ئاپېلسىننىڭ تەمى چۈچۈمەل، تاتلىق، ئوزۇقلۇق مىقدارى مول بولغانلىقتىن، نۇرغۇن كىشى ياقتۇرۇپ يەيدۇ. بولۇپمۇ ئاياللار ئاپېلسىننى كۆپرەك يېسە، ئۆتكە تاش چۈشۈش خەۋپىنى تۆۋەنلىتىشكە پايدىسى بار.
ئىستاتىستىكا ماتېرىيالىدا ئىسپاتلىنىشىچە، كىلىنىكىدا ئاياللاردىكى ئۆتكە تاش چۈشۈش كېسەللىكىنىڭ نىسبىتى ئەرلەردىن ئىككى ھەسسىدىن تۆت ھەسسىگىچە كۆپ بولىدىكەن. مۇتەخەسسىسلەر تەتقىق قىلىش ئارقىلىق ئاياللارنىڭ ئەرلەرگە قارىغاندا ئۆتكە تاش چۈشۈش كېسىلىگە گىرىپتار بولۇشىدىكى ئەڭ چوڭ سەۋەب، ئۇلارنىڭ بەدىنىدىكى ئانىلىق ھورمونلارنىڭ خولېستېرىننى ئۆت سۇيۇقلۇقىغا يىغىپ قويىدىغانلىقى، ۋاقىت ئۇزارغانسېرى بۇنىڭ ئىچىدىكى خولېستېرىنلارنىڭ قويۇقلۇقى زىيادە ئېشىپ كېتىپ، خولېستېرىن تۈرىدىكى تاش چۈشۈشنى شەكىللەندۈرىدىغانلىقىنى ئىسپاتلىغان.
ئاپېلسىندىكى كۆپ مىقداردىكى ۋىتامىن C ئاياللاردا ئۆتكە تاش چۈشۈش كېسىلىگە گىرىپتار بولۇشنىڭ ئازىيىشىغا ياردەم بېرەلەيدىكەن. تېببىي ئىلىم تەتقىقاتىدا، ۋىتامىن C نىڭ ئورگانىزملارنىڭ بەرداشلىق بېرىش ئىقتىدارىنى ئاشۇرغاندىن سىرت، قىل قان تومۇرلارنىڭ ئېلاستىكىلىقىنى ئاشۇرۇپ، قاندىكى خولېستېرىننى تۆۋەنلەتكەندىن باشقا، يەنە خولېستېرىننىڭ جىگەردە ئۆت سۇيۇقلۇق كىسلاتاسىغا ئايلىنىشىنى چەكلەپ، ئۆت سۇيۇقلۇقىدىكى خولېستېرىننىڭ قويۇقلۇقىنى تۆۋەنلىتىدىغانلىقى ئىسپاتلانغان. مۇشۇنداق بولغاندا ئۆتكە تاش چۈشۈش كېسىلىگە گىرىپتار بولۇش خەۋپى ئازىيىدىكەن. ئۇنىڭدىن باشقا ئاپېلسىننىڭ پوستىدىكى مېۋە يېلىمى يېمەكلىكلەرنىڭ ئاشقازان ئۈچەي يوللىرىدىن ئۆتۈشىگە ياردەم بېرىپ، ئارتۇق خولېستېرىننى بەدەن سىرتىغا تېخىمۇ تېز چىقىرىپ، ئورگانىزملارنىڭ خولېستېرىننى ھەددىدىن زىيادە قوبۇل قىلىۋېلىشىنى ئازايتىدىكەن. شۇڭا ئاپېلسىننىڭ پوستىنى قايناق سۇغا چىلاپ چاي ئورنىدا ئىچسە، ئۆت خالتىسىغا تاش چۈشۈشنىڭ ئالدىنى ئېلىشقا تېخىمۇ پايدىلىق ئىكەن.