ھارىقى ساقلانغان ھاراق ساقلاش ئىسكىلاتى بار. ئەڭ مۇھىمى شۇكى، قەلئە ئىچىدە يەنە سۇ ئاستىغا جايلاشتۇرۇلغان خىيال قىلىش ئۆيىدىن بىرى بار، بېلىقلار ئەينەكتىن ياسالغان تاملارنىڭ ئەتراپىدا ئۈزۈشۈپ يۈرىدۇ.

قەلئەنىڭ ئىچكى بېزىلىشىمۇ رەسمى پادىشاھلارنىڭكىدەك ھەشەمەتلىك بولۇپ، مىكىلانجىلونىڭ يۇمىلاق شەكىللىك تورۇسى، ۋېرسايللېس ئوردىسى (Palace of Versailles) گە تەقلىد قىلىنغان ئاپوللو فونتانى (Apollo fountain) قاتارلىقلار بار، ھەتتا ھەر خىل ھەيكەللەرمۇ ئالتۇندىن ھەل بېرىلگەن، قەلئە ئىچىگە كىشى ھەيرانۇ-ھەس بولماي قالمايدۇ.

ئۇندىن باشقا مەزكۇر قەلئەگە يەنە ناھايىتى ئىلغار پەن-تېخنىكىلىق سىستېما ئورۇنلاشتۇرۇلغان بولۇپ، ئۆي ئىگىسى تاختا كومپىيوتىر ئارقىلىق ھەر بىر بۇلۇڭ-پۇچقاقنىڭ ئەھۋالىنى ھەر ۋاقىت كۆزىتەلەيدۇ.

مەزكۇر قەلئە ۋېرسايللېس بىلەن مارلىي (Versailles and Marly) ئارىسىغا جايلاشقان بولۇپ، ئەينى ۋاقىتتا لۇيىس 14- پادىشاھنىڭ بىخەتەرلىكىگە مەسئۇل بولغان شىۋېتسارىيەلىك قوغدىغۇچىلار دەل مۇشۇ جايدا تۇراتتى.

2014-يىلى كىم كارداشىيان (Kim Kardashian)، داڭلىق ناخشىچى كاينې ۋېسىت (Kanye West) ئىككىسى بۇ جايدا توي مۇراسىمى ئۆتكۈزۈشنى پىلانلىغان، بىراق كېيىن مەلۇم سەۋەبلەر تۈپەيلىدىن ئىتالىيە فىلورېنسې (Florence) دىكى گۈزەل قەلئەدە توي قىلغان.