بۇ يىل كىرگەندىن بۇيان، ئوتتۇرا ئاسىيادىن قورغاس پورتى ئارقىلىق 10 مىليون توننىغا يېقىن تەبىئىي گاز كىرگۈزۈلگەن بولۇپ، سودا سوممىسى 13 مىليارد 100 مىليون ئامېرىكا دوللىرىغا يەتكەن.
قورغاس تاموژنىسىنىڭ 23- ئىيۇندىكى ئىستاتىستىكىسىدىن مەلۇم بولۇشىچە، بۇ يىل جۇڭگو - ئاسىيا تەبىئىي گاز تۇرۇبىسى ئارقىلىق 9 مىليون 430 مىڭ توننا تەبىئىي گاز ئىمپورت قىلىنغان، بۇنىڭ 9 مىليون توننىسى تۈركمەنىستاندىن كىرگۈزۈلگەن بولۇپ، ئومۇمىي گازنىڭ 96% ىنى ئىگىلىگەن، قالغىنى ئۆزبېكىستاندىن كىرگۈزۈلگەن.
ئىگىلىنىشىچە، ئۈرۈمچىدە ئىشلىتىلىدىغان گازنىڭ 90% ىدىن كۆپرەكى ئوتتۇرا ئاسىيا تەبىئىي گاز تۇرۇبىسى ئارقىلىق كىرگۈزۈلۈۋاتقان بولۇپ، جۇڭگو - ئاسىيا تەبىئىي گاز تۇرۇبىسى مەملىكىتىمىزدىكى چېگرا سىرتىدىن تەبىئىي گاز ئىمپورت قىلىنىدىغان دۆلەت ھالقىغان تۇنجى «يول» ئىكەن، غەربتە تۈركمەنىستان ۋە ئۆزبېكىستاندىن باشلىنىپ، ئۆزبېكىستاننىڭ ئوتتۇرا قىسمى ۋە قازاقىستاننىڭ جەنۇبىي رايونىدىن ئۆتۈپ قورغاس پورتى ئارقىلىق كىرىدىكەن، بۇ تۇرۇبا ئارقىلىق مەملىكىتىمىزگە تۇراقلىق گاز يەتكۈزۈلۈۋاتقىنىغا بەش يىلدىن ئاشقان.
ھازىر جۇڭگو - ئاسىيا تەبىئىي گاز تۇرۇبىسىنىڭ A، B، C لىنىيەلىرى ئارقىلىق گاز توشۇلۇۋاتقان بولۇپ، بۇ تۇرۇبىلار قورغاس پورتى ئارقىلىق مەملىكىتىمىزگە ئۇلانغاندىن كېيىن، غەربنىڭ گازىنى شەرققە يەتكۈزىدىغان 2-، 3- تۇرۇبا لىنىيەلىرى بىلەن تۇتاشتۇرۇلغان، ئۇنىڭ بىلەن ئەڭ يىراق بولغاندا شياڭگاڭنى تەبىئىي گاز بىلەن تەمىنلىگىلى بولىدىكەن ھەم بۇ تۇرۇبا ئۆتكەن جايلاردىكى 400 مىليونغا يېقىن ئاھالىنى ۋە 3000 دىن ئارتۇق كارخانىنىڭ تەبىئىي گاز ئېھتىياجىنى قاندۇرۇشقا كاپالەتلىك قىلغىلى بولىدىكەن.