ئىز تورى-爱智网

　　   ئاقسۇ ۋىلايىتىنىڭ بۇ يىل چاغاندىكى ساياھەتچىلىك ئومۇمىي كىرىمى 12 مىليون 610 مىڭ يۈەنگە يىتىپ، يىل بېشىدىلا يېڭى نەتىجىگە ئېرىشتى . ساياھەت بىخەتەرلىكىگە چېتىشلىق ھېچقانداق ھادىسە، ئەرز - شىكايەت كۆرۈلمىدى. ساياھەت مەنزىرە نۇقتىلىرىنىڭ تاپاۋىتى ياخشى بولۇپ، جەمئىي 32 مىڭ كىشىنى كۈتۈۋالدى. قىشلىق قار - مۇز پائالىيىتى تېخى بىخ ھالەتتە تۇرۇۋاتقان ئاقسۇدا قىشتىكى بىر ھەپتىلىك ساياھەت ئومۇمىي كىرىمىنىڭ 10 مىليون يۈەندىن ئېشىشى بۇ ۋىلايەتنىڭ يېقىنقى يىللاردا ساياھەتچىلىكنى يېڭىچە سانائەتلەشتۈرۈش قەدىمىنى تېزلىتىشتىكى ھالقىلىق تەدبىر قاتارىدا چىڭ تۇتۇپ، ئۇنىڭ تەرەققىيات ئاساسىنى مۇستەھكەملىگەنلىكىنى　نامايان قىلدى. ئاقسۇ ۋىلايىتىدە تەبىئىي ساياھەت بايلىقى مول بولۇپ، مەملىكەتلىك A دەرىجىلىكتىن يۇقىرى مەنزىرە نۇقتىلىرىنىڭ ئۆزىلا 20 گە يېتىدۇ . تەڭرىتاغ تۆمۈر چوققىسى ، تارىم دەرياسى ،تەكلىماكان قۇملۇقى ، كۇچا چوڭ كۆلى، قىزىليار جىلغىسى، باي قىزىل مىڭئۆيى، شايار ئىپتىدائىي توغراقلىقى ، ئونسۇ سىرلىق جىلغىسى، قىرمىشئاتا مازىرى قاتارلىق ساياھەت مەنزىرە نۇقتىلىرى دۆلەت ئىچى - سىرتىغا داڭلىق بولۇپ، زور تەرەققىيات يوشۇرۇن كۈچىگە، جەلىپكارلىققا ئىگە. يېقىندا مەملىكەت بويىچە ئېلىپ بېرىلغان 3 - قېتىملىق مەدەنىيەت يادىكارلىقلىرىنى ئومۇميۈزلۈك تەكشۈرۈپ ئېنىقلاشتا، بۇ ۋىلايەتتە 673 ئورۇن «يۆتكەشكە بولمايدىغان مەدەنىيەت يادىكارلىقى» دەپ بېكىتىلىپ، ئاقسۇ ساياھەتچىلىكىنىڭ بۇنىڭدىن كېيىنكى تەرەققىياتىغا يەنە يېڭى كۈچ قوشۇلدى . مەنزىرە نۇقتىلىرى، مەدەنىيەت يادىكارلىقلىرى ، تارىخىي ئىزلارنىڭ كۆپ بولۇشى ئاقسۇ ۋىلايىتىنىڭ ساياھەتچىلىك تەرەققىياتىنى كۈچلۈك ئىلگىرى سۈردى. ۋىلايەتلىك پارتكوم ، مەمۇرىي مەھكىمە 2011-يىلى يىل بېشىدىلا «ساياھەتچىلىكتە ھالقىما تەرەققىياتنى ئىشقا ئاشۇرۇش سۈرئىتىنى تېزلىتىش توغرىسىدا پىكىر»نى تارقىتىپ ،ساياھەتچىلىكنى يۈكسەلدۈرۈش يۆنىلىشىنى ئايدىڭلاشتۇردى. ساياھەتچىلىكتە چوڭ كەسىپ، چوڭ بازار يېتىلدۈرۈشنى ئىقتىسادىي، ئىجتىمائىي تەرەققىياتتىكى ئاساسلىق نىشاننىڭ بىرى قىلىپ بېكىتتى. ساياھەتچىلىكنى سانائەت تەرەققىياتىدىكى تۈۋرۈك كەسىپكە، خەلق تۇرمۇشىنى ياخشىلاش، خەلقنى بېيىتىش، خەلقنى رازى قىلىش قۇرۇلۇشىغا ئايلاندۇرۇشقا ۋە زامانىۋى ساياھەت مۇلازىمەتچىلىكىنى كۈچەيتىپ، ئاقسۇنى ھاياتىي كۈچكە، جەلىپكارلىققا ئىگە ساياھەت سودا مەركىزى قىلىپ قۇرۇپ چىقىشقا تۇتۇش قىلدى. سىياسەت، مەبلەغ، ئىختىساسلىقلار جەھەتتە ساياھەتچىلىكنى قوللاش سالمىقىنى زورايتتى. بۇلتۇر ۋىلايەت يەرلىك مالىيەدىن ساياھەتچىلىك تەرەققىيات فوندىغا 14 مىليون 500 مىڭ يۈەن مەخسۇس مەبلەغ ئاجراتتى ھەم ئۇنى يىلىغا ％10 كۆپەيتىشنى بېكىتتى. نەتىجىدە بۇلتۇر ئۆتكۈزۈلگەن«ئاقسۇ 7 - نۆۋەتلىك دولان، كۈسەن مەدەنىيەت ساياھەت بايرىمى» 6 - ئايدىن 10-ئايغىچە تۆت ئاي داۋاملاشتى. ئاقسۇ شەھىرىدە