شىنخۇا ئاگېنتلىقى، بېيجىڭ تېلېگراممىسى. مۇخبىرنىڭ 24 – ماي جۇڭگو خەلق ئاۋىياتسىيەسى ئىدارىسىدىن ئىگىلىشىچە، خەلق ئاۋىياتسىيە ئىدارىسى تارقاتقان ‹‹خەلق ئاۋىياتسىيەسىنى قانۇن بويىچە ئىدارە قىلىش قۇرۇلۇشىنى كۈچەيتىش توغرىسىدىكى بىرقانچە پىكىر››دە مۇنداق تەكىتلەنگەن: جېدەل – ماجىرانىڭ ئالدىنى ئېلىش مېخانىزمىنى مۇكەممەللەشتۈرۈپ، ئاۋىياتسىيە تىرانسپورتى بىخەتەرلىكىدە ‹‹يولۇچىلار قارا تىزىملىكى›› تۈزۈمىنى قانۇن بويىچە قېلىپلاشتۇرۇپ، ‹‹يولۇچىلار قارا تىزىملىكى››گە كىرگۈزۈلگەن ئىشلارنىڭ سەۋەبى، شەرتىنى دەلىللەش ۋە بېجىرىش تەرتىپىنى تېخىمۇ ئايدىڭلاشتۇرۇش كېرەك.
پىكىردە مۇنۇلار ئوتتۇرىغا قويۇلغان: ئاۋىياتسىيە شىركەتلىرى بىلەن ئايرودۇرۇم، ئايروپورتلار بىرلەشمە ھەمكارلىقنى كۈچەيتىپ، نۆۋەتچى ئايروپىلانلارنىڭ ئۇچۇشىنى كېچىكتۈرۈش قاتارلىق گەۋدىلىك مەسىلىلەرگە ئاساسەن، جىددىي تاقابىل تۇرۇش مۇلازىمەت سىستېمىسىنى قانۇن بويىچە مۇكەممەللەشتۈرۈشى كېرەك. ئاۋىياتسىيە مۇلازىمەت سۈپىتىنى نازارەت قىلىپ باشقۇرۇشنى كۈچەيتىپ، ئىنكاس – ئەرزلەرنى بىرتەرەپ قىلىش مېخانىزمىنى ياخشىلاپ، يولۇچىلارنىڭ قانۇنلۇق ھوقۇق – مەنپەئىتىنى قانۇن بويىچە قوغداش كېرەك. شۇنىڭ بىلەن بىللە، خەلق ئاۋىياتسىيەسى دېلولىرىنى مەمۇرىي جەھەتتىن قايتا قاراپ چىقىش تۈزۈمىنى مۇكەممەللەشتۈرۈپ، جېدەل – ماجىرالارنى ھەل قىلىش ئىقتىدارىنى كۈچەيتىش كېرەك.
جۇڭگو خەلق ئاۋىياتسىيەسى ئىدارىسى ساياھەتچىلەرنىڭ مەدەنىي بولۇش، مەدەنىي ساياھەت قىلىش ھەرىكىتىنى يەنىمۇ قېلىپلاشتۇرۇش ئۈچۈن، يېقىندا دۆلەت ساياھەت ئىدارىسى بىلەن مەدەنىي ساياھەت قىلىش خىزمىتىنى كۈچەيتىش، ساياھەتچىلىكتىكى مەدەنىيەتسىز ھەرىكەتلەرنى قانۇن بويىچە تۈزەش، ئاۋىياتسىيە تىرانسپورتى ۋە ساياھەت تەرتىپىنى قوغداش قاتارلىق مەسىللەردە ئورتاق تونۇش ھاسىل قىلىپ، ئايروپىلان ۋە ساياھەتچىلىكتىكى مەدەنىيەتسىز ھەرىكەتلەرنى بىرلىكتە تۈزەشنى قارار قىلدى. خەلق ئاۋىياتسىيەسى ئىدارىسى نۆۋەتچى ئايروپىلاندىكى مەدەنىيەتسىز ‹‹ئۆز بېشىمچى›› يولۇچىلارنى جازالاش تەدبىرلىرىنى مۇھاكىمە قىلىپ، بۇ ساياھەتچىلەرنى ‹‹قارا تىزىملىك››كە كىرگۈزۈشنى ئويلاشماقتا.
‹‹پىكىر››دە يەنە مۇنۇلار ئېنىق ئوتتۇرىغا قويۇلغان: ئېلىمىز خەلق ئاۋىياتسىيەسى 2020 – يىلىغا بارغاندا، ‹‹خەلق ئاۋىياتسىيە قانۇنى››نى يادرو قىلغان، ھەرقايسى ساھە، كەسىپ ۋە ھالقىلارنى قاپلىغان، ئىلمىي، قېلىپلاشقان، قاتلاملىرى ئېنىق، يۈرۈشلەشكەن ۋە ئۆزئارا باغلىنىشلىق قانۇن سىستېمىسى ئورنىتىپ، كەسىپكارلارنىڭ قانۇن بويىچە ئىش بېجىرىش سەۋىيەسىنى ئومۇميۈزلۈك ئۆستۈرۈپ، يولۇچىلارنىڭ قانۇنغا رىئايە قىلىش، قانۇندىن پايدىلىنىش ئېڭىنى كۈچەيتىپ، زىددىيەت، جېدەل – ماجىرالارنى ۋاقتىدا، ئۈنۈملۈك ھەل قىلىش ئىقتىدارىنى ھازىرلايدۇ.
