شاڭخەي شېنخۇا كۇلۇبى ئورگان تورىدا خەلقئارا مىلان توپچىسى گۇارىننى قوشۇۋالغانلىقىنى جاكارلىدى. خەۋەرگە قارىغاندا، ئۇنىڭ يۆتكىلىش باھاسى 11 مىليون ياۋرو، يىللىق مائاشى 6 مىليون ياۋروغا يېتىدىكەن. ئۇ ئاللىقاچان ئىسپانىيەگە بېرىپ، توختام تۈزۈشۈپ، كوماندا بىلەن يىغىلىپ بوپتۇ.

       گۇارىن 1986-يىلى كولۇمبىيەدە تۇغۇلغان. ئوتتۇرا مەيدان توپچىسى. كەسپىي ھاياتىنى كولۇمبىيەدە باشلاپ، 2005-يىلى ئارگېنتىنا بوكا ياشلىرى كۇلۇبىغا ئىجارە بېرىلگەن. 2006-يىلى فىرانسىيە ئا دەرىجىلىكلەر بىرلەشمىسىدىكى سائىنت ئېتىياننې كۇلۇبىغا ئىجارە بېرىلىپ، 2007-يىلى مەزكۇر كۇلۇبقا رەسمىي قوشۇلغان. 2008-يىلى 7-ئايدا ئۇ پورتو كۇلۇبىغا يۆتكەلگەن. پورتودىكى تۆت پەسىلدە ئۇ كەسپىي ھاياتىنىڭ يۇقىرى پەللىسىگە چىققان. پورتوغا ۋاكالىتەن 108 مەيدان مۇسابىقىدە 19 توپ كىرگۈزگەن. كوماندىنىڭ بىر قېتىم ياۋروپا ئىتتىپاق لوڭقىسى، ئىككى قېتىم بىرلەشمە چېمپىيونلۇقى، ئۈچ قېتىم پورتۇگالىيە لوڭقىسى چېمپىيونلۇقى، ئۈچ قېتىم پورتۇگالىيە دەرىجىدىن تاشقىرى لوڭقىسى قاتارلىقلارنى قولغا كەلتۈرۈشىگە تۆھپە قوشقان. 2012-يىلى 5-ئاينىڭ 17-كۈنى  پورتو كۇلۇبى گۇارىننىڭ 11 مىليون ياۋرو يۆتكىلىش ھەققى بىلەن خەلقئارا مىلان كوماندىسىغا قوشۇلغانلىقىنى جاكارلىغان. بۈگۈنگىچە ئۇ خەلقئارا مىلان كوماندىسىدا 146 مەيداندا 23 توپ كىرگۈزگەن.

      ئۇ يەنە ھەر قايسى ياشتىكى كۇلۇمبىيە دۆلەت كوماندىسىنىڭ دائىملىق ئەزاسى. كولۇمبىيە كوماندىسى بىلەن بىرلىكتە 2011-يىللىق ئامېرىكا لوڭقىسى ۋە 2014-يىللىق دۇنيا لوڭقىسى مۇسابىقىسىگە قاتناشقان. بۇ پەسىلدە ئۇ شاڭخەي شېنخۇا كۇلۇبىدىكى كولۇمبىيەلىك توپچى مورېنو بىلەن ماسلىشىپ، كوماندىنىڭ بىرلەشمىدە ياخشى نەتىجە يارىتىشىغا يارەدەمدە بولالامدۇ-يوق، بۇنىڭغا ۋاقىت جاۋاب بېرىدۇ.