گېرمانىيە «ئىقتىساد ھەپتىلىك ژۇرنىلى» نىڭ تور بېكىتىدە 20-چېسلا «گېرمانىيەنىڭ جۇڭگوغا مال ئېكسپورت قىلىش مىقدارى 1997-يىلىدىن بۇيان تۇنجى قېتىم يىگىلەپ قالدى» تېمىلىق خەۋەر بېرىلدى. گېرمانىيە مەھسۇلاتلىرىنىڭ جۇڭگوغا چىقىرىلىش مىقدارى ئىزچىل يۇقىرىلاپ مېڭىۋاتقان ئىدى. لېكىن بۇ يىل تۇيۇقسىزلا تۆۋەنلەشكە باشلىدى. ئۆتكۈنچى مەلۇماتلارغا قارىغاندا، گېرمانىيە ئىستاتىستىكا ئىدارىسى ئېلان قىلغان ئىستاتىستىكىلىق مەلۇماتتا كۆرسىتىلىشىچە، بۇ يىل 1-ئايدىن 9-ئايغىچە گېرمانىيەنىڭ جۇڭگوغا مال چىقىرىش مىقدارى %3 ئەتراپىدا چۈشۈپ كەتكەن بولۇپ، چۈشۈش سوممىسى 54 مىليارد ياۋروغا يەتكەن. گېرمانىيە سودا-سانائەتچىلەر بىرلەشمىسىنىڭ باشلىقى فوركىر 20-چېسلا :جۇڭگو ئىقتىسادىنىڭ ئېشىشى مۆلچەرىدىكىدىن ئاستا بولۇپ قالغانلىقتىن، بۇ گېرمانىيە كارخانىلىرىغىمۇ تەسىر كۆرسەتتى. نېمىلا بولمىسۇن جۇڭگو بىزنىڭ ئەڭ مۇھىم سودا شېرىكىمىز ئەمەسمۇ؟ دېدى. 2000-يىلىدىن بۇيان، گېرمانىيەنىڭ جۇڭگو مال چىقىرىش مىقدارى يەتتە ھەسسە ئېشىپ بۇلتۇر 75 مىليارد ياۋروغا يەتكەن. يەر شارى ئىقتىسادى خەۋپكە دۇچ كەلگەن 2009-يىللىرىمۇ گېرمانىيەنىڭ جۇڭگوغا مال چىقىرىش نىسبىتى يەنىلا %9 ئاشقان، كىيىنكى يىلى ھەتتا %44 ئاشقان ئىدى. گېرمانىيە كارخانىلىرىنىڭ مۆلچەرلىشىچە، جۇڭگو مال چىقىرىش بۇنىڭدىن كېيىن ناھايىتى تەستە جانلىنىشى مۇمكىن ئىكەن. گېرمانىيە سودىگەرلەر جەمئىيىتىنىڭ تەكشۈرۈشىگە ئاساسلانغاندا، جۇڭگودىكى %30 گېرمانىيە كارخانىسى جۇڭگو ئىقتىسادى ئاجىزلىشىشقا قاراپ ماڭدى، دەپ قارىغان. پەقەت %17 تەكشۈرۈشنى قوبۇل قىلغان كارخانا جۇڭگو ئىقتىسادى ياخشىلىنىپ كېتىدۇ، دەپ قارايدىكەن. گېرمانىيە سودا-سانائەتچىلەر بىرلەشمىسى جۇڭگو ئىقتىسادىنىڭ تەرەققىياتىنىڭ ئاستىلىشى گېرمانىيەنىڭ ئىچكى مەبلەغ سېلىش مىقدارىغا تەسىر كۆرسىتىشىدىن ئەنسىرىمەكتە. گېرمانىيە سودىگەرلەر جەمئىيىتىنىڭ 6000 دىن ئارتۇق جۇڭگو گېرمانىيە بىرلەشمە كارخانسىغا قارىتا ئېلىپ بارغان تەكشۈرۈشتىن مەلۇم بولۇشىچە، ئۈچتىن بىر قىسىم كارخانا كەلگۈسى بىر يىلدا مەبلەغ سېلىش مىقدارىنى ئاشۇرۇشنى ئويلىشىۋېتىپتۇ. لېكىن ئەتىيازدا بۇ نىسبەت تېخى ئىككىدىن بىر ئىدى.