ئاتۇش دېسەم...

menggutax

ئاتۇش دېسەم...

ئاتۇش دېسەم دىلىم شوخلىنىپ،
ھاياجاندا ئويناپ كېتىدۇ،
مېھرىم گويا ئەزىم دەريادەك،
ئۆركەش ياساپ يايراپ كېتىدۇ.

چۈنكى ئاتۇش تۇغۇلغان يۇرتۇم،
كىندىك قېنىم تۆكۈلگەن دىيار.
تۇغۇلدۇم، ئۆستۈم ئارسلاندەك،
سەندە بولغاچ قىش بولماس باھار.

ئاتۇش گويا «قىران دەريا» دەك،
دولقۇن يېرىپ ئالغا باسماقتا.
ھاللىق جەمئىيەت جەڭگاھلىرىدا،
نامىراتلىقتىن يىراقلاشماقتا.

مۇقىملىقتا، ئىناقلىقتا ئۇ،
پەرۋاز بىلەن ئالغا ئۇچماقتا.
سانائەت ۋە دېھقانچىلىقتا،
ئۆز ئەجىرىدىن زەپەر قۇچماقتا.

ئاتۇش ئەنجۈر، مەدەنىيەتنىڭ،
ئۇزۇن يىللىق ئالتۇن ماكانى.
ئىلىم- پەننىڭ نۇرى چاقنىغان،
ھۆنەر-سەنئەت مول-ھوسۇل كانى.

ئانا يۇرتۇم گۈزەل ئاتۇشۇم،
سېنىڭ ئوغلۇڭ سالامغا كەلدى.
قېنىپ سېنىڭ مېھرىڭگە تولۇق،
لىرىك تۇيغۇ ئىلھاملار ئالدى.

شۇڭا دىلدىن ساڭا كۆيۈنۈپ،
نەزمە يازدىم چىن ۋۇجۇدۇمدىن.
مەڭگۈ سېنى سېغىنىپ يۇرتۇم،
ئارتۇق كۆرەي ئېزىز جېنىمدىن.

(ئاپتورى: ھوشۇر ئەمەت)

مەنبە: قىزىلسۇ گېزىتى

salkin11

دۇنيادا ئۆز يۇرىتىنى سۆيمىگەن كىشىنىڭ ، باشقىلار تەرپىدىن سۈيۈلۈشى مۇمكىن ئەمەس . يۇرىت مۇھەببىتى بىباھار گۇھەر ... ياخشى يېزىلىپتۇ ... رەھمەت سىزگە ! ...

abdukorax

بۇ شىئىر ياخشى يىزىلىپتۇ،...
مەن ئەقلىمگە كەلگەندىن باشلاپ ئاتۇشنى تىجارەتچى ۋە مەرىپەتپەرۋەر ،قەھرىمان ئۇيغۇرلىرىمىز،ئالىملىرىمىز بىلەن مەشھۇر دەپ تونويمەن.
قەشقەر،خوتەن،ياركەنىت،ئاتۇش،ئلى،قۇمۇل،تۇرپان،كۇچا...بۇلارنىڭ ھەممىسىدە ئۆز قىرىنداشلىرمىز،قەھرىمانلىرىمىز،بۈيۈك ئەجداتلىرىمىزنىڭ سىماسى مەۋجۇت.شۇڭا مەن بۇ يۇرت ھەم بۇ يۇرتلاردا ياشاۋاتقان قىرىنداشلىرىمنىڭ ھەممىسىگە ئوخشاش ھۆرمەت بىلەن مۇئالىمە قىلىمەن.بۇلارنىڭ ھەممىسى مىنىڭ ئانا يۇرتۇم ...بۇ يەرلەردە ياشاۋاتقانلارنىڭ ھەممىسى مىنىڭ قىرىنداشلىرىم ھەم تەقدىرداشلىرىم...

otyak

ئاتۇش دىسەم كۆڭلۈم سۆيۈنۈپ كېتىدۇ. بەك ياخشى يېزىلغان شېئىرلارنى يوللاپ تۇرىسىز. يوللانمىڭىزغا رەھمەت !