«مەن بىر توۋا قىلغۇچى، ھەقىقىي توۋا قىلىش روھى ۋە گۇناھىمنى يۇيۇش ۋەزىپىسىنى زىممەمگە ئېلىپ، نەچچە مىڭ چاقىرىملىق توۋا قىلىش سەپىرىگە ئاتلاندىم». 43 ياشلىق ۋاڭ لېي ۋېلىسىپىت بىلەن ئالتە ئۆلكە ۋە شەھەرنى ئايلانغاندىن كېيىن، 12-ئاينىڭ 8-كۈنى نەنچاڭغا يېتىپ كەلگەن بولۇپ، كېيىنكى مەنزىلى خۇنەن ئىكەن.

      ۋاڭلېينىڭ دېيىشىچە ئۇ خېنەن ئۆلكىسىنىڭ جېڭياڭ ناھىيىسىدىن بولۇپ، بۇ يىل 4-ئاينىڭ 2-كۈنىدىن بۇرۇن تېخى بىر جىنايەتچى ئىدى. 1998-يىلى گۇاڭدۇڭدا ئىشلەمچىلىك قىلىۋاتقاندا باشقىلارنىڭ كۈشكۈرتىشى بىلەن بىر تەيۋەنلىك سودىگەرنى ئۆلتۈرۈشكە قاتنىشىپ، مۇددەتسىز قاماق جازاسىغا ھۆكۈم قىلىنغان. تۈرمىدىكى ئىپادىسى ئىنتايىن ياخشى بولغانلىقى ئۈچۈن 16 يىل سەككىز ئاي جازا مۇددىتىنى ئۆتىگەندىن كېيىن قويۇپ بېرىلگەن. «تۈرمىدىن چىققاندىن كېيىن ئۆزۈمنىڭ ئەينى ۋاقىتتا ئۆتكۈزگەن گۇناھىمنى ئويلاپ كۆڭلۈم پەقەت ئارام بەرمىدى، شۇنىڭ بىلەن زىيانكەشلىككە ئۇچرىغۇچىنىڭ يۇرتى تەيۋەن گاۋشيۇڭغا بېرىپ توۋا قىلىشنى ئويلىدىم». دەسلەپتە ئۇ پىيادە ماڭماقچى بولغان، لېكىن سالامەتلىكى يار بەرمىگەچكە ۋېلىسىپىتلىك مېڭىشنى تاللىغان. 10-ئاينىڭ 21-كۈنى ۋاڭلېي رەسمىي يولغا چىققان بولۇپ، ھازىرغىچە ئالتە ئۆلكە ۋە شەھەردىن ئۆتكەن. يولبويى نۇرغۇن ياخشى نىيەتلىك كىشىلەرنىڭ ياردىمىگە ئېرىشكەن بولۇپ، بولۇپمۇ نەنچاڭغا يېتىپ كەلگەن ۋاقىتتا بىرەيلەن ئۇنىڭغا مەدەت بېرىش ئۈچۈن 1000 يۈەن تەقدىم قىلغان.