ئالدىنقى ھەپتىدە پارىژدا ئۆتكۈزۈلگەن كىلىمات ئۆزگىرىش يىغىنىدا تارىخى ئەھمىيەتكە ئىگە «پارىژ كېلىشىمى» ئىمزالاندى، بۇ كېلىشىم كەلگۈسىدە پۈتۈن دۇنيادىكى پارنىك گازىنى قويۇپ بېرىش مىقدارىنىڭ ئازىيىدىغانلىقىنى بىلدۈرىدۇ. ئامېرىكىنىڭ سانتىياگو شەھىرىمۇ بۇ كېلىشمگە يېقىندىن ئەگەشتى. شەھەرلىك پارلامېنتنىڭ بېلەت تاشلاپ قارار قىلىش ئارقىلىق ئامېرىكىدىكى 8-چوڭ شەھەر سانتىياگو شەھىرى ئامېرىكا بويىچە تۇنجى بولۇپ كەلگۈسى 20 يىل ئىچىدە پارنىك گازىنى قويۇپ بېرىش مىقدرنى %50 تۆۋەنلىتىپ، %100 لىك قايتا ھاسىل بولىدىغان ئېنېرگىيە ئىشلىتىشكە ۋەدە بەرگەن شەھەرگە ئايلاندى. بۇ نىشانغا يېتىش ئۈچۈن شەھەرلىك ھۆكۈمەت ئەمەلدارىنىڭ بىلدۈرۈشىچە، 2020-يىلىغا بارغاندا شەھەردىكى يېرىمغا يېقىن ماشىنىنى توكلۇق ماشىنىغا ئالماشتۇرىدىكەن، ھەمدە %98 پاسكىنا سۇلارنى بىر تەرەپ قىلىش زاۋۇتى ۋە تۇرۇبا سۈيى شىركىتى بىر تەرەپ قىلىش جەريانىدا ھاسىل بولغان پاتقاق گازىنى سېتىۋالىدىكەن.  

      بۇ پىلاننىڭ تەپسىلاتلىرى يەنىلا مۇزاكىرە ئۈستىدە ئىكەن، ئەمما شەھەر باشلىقى Kevin L. Faulconer ھالقىلىق بىرىنچى قەدەمنىڭ نىشاننى ئوتتۇرىغا چىقىرىش ئىكەنلىكى، شۇنىڭ بىلەن بىرگە بۇ نىشاننى چوقۇم ئورۇنلاشنىڭ زۆرۈرلىكىرنى بىلدۈرگەن. نۆۋەتتە بۇ شەھەر  5 تۈرلۈك ئىستىراتېگىيىلىك پىلاننى ئېلان قىلغان. كالىفورنىيە شىتاتلىق مۇھىت ئاسراش ئورگىنىدىكى پاكىز ئېنېرگىيە تۈرىنىڭ مەسئۇلى Evan Gillespie نىڭ بىلدۈرۈشىچە، بۇ پىلاننىڭ كالىفورنىيە شىتاتىنىڭ ھەر يىلى 7 مىليون توننا پارنىك گازىنى ئاز قويۇپ بېرىشىگە ياردىمى بولىدىكەن. بۇنىڭدىن ئىلگىرى كالىفورنىيە شىتاتى 2050- يىلىغا بارغاندا پارنىڭ گازىنى قويۇپ بېرىش مىقدارنى %80 ئازايتىدىغانلىقىنى بىلدۈرگەن. Gillespie يەنە لوس ئانژېلىس، سان فىرانسېسكو ۋە نىيو يورك شەھەرلىرىنىڭمۇ دەرھال ھەركەتكە كېلىشىنى ئۈمىد قىلغان.