ئادەمسىز ئاپتوموبىل، 5G خەۋەرلىشىش تېخنىكىسى، مەۋھۇم رېئاللىق تېلېكامېرا.... 2-نۆۋەتلىك دۇنيا ئالاقە تورى يىغىنىنىڭ باشلىنىش ھارپىسىدا، يەر شارىدىكى 258 كارخانا قاتناشقان « ئالاقە تورى نۇرى » كۆرگەزمىسى 15-دېكابىر جېجياڭ ئۆلكىسىنىڭ ۋۇجېن بازىرىدا باشلىنىپ، نۇرغۇن كىشىلەرنى جەلپ قىلدى.

   بۇ نۆۋەتلىك كۆرگەزمە بۇ يىلقى ئالاقە تورى يىغىنىدىكى بىر يارقىن نۇقتا. كۆرگەزمە « ئالاقە تورى نۇرى »نى باش تېما قىلغان بولۇپ،تەرەققىياتتا يېڭىلىق يارىتىش، ماس تەرەققىي قىلىش، تەرەققىيات يېشىل بولۇش، ئوچۇق تەرەققىي قىلىش، تەرەققىياتتىن ئورتاق بەھىرلىنىش ئىدىيەسى نامايەن قىلىنغان. ئۇيۇشتۇرغۇچى تەرەپنىڭ تونۇشتۇرۇشىچە، بۇ قېتىمقى ۋاقىتلىق مەيدان-ساراينىڭ قۇرۇلۇش كۆلىمى تەخمىنەن 21مىڭ كىۋادرات مېتىر بولۇپ، تەرەققىيات ئىدىيەسى رايونى، « ئىنتېرنېت + » باش تېما رايونى، يېڭىلىق يارىتىش يەرمەنكە رايونى ۋە مەخسۇس تارقىتىش رايونى قاتارلىق تۆت رايون تەسىس قىلىنغان.

   دۆلەتلىك ئالاقە تورى ئۇچۇرلىرى ئىشخانىسىنىڭ مۇدىرى لۇ ۋېي كۆرگەزمىنىڭ باشلىنىش مۇراسىمىدا سۆز قىلىپ مۇنداق دېدى: بۇ نۆۋەتلىك كۆرگەزمە ئالاقە تورى تەرەققىياتىنىڭ ئەڭ يېڭى مېۋىلىرىنى توپلاپ، جەمئىيەتتىكى ھەر قايسى ساھەلەرنىڭ ئەقىل-پاراسىتى ۋە كۈچىنى مۇجەسسەملەپ، جۇڭگو ئالاقە تورىنىڭ 20 يىللىق تەرەققىيات نەتىجىلىرىنى نامايان قىلدى، ئالاقە تورى جۇڭگودا يوقلۇقتىن بارلىققا كېلىپ، كىچىكلىكتىن زورىيىپ، ئاجىزلىقتىن كۈچىيىپ، كۈندىن كۈنگە ئىجتىمائىي، ئىقتىسادىي تەرەققىياتنىڭ ھەر قايسى تەرەپلىرىگە سىڭىپ كىردى.

   دۇنيانىڭ ھەر قايسى جايلىرىدىن كېلىپ كۆرگەزمىگە قاتناشقان كارخانىلار كۆرگەزمىگە ئۆزلىرىنىڭ ئەڭ يېڭى مۇۋەپپەقىيەت مېۋىلىرى، يېڭى تېخنىكىلىرىنى ئېلىپ كەلدى. بەيدۇ شىركىتى ئېلان قىلغان ئەڭ يېڭى ئادەمسىز ئاپتوموبىل، نوكىيا شىركىتىنىڭ مەۋھۇم رېئاللىق تېلېكامېراسى، شياۋمى شىركىتىنىڭ تەڭپۇڭلاشتۇرۇش ئاپتوموبىلى قاتارلىقلار كۆرگەزمە ئەھلىنى جەلپ قىلدى. كۆرگەزمىگە قاتناشقان كارخانىلاردىن ئەلى بابا، تېڭشۈن،ＩＢＭ، خۇاۋېي، يۇمشاق دېتال قاتارلىق چوڭ تىپتىكى كارخانىلار قاتناشقاندىن باشقا، يەنە دۆلەت ئىچى ۋە سىرتىدىكى يېتىلىش خاراكتېرىدىكى ئوتتۇرا، كىچىك تىپتىكى كارخانا ۋە شىركەتلەرمۇ قاتناشتى.

   ئىسرائىلىيەدىن كەلگەن تور بىخەتەرلىكى شىركىتىＣｈｅｃｋ　Ｐｏｉｎｔ بۇ يىل تۇنجى قېتىم كۆرگەزمىگە قاتناشقان بولۇپ، شىركەت مەسئۇلىنىڭ ئېيتىشىچە، موشۇنداق كۆرگەزمىگە قاتناشقاندا شىركەتنىڭ يېڭى تېخنىكىلىرىنى نامايان قىلىش پۇرسىتىگە ئىگە بولۇپلا قالماي، يەنە دۇنيانىڭ ھەر قايسى جايلىرىدىكى ئوخشاش كەسىپتىكىلەر بىلەن پىكىر ئالماشتۇرغىلى، ھەمكارلىق ئورناتقىلى بولىدىكەن.

   ئۇيۇشتۇرغۇچى تەرەپنىڭ تونۇشتۇرۇشىچە، 2-نۆۋەتلىك ئالاقە تورى يىغىنى. ئالاقە تورى نۇرى كۆرگەزمىسى 18-دېكابىرغىچە داۋاملىشىدىكەن. بۇ نۆۋەتلىك كۆرگەزمىنى دۆلەتلىك ئالاقە تورى ئۇچۇرلىرى ئىشخانىسى، پەن-تېخنىكا مىنىستىرلىقى، سانائەت ۋە ئۇچۇرلاشتۇرۇش مىنىستىرلىقى، جېجياڭ ئۆلكىلىك خەلق ھۆكۈمىتى بىرلىكتە ئۇيۇشتۇرغان، جېجياڭ ئۆلكىلىك ئالاقە تورى ئۇچۇرلىرى ئىشىخانىسى، جېجياڭ ئۆلكىلىك ئىقتىساد ۋە ئۇچۇرلاشتۇرۇش كومىتېتى، جۇڭگو ئالاقە تورى ئۇچۇرلىرى مەركىزى، توڭشياڭ شەھەرلىك خەلق

     ھۆكۈمىتى بىرلىكتە ئۆتكۈزۈشنى ئۈستىگە ئالغان.