جاھان ئاگېنتلىقى 14-ماي خەۋىرى؛ لەگلەك تورى تەرجىمىسى: بۇرۇندى پرېزىدېنتى پىرى نكۇرۇنزىزانىڭ ئايرۇپىلانى پايتەخت بۇجۇمبۇراغا قونۇشىغا رۇخسەت قىلىنمىدى، ئايرۇپىلان تانزانىيەگە قايتىپ كەتتى. تانزانىيە ھۆكۈمىتى باياناتچىسى ئاسساھ مۋامبىنى ئېلان قىلغان باياناتىدا، « بۇرۇندى پرېزىدېنتى نكۇرۇنزىزانىڭ ئايرۇپىلانىنىڭ بۇرۇندى ھاۋا تەۋەلىكىگە كىرىشى چەكلەندى، شۇڭلاشقا دارۇسسالامغا قايتىپ كەلدى» دېدى. بۇرۇندى پرېزىدېنتى نكۇرۇنزىزا، بۇرۇندىدىكى كىرزىسنى ھەل قىلىش ئۈچۈن شەرقى ئافرىقا ئەللىرى«EAC» يىغىنىغا قاتنىشىش مەقسىتىدە تانزانىيەگە بارغان بولۇپ، دۆلىتىدىكى ھەربىي ئۆزگىرىشكە ئۇرۇنۇش خەۋىرىنى ئاڭلاپ دۆلىتىگە قايتىشنى قارار قىلغان ئىدى، ھەربىي دائىرلەر، سابق باش شىتاب باشلىقى نىيومبارنىڭ پرېزىدېنت نكۇرۇنزىزانىڭ قايتىپ كېلىشىنى چەكلەش ئۈچۈن دۆلەت چېگرىلىرى ۋە بۇجۇمبۇرا ئايرۇدرومىنى تاقىۋەتكەنلىكىنى بىلدۈردى. نىيومبار پايتەختتىكى «ئافرىقا رادىئوسى» غا سۆز قىلىپ، پرېزىدېنت نكۇرۇنزىزانىڭ ۋەزىپىسىدىن ئېلىپ تاشلانغانلىقىنى ۋە ھۆكۈمەتنىڭ تارقىتىۋېتىلگەنلىكىنى جاكارلاپ، نامايىشچىلارنى ئايرۇدرومغا قاراپ مېڭىشقا چاقىرىق قىلغان. شۇنىڭ بىلەن مىڭلىغان نامايىشچى پايتەخت بۇجۇمبۇرا كوچىلىرىغا تۆكۈلگەن، نامايىشچىلار بىلەن بىخەتەرلىك قىسىملىرى ئارىىسدا يۈز بەرگەن توقۇنۇشتا ئاز دىگەندە 3 كىشى ئۆلدى.
شەرقى ئافرىقا ئەللىرى بىرلەشمىسى «EAC» بۇرۇندىدىكى ھەربىي ئۆزگىرىش پىلانىغا قارشى ئىكەنلىكىنى بىلدۈردى. دارۇسسالام شەھىرىدە ئېچىلغان «EAC» يىغىنىدا، تانزانىيە پرېزىدېنتى جاكايا كىكۋىتى شەرقى ئافرىقا بىرلەشمىسى نامىدا بايانات ئېلان قىلىپ، « بۇرۇندىدا ھەر قانداق بىر تەرەپنىڭ مەنپەئەتىگە خىزمەت ۋاستىىسى بولىدىغان ھەربىي ئۆزگىرىش ۋە زوراۋانلىققا قارشى تۇرىمىز» دىگەن. كىكۋىتى، شەرقى ئافرىقا ئەللىرى بىرلەشمىسىنىڭ بۇرۇندىدىكى بارلىق پارتىيەلەردىن دېموكراتىك سايلامغا ھۆرمەت بىلدۈرۈشىنى تەلەپ قىلىدىغانلىقىنى ئېيتىپ، «بۇرۇندىدىكى سايلام دۆلەتتە تىنچلىق ھۆكۈم سۈرگەنگە قەدەر كېچىكتۈرۈلۈشى كىرەك» دېدى.