ئىقتىساد تور بېكىتى MarketWatch نىڭ خەۋىرىگە قارىغاندا، ئېلون ماسك (Elon Musk) يىقىندا تۆۋەن باھادا قايتۇرۇپ سېتىۋالغان پاي چېكىنىڭ باھاسى زور نىسبەتتە ئۆسۈپ، ئۇنىڭغا نۇرغۇن پايدا ئېلىپ كەلگەن. ئامېرىكا پارلامېنتى يىقىندا بىر تۈرلۈك لايىھەنى ماقۇللاپ، قايتا ھاسىل بولىدىغان ئېنېرگىيە ساھەسىگە ئائىت بىر تۈرلۈك ھالقىلىق باجنى كەچۈرۈم قىلىش نىسبىتىنى يۇقىرىلىتىدىغانلىقىنى جاكارلىغان. بۇ خەۋەرنىڭ تەسىرىدە، ماسكنىڭ قول ئاستىدىكى خەلق ئىشلىرىغا ئىشلىتىلىدىغان قۇياش ئېنېرگىيەلىك باتارىيە تاختىسى قۇراشتۇرۇش كارخانىسى SolarCity نىڭ پاي چېكى باھاسى چارشەنبە كۈنى بىراقلا %34.06 ئاشقان، تېسلانىڭ پاي چېكى باھاسىمۇ بۇنىڭغا ئەگىشىپ %6.07 ئاشقان. شۇنىڭ بىلەن، ماسكنىڭ بايلىقى بىر كۈن ئىچىدىلا 770 مىليون دوللارغا يىقىن ئاشقان.

       ئېلون ماسك ھازىر تېسلانىڭ باش ئىجرائىيە ئەمەلدارى ۋە SolarCity نىڭ باش دېرىكتورى بولۇشتىن ئىبارەت ئىككى ۋەزىپىنى تەڭلا ئۆز ئۈستىگە ئالغان، شۇنداقلا بۇ ئىككى شىركەتنىڭ ئەڭ چوڭ پايچىكى ئىكەن. ئالدىنقى ئايدا، مەبلەغ سالغۇچىلار SolarCity نىڭ پاي چېكىنى قولدىن چىقارماقچى بولغاندا، ماسك پۇرسەتنى چىڭ تۇتۇپ، ئۆزىنىڭ قولىدىكى پاي ئۈلۈشىنى كۆپەيتكەن.

       سانلىق مەلۇماتلاردا كۆرسىتىلىشىچە، ماسنىڭ قولىدىكى SolarCity پاي چېكىنىڭ سانى 21.3 مىليوندىن ئارتۇق بولۇپ، چارشەنبە كۈنىدىكى ئۆسۈشتىن كىيىن، بۇ بىر قىسىم پاي چېكىنىڭ قىممىتى ئىلگىرىكى 8.536 مىليون دوللاردىن 1.14 مىليارد دوللارغا يەتكەن. ماسكنىڭ قولىدىكى تېسلانىڭ پاي چېكى بولسا 35.6 مىليون ئەتراپىدا بولۇپ، بۇ بىر قىسىم پاي چېكىنىڭ قىممىتى بۇرۇنقى 7.87 مىليارد دوللاردىن 8.35 مىليارد دوللارغا ئۆسكەن. قىسقىسى، ماسكنىڭ قولىدىكى تېسلا ۋە SolarCity نىڭ پاي چېكىنىڭ قىممىتى چارشەنبە كۈنى %8.8 كۆپەيگەن، ئومومىي قىممىتى 9.5 مىليارد دوللارغا يەتكەن.

        ئاڭلاشلارغا قارىغاندا، تېسلانىڭ پاي چېكى باھاسى دائىم SolarCity نىڭ پاي چېكىگە ئەگىشىپ ئۆزگىرىدىكەن، يەنى چۈشسە تەڭ چۈشۈپ، ئۆسسە تەڭ ئۆسىدىكەن. مەبلەغ سالغۇچىلارنىڭ نەزەرىدە، ئېلېكتر ئېنېرگىيەلىك ئاپتوموبىللارغا بولغان ئېھتىياج يېڭى ئېنېرگىيە مەنبەسىنىڭ تەقدىرى بىلەن چەمبەرچەس باغلانغان ئىكەن.