شىنخۇا تورى، بومباي، 25-ماي تېلېگراممىسى: ھىندىستان تاراتقۇلىرىنىڭ 25-مايدىكى خەۋىرىگە قارىغاندا، ھىندىستاندا بىر قانچە كۈندىن بۇيان ئۇدا رېكورت يېڭىلاۋاتقان يۇقىرى تېمېپراتۇرىدا ئارقا-ئارقىدىن نۇرغۇن ئادەم ھاياتىدىن ئايرىلغان. تومۇز ئىسسىقتا ھىندىستاننىڭ ئىككى ئۆلكىسىدە 24-مايغىچە 500 ئادەم قازا قىلغان.
«ھىندىستان گېزىتى»نىڭ خەۋەر قىلىشىچە، ئاندىرا ۋە تېلېنگەنەدىن ئىبارەت ئىككى ئۆلكىدە 24-ماي كۈنى جەمئىي 165 ئادەم ئىسسىق ئۆتۈپ كەتكەنلىكتىن قازا قىلغان. ماينىڭ ئوتتۇرىلىرىدىن بۇيان بۇ ئىككى ئۆلكىدە بۇ سەۋەبلىك قازا قىلغانلارنىڭ سانى 500گە يەتكەن.
بۇنىڭدىن باشقا، 22- ۋە 23-ماي كۈنلىرى غەربىي بېنگال ئۆلكىسىدە 12 ئادەم قاتتىق ئىسسىقتىن قازا قىلغان.
تېلېنگەنە ئۆلكىسىنىڭ يۇقىرى دەرىجىلىك ئەمەلدارى مىنانىڭ ئېيتىشىچە، قازا قىلغانلارنىڭ كۆپىنچىسى ياشانغانلار بولۇپ، ئاساسەن پىژغىرىم ئىسسىقتا ئەمگەك قىلغانلىقتىن سۇسىزلىنىپ ياكى ئىسسىق ئۆتۈپ قازا قىلغان.
ئىگىلىنىشىچە، ھىندىستاندا يېقىنقى بىر ھەپتىدىن بۇيان پىژغىرىم ئىسسىق بولۇپ، پايتەخت يېڭى دېھلىدا ئەڭ يۇقىرى تېمپېراتۇرا ℃48قا يەتكەن. ھىندىستان مېتېئورولوگىيە تارماقلىرىنىڭ ئېيتىشىچە، بۇ خىل ھاۋارايى كەلگۈسى بىر قانچە كۈندىمۇ يەنە داۋاملىشىدىكەن.
قازا قىلغانلار سانىنىڭ كۆپىيىشىگە ئەگىشىپ ھىندىستاندىكى بىر قىسىم يەرلىك ھۆكۈمەتلەر ئاممىنى سۇنى كۆپ ئىچىش، ئىسسىق ئۆتۈپ قالسا دەرھال دوختۇرخانىغا بېرىشقا چاقىرغان.