تۇنجى قېتىملىق مىللىي قول ھۈنەر سەنئىتى، ساياھەت خاتىرە بۇيۇملىرى يەرمەنكىسى ئۆتكۈزۈلدى. توقسۇ ناھىيەسىدە توڭگۇزبېشى قەدىمكى شەھەر خارابىسى 1 - باسقۇچلۇق ساياھەت قۇرۇلۇشى تۈرىدە ئىش باشلاندى ھەم يۈرۈشلۈك ساياھەت فوتوسۈرەت كۆرگەزمىسى ئۇيۇشتۇرۇلدى. كۇچا ناھىيەسى شىنجاڭ خەلقئارا يېمەك - ئىچمەك ساياھەت، مەدەنىيەت بايرىمى، باي ناھىيەسى 3 - نۆۋەتلىك قىزىل سۇ ئامبىرىنى توغرىسىغا كېسىپ ئۈزۈپ ئۆتۈش مۇسابىقىسى، شايار ناھىيەسى 2 - نۆۋەتلىك قورشاۋ شاھمات، خەلقئارا شاھمات مۇسابىقىسى، ئاۋات ناھىيەسى 4 - نۆۋەتلىك دولان مەدەنىيەت - ساياھەت مۇسەللەس بايرىمى ئۆتكۈزدى. بۇ بىر قاتار يۈرۈشلۈك پائالىيەتلەر ئارقىلىق ئاقسۇ ساياھەتچىلىكىنىڭ تونۇلۇش دەرىجىسى ئۆستى، تەسىر دائىرىسى كېڭەيدى . ئاقسۇ شەھىرى دولان دەرياسى مەنزىرە بەلبېغى قۇرۇلۇشىنى كۈچەپ يولغا قويۇپ ، جۇڭگودىكى مۇنەۋۋەر ساياھەت شەھىرى بەرپا قىلىش قەدىمىنى تېزلەتتى. كۇچا ناھىيەسى تور ئارقىلىق باھالاشتا «جۇڭگودىكى كىشىلەرنى ئەڭ مەپتۇن قىلىدىغان جاي» نامزاتلىقىغا تاللاندى. ئونسۇ تەڭرىتاغ سىرلىق جىلغىسى «دۆلەتلىك ئېكولوگىيە باغچىسى» قىلىپ بېكىتىلدى . شايار خەلقئارا توغراق باغچىسى «شىنجاڭدىكى ئون چوڭ مەنزىرە رايونى»، باي ناھىيەسى ئاپتونوم رايونىمىز بويىچە «ساياھەتچىلىكتىكى كۈچلۈك ناھىيە» قاتارىغا كىردى . بۇ قۇرۇلۇشلارنىڭ تۈرتكىسىدە 2011-يىلى ئاقسۇ ۋىلايىتىدە كۈتۈۋېلىنغان ساياھەتچى 3مىليون 70 مىڭ ئادەم/قېتىمغا يېتىپ، 2010-يىلىدىكىدىن ％22.31، يارىتىلغان ساياھەت ئومۇمىي كىرىمى ％19.76 ئاشتى. كۇچا ناھىيەسى بىلەن ئاقسۇ شەھىرىنىڭ يىللىق ساياھەت ئومۇمىي كىرىمى 400 مىليون يۈەندىن، باي ناھىيەسىنىڭ 100 مىليون يۈەندىن ئاشتى . سېلىنمىنى كۆپەيتىپ ، مۇلازىمەت مۇھىتىنى ئەلالاشتۇرۇش، ئاقسۇ ساياھەتچىلىكىنىڭ تەرەققىياتىدىكى يەنە بىر يارقىن نۇقتىغا ئايلاندى. بۇلتۇر ۋىلايەتلىك ساياھەت ئىدارىسى 15 مىليون يۈەندىن ئارتۇق مەخسۇس تۈر مەبلىغىنى قولغا كەلتۈرۈپ، ناھىيە (شەھەر) لەرنىڭ ساياھەت ئۇل ئەسلىھە شارائىتىنى ياخشىلاشقا سەرپ قىلدى. ناھىيە (شەھەر) لەرمۇ ساياھەت تەشۋىقاتىنى ئىلگىرى سۈرۈشكە جەمىئي 2 مىليون 250 مىڭ يۈەن مەبلەغ ئاجراتتى . ئاقسۇ ۋىلايىتى يۇقىرىقى نەتىجىلەرنى ئۈزلۈكسىز مۇستەھكەملەش ئاساسىدا بۇ يىل دۆلەت ئىچى - سىرتىدىن 3 مىليون 970 مىڭ ساياھەتچى كۈتۈۋېلىپ، بۇلتۇرقىدىن 26％ كۆپەيتىش، ساياھەت ئومۇمىي كىرىمىنى 1 مىليارد 396 مىليون يۈەنگە يەتكۈزۈپ، ％25 ئاشۇرۇش؛ A2 دەرىجىلىك ساياھەت مەنزىرە نۇقتىسىدىن ئۈچنى، A3 دەرىجىلىك مەنزىرە نۇقتىسىدىن بىرنى، A4 دەرىجىلىك مەنزىرە نۇقتىسىدىن بىرنى، يۇلتۇز دەرىجىلىك مېھمانسارايدىن بەشنى، دېھقانلار شادلىقى ئارامگاھىدىن بەشنى، ساياھەتچىلىك كوپىراتىپىدىن ئىككىنى يېڭىدىن كۆپەيتىش نىشانىنى ئوتتۇرغا قويۇپ، ۋەزىپە - كۆرسەتكۈچلەرنى يىل بېشىدىلا كونكرېت ئەمەلىيلەشتۈردى . copyright by www.iz.la
