ياپونىيە ئاخبارات تارقىتىش جەمئىيىتى (NHK) ياماگاتا ئاخبارات تارقىتىش ئىدارىسىنىڭ ھاۋارايىدىن ئالدىن مەلۇمات بېرىش دىكتورى 1-چېسلا كۈنى كەچتە ھاۋارايىدىن ئالدىن مەلۇمات ئاڭلىتىۋاتقاندا توساتتىنلا يىغلاپ كەتكەن بولۇپ، نۇرغۇن كۆرۈرمەنلەر ئۇنىڭ كۆز ياشلىرىنى سۈرتكەن ھالىتىنى كۆرۈپ قالغان. تورداشلار بۇ قىز دىكتورنىڭ تېلىۋىزور ئېكرانىدا يىغلاپ كېتىشىدىكى سەۋەبى توغرىسىدا ھەر خىل پەرەزلەرنى ئوتتۇرىغا قويۇۋاتقاندا، بۇ قىز دىكتور رۇخسەت سوراپ ئىشقا چىقمىغان بولۇپ، ئىككىنچى كۈنى ئۇ ھاۋارايىدىن ئالدىن مەلۇمات بېرىش پىروگراممىسىغا چىقمىغان.  

       ھاۋارايىدىن ئالدىن مەلۇمات بېرىش دىكتورى-ئوكادا 12-ئاينىڭ 1-كۈنى چۈشتىن كېيىن سائەت ئالتە يېرىمدا كۆرسىتىلگەن ھاۋارايىدىن ئالدىن مەلۇمات بېرىش پىروگراممىسىغا رىياسەتچىلىك قىلغان بولۇپ، پىروگراممىنىڭ دەسلىپىدە ئۇ ناھايىتى سالماق ھالەتتە:«12-ئايدىن باشلاپ، خۇددى مۇشۇ پەسىلدىكى ھاۋارايىغا  ئوخشاشلا ھاۋا تەدرىجىي سوۋۇشقا باشلىدى، بەزى چاغلاردا ئارىلاپ يامغۇر يېغىشقا باشلىدى» دەپ مەلۇماتىنى باشلىغان، لېكىن ئارىدىن بىر مىنۇت ئۆتكەندىن كېيىن دىكتورنىڭ ئاۋازى تەدرىجىي ھالدا يىغا ئاۋازىغا ئۆزگىرىپ كەتكەن بولۇپ، ھەتتا ئۆكسۈپ ئاۋازىمۇ چىقماي قالغان.

       ئوكادا بىر تەرەپتىن يىغلاپ يەنە بىر تەرەپتىن ھاۋارايىدىن ئالدىن مەلۇمات بېرىشنى داۋاملاشتۇرغان بولۇپ، كامىرا سىرتتىكى كۆرۈنۈشتىن ئاستا-ئاستا كۆرسىتىش ئۆيىگە قارىتىلغاندا كۆرۈرمەنلەر ئۇنىڭ بېشىنى تۆۋەن سالغان ھالدا ياش تۆكۈۋاتقانلىقىنى، يەنە كۆز ياشلىرىنى سۈرتۈۋاتقانلىقىنى كۆرۈپ قالغان. كەينىدىن كامىرا يەنە كۆرسىتىش ئۆيىدىكى باشقا ئەر-ئايال دىكتورلارغا توغرىلانغان بولۇپ، ئۇلار دەرھال:«كەچۈرۈڭلار، تۆۋەندە يەنە داۋاملىق خەۋەر كۆرسىتىمىز» دېگەن ھەم ناھايىتى خىجىللىق ئىلكىدە:«بۈگۈن ناھايىتى ئوسال كۆرۈنۈش كۆرسىتىلىپ قالدى» دېگەن.

        تورداشلار بەس-بەستە ئوكادانىڭ نېمىشقا شۇنچە قايغۇرغان ھالدا يىغلاپ كېتىشىنىڭ سەۋەبى توغرىسىدا ھەر خىل پەرەزلەرنى ئوتتۇرىغا قويۇشقا باشلىغان، بەزىلەر ئۇنىڭ شىركەتتە قاتتىق تەنقىد ئاڭلىغان بولۇشىدىن گۇمانلانغان بولسا، يەنە بەزىلەر ئۇنىڭ ئوغۇل دوستىدىن ئايرىلىپ كەتكەن بولۇشى مۇمكىنلىكىنى ئوتتۇرىغا قويۇشقان. ھەتتا بەزى تورداشلار يەنە ياماگاتا ئاخبارات تارقىتىش ئىدارىسىنىڭ بۇ ئىشقا قارىتا ئېنىق چۈشەنچە بېرىشىنى تەلەپ قىلغان، تورداشلار بۇ ئىش توغرىسىدا ھەر خىل پەرەزلەرنى ئوتتۇرىغا قويۇشقان. بەزى خەۋەرلەرگە قارىغاندا، ئوكادا نەچچە كۈن ئىلگىرى ئۆزىنىڭ شەخسىي بىلوگ تور بېتىدە:«يېقىندىن بېرى قاتتىق چارچاپ، تاماق يېگۈممۇ كەلمەيدىغان بولۇپ قالدى» دەپ يازغان.