جاھان ئاگېنتلىقى 26-ئاپرېل خەۋىرى؛ لەگلەك تورى تەرجىمىسى: كانادا ھۆكۈمىتى 7.9 بال يەر تەۋرىگەن نىپالغا 5 مىليون دوللار ياردەم بېرىشنى قارار قىلدى. كانادا خەلقئارا تەرەققىيات مىنىستىرى Christian Paradis ئېلان قىلغان يازما باياناتىدا، نىپالدىكى قۇتقۇزۇش خىزمەتلىرىگە قاتناشقان ياردەم ئورگانلىرى تەرىپىدىن ياردەم ئېھتىياجلىرىغا ئىشلىتىلىش ئۈچۈن 5 مىليون دوللار ياردەم بېرىدىغانلىقىنى بىلدۈردى. مىنىستىر پارادىس، كانادا خەلقىنىڭ نىپال خەلقىنىڭ قايغۇلىرىغا ئورتاقلىشىدىغانلىقىنى بىلدۈرۈپ، كانادانىڭ ياردىمىنىڭ يەر تەۋرەش يۈز بەرگەن رايۇنلاردىكى خەلقلەرگە يىمەكلىك، ئىچىملىك، چېدىر، دورا ۋە باشقا خىزمەتلەر ئۈچۈن ئىشلىتىلىدىغانلىقىنى ئېيتتى. ئۇ يەنە؛ «بىز نىپالدىكى ۋەزىيەتنى يېقىندىن كۆزىتىۋاتىمىز، ئەگەر زۆرۈر بولغاندا تېخىمۇ كۆپ ياردەم بېرىمىز» دېدى.
يەنە بىر تەرەپتىن كانادا باش مىنىستىرى Stephen Joseph Harper ئەۋەتكەن ئۇچۇردا، يەر تەۋرەشتە ھاياتىدىن ئايرىلغانلار ئۈچۈن قايغۇرىدىغانلىقىنى ۋە نىپال خەلقىنىڭ يېنىدا تۇرىدىغانلىقىنى ئىپادىلىدى.
ئامېرىكا تاشقى ئ‍شىلار مىنىستىرى جون كېررىي، ئېلان قىلغان يازما باياناتىدا، ئامېرىكا خەلقىنىڭ نىپالدا ھاياتىدىن ئايرىلغانلارنىڭ ئائىلىرىگە سەۋىر تىلەيدىغانلىقىنى بىلدۈردى. كېررىي نىپالغا ياردەم بېرىش ئۈچۈن نىپال ھۆكۈمىتى بىلەن يېقىندىن كۆرىشىۋاتقانلىقىنى، بۇ ھەقتە ئامېرىكىنىڭ كاتماندو باش ئەلچىسى Peter Bodde ئىنسانىي ياردەم ئۈچۈن 1 مىليون دوللار جىددى ياردەم بېرىدىغانلىقىنى بىلدۈردى. كېررىي، ئامېرىكا خەلقئارا تەرەققىيات ئاگېنتلىقى، تەبئىي ئاپەت ياردەم ئەترىتىنىڭ رايۇنغا ئورۇنلىشىشقا تەييارلانغانلىقىنى ۋە مەزكۇر ئەترەتنىڭ قۇتقۇزۇش قىسىملىرىنىڭ ھەرىكەتكە ئۆتكەنلىكىنى بىلدۈردى.
نىپالدا تۈنۈگۈن 7.8 بال يەر تەۋرەپ نۇرغۇن كىشى ھاياتىدىن ئايرىلغان ئىدى